منذ 16 ساعاتيشعر بـ قلق
السلام عليكم انا تالته ثانوي والنهارده كان اول امتحان ليا والحمدلله عدي وكان كويس بس بجد انا متوتره جدا ومش توتر عادي انا النهارده مكنتش عايزه اصحي كنت عايزه اموت بس مبداش امتحانات وعماله اتخيل انه هيحصل كذا وهنسي كذا مش عارفه اقول ايه خايفه اوي من الامتحانات وخايفه من النتيجه اكتر انا معملتش احسن حاجه بمنتهي الصراحه بس انا تعبت اوي نفسيا وجسديا السنه دي دا غير امي امي وبس هي الي عملت عشاني هو دا طبيعي طيب اعمل ايه انا بس معرفتش اقول لحد او اتكلم هو انا مكبره الدنيا بس بجد انا حاسه بتوتر فعلا جدا هو ممكن دا بسبب اني بمر بحاله اكتئاب وعندي قلق عام ولا دا عادي
كنت مكانك السنه اللي فاتت و منهاره ليله اول امتحان ليا و راهبه الدنيا و اللجان و فكره ان الورقه اللي قدامي هتحدد مستقبلي كله بس صدقيني كله هيعدي و هيبقى تمام و الدنيا هتمشي مش هتقف و فعلا تالته ثانوي مش هي اللي بتحدد حياتك لا بالعكس كل الفكره انها مرحله انتقاليه من حاجه متعوده عليها بقالك ١٢ سنه لدنيا جديده خالص و حياه مختلفه و حاجات اول مره هتجربيها لكن اللي بيحدد حياتك و مستقبلك من بدايه الكليه الى ما بعد كده و صدقيني بردو تالته ثانوي امتحان زي اي امتحان و هتيجي بعد كدا تدركي ده لما تلاقي نفسك ف الكليه بتمتحني امتحان عدد اسئلته ضعفين عدد اسئله امتحان تالته ثانوي ووقت اقل و اللجان اصعب بكتير و هتقولي ساعتها انا ازاي كنت خايفه من لجنه ثانويه عامه و بجد الموضوع هيمشي عادي بإذن الله بس اهم حاجه على قد ما تقدري متوتريش نفسك و اهدي كل ما تكوني بارده هتكوني احسن سيبك من الناس اللي بتقعد تقول انتي ازاي معندكيش دم و مبتحسيش و بيحسسوكي انك لازم تبقي قاعده على اعصابك و بتاكلي فنفسك لا عادي خافي و اتوتري كلنا كنا كده و محدش يقدر يمنعك من ده و لكن ع الاقل خليكي من بره هاديه و تمام و بتضحكي
اوعي تفكري تغشي بجد مهما قالولك لو صعب تتناقشي معاهم و تفهميهم ده اسكتي و متجيبيش سيره عشان ميضغطوش عليكي اكتر و يضطروكي تلجأي لكدا و افتكري ربنا قال من يتقي الله يجعل له مخرجا وانا واحده مجربه الموضوع دا و فعلا ربنا عوضني بالخير الحمدلله و راضيه عن مكاني دلوقتي و مبسوطه
نا كنت الدفعة اللي فاتت والله نا طول السنة الحمد لله كنت بذاكر وامي وابويا قالي ما دام عملت اللي عليك احنا مش مستنيين نتيجة وانا طول السنة ف نفسي كنت بقول علي الاقل حاولت جيت اول يوم دا اتخضيت خضة حسيت ان قلبي اتقبض كدا بس الحمد لله الدنيا كانت حلوة بعدها واخدت ع الحوار المهم حاول لاخر لحظة
امتحان زي اي امتحان نصيبك مكتوبلك احنا بس بناخد بالاسباب