فات أكتر من ٥ سنين وانا لسة لحد النهاردة بقوم فنص النوم مخضوضة بصحي ع ضحكة بابا اصله كان بيحب الهزار والضحك اوى.. مخى رافض يصدق ان بابا مش موجود .. بحس بفقد ذاكرة لحظى او رفض للفكرة الى هو ازاى دا كان موجود من شوية.. يعنى ايه مش موجود؟!.. يعنى ايه انسان كنت بتشوفه لحم ودم وملامح ومواقف مبقاش موجود كأنه اتبخر مش عدم رضا بس م الوقت بتكتشف انواع جديدة من الوجع بس بتعرف تتعايش معاه.. وتتعايش مع فكرة انك هتعيش كل حاجة ناقصة حتى فرحتك عمرها م هتكون كاملة بس انت بقيت شاطر وبتعرف تعيش بكوكتيل المشاعر دا جواك.. بس بتيجي عليا لحظات بقول لنفسي بابا معاش حاجات كتير فالوضع الطبيعي الابهات بعشوها مع ولادهم.. انا ي دوب اتخرجت وبعدها بابا بسنتين تلاتة توفى.. دا مش اعتراض منى والله بالعكس دا قدر الله وربنا مغرقنا نعم ومش سايبنا بس انا بتكلم عن مشاعري الانسانية.. شعور غريب لا انا مثلا بابا توفى وانا صغيرة اوى وبقيت يتيمة ف متعودة ولا هو مات ف سن قدر يشوف فيه ثمرة تربيته لينا .. حتى لما بيجي عريس بكون شايلة هم فكرة ان بابا مش موجود.. بابا كان روح البيت ونوره من ساعة م مشى والبيت ميت ومضلم وبارد..