أنا زهقت. زهقت من الكلام، من التحليل، من الناس اللي كل شوية تحطلي قالب وتفترض إنها فهماني وهي ما فهمتش حاجة. زهقت إني أتكلم عن اللي جوايا فيترد عليا بكلام محفوظ، نفس الجمل، نفس “الحلول”، نفس القرف المتكرر اللي مفيهوش أي إحساس حقيقي. أنا مش واقف مكاني عشان مش عايز أتحرك، ولا عشان “مش بحاول”، ولا عشان ناقصني نصيحة. أنا أصلاً شايل من الحياة نفسها، من تقلها من إنها بتمشي غصب عني وأنا جوايا مفيش أي اندفاع ناحيتها. تعبان. تقيل. مخنوق. ومش طايق فكرة إني أشرح تاني. والأسوأ من دا كله، إنك مهما تتكلم، هتلاقي نفسك محاصر في اتنين: يا حد يفسرلك حياتك كأنه عارفها أكتر منك، يا حد يقولك “أنا زيك” ويقف عند كده كأن ده حل. أنا مش محتاج حد يطبطب، ومش مستني حد يفهم، ومش داخل أفتح نقاش. أنا داخل أطلع القرف ده بره وخلاص. أنا فعلًا زهقت من كل حاجة… لدرجة إني بقيت مش شايف أي فرق كبير بين إني أتكلم أو أسكت.