الحنية مش مجرد صفة حلوة فى الإنسان الحنية أسلوب حياة طريقة بتتعامل بيها مع اللى حواليك حتى وهم مش فى أحسن حالاتهم إنك تعرف تهدى حد بكلمة وتفهم سكوته من غير ما يجبر نفسه يشرح وتحس بوجعه حتى لو كان بيضحك قدامك أنا مقتنع إن الدنيا بقت صعبة بشكل يخلى أى حد محتاج شخص حنين أكتر من أى وقت فات مش حد يحل كل مشاكله لكن حد يسمعه من غير ما يقاطعه حد يطمنه من غير ما يحسسه إنه عبء حد يحضنه بالكلام لما الحياة تبقى تقيلة عليه الغريب إن الناس بقت تعتبر الحنية ضعف مع إن أصعب حاجة فى الزمن ده إنك تفضل طيب وقلبك أبيض بعد كل اللى شوفته أسهل بكتير إنك تبقى قاسى لكن إنك تفضل رحيم رغم الخذلان فدى قوة مش أى حد يقدر عليها وأيوه أنا شاب وزى أى شاب الناس فاكرة إن المفروض أستحمل وأسكت وأعدى كل حاجة لوحدى بس الحقيقة إن الرجالة برضه بتتعب بتتوجع وبتحتاج حد يقولها أنا معاك مفيش إنسان خلق عشان يعيش عمره كله قوى يمكن عشان كده أكتر حاجة بتشدنى فى أى حد هى الحنية مش الشكل ولا الفلوس ولا الكلام الكتير اللى يهمنى قلب يعرف يحتوى يعرف يهون يعرف يخلى اللى قدامه يحس بالأمان يمكن ناس كتير فاكرة إن الكلمة الحلوة ملهاش قيمة بس الكلمة الحلوة ممكن تنقذ حد كان خلاص فقد الأمل والاهتمام البسيط ممكن يغير يوم كامل ورسالة واحدة فى وقتها الصح ممكن تفرق مع إنسان أكتر مما تتخيل أنا بكتب الكلام ده لأنى مؤمن إن كلنا بنخفى معارك محدش شايفها وكل واحد فينا نفسه يقابل حد حنين بجد حد وجوده راحة وصوته أمان وكلامه يهون تعب الأيام لو لسه فيك حنية حافظ عليها ومتخليش قسوة الدنيا تغير قلبك ولو عندك حد حنين فى حياتك تمسك بيه لأن الحنية بقت من أندر الحاجات اللى ممكن تقابلها فى الزمن ده