منذ يوميشعر بـ ضائع
السلام عليكم ورحمة الله وبركاته حد جرب قبل كدا صيام الدوبامين؟ أو بمعنى عام " التخلّص من إدمان الهاتف" عشان حقيقي الموضوع بقا مرعب والله فيه ساعات كتيرة بتضيع من غير ما الواحد يحس بيها ، دا غير كمان موضوع إني مش عارفه ابدأ في الحاجات اللي المفروض مخططه إني هعملها في الأجازة لكن حرفيا الشغف والطاقة للبدء بتحتضر حتى مش عارفه ابدأ ، ف لو حد عنده حلول أو لو حد مرّ بتجربَة مشابهه فهكون مشكورة جدًا يعني.
أنا جربت قفلت الموبايل أربع أيام 😍☝🏻 حقيقي كانت أحلي تجربة لسه فاتحة الموبايل امبارح وحاسه حياتي رجعت تبوظ تاني 😭
فرضت على نفسي اعمل uninstall لكل السوشيال ميديا وبقيت احط التلفون فصندوق قبل ما انام والحمد لله في تحسن بقيت اقضي وقت اكتر فحاجات مفيدة زي القراءة والكتابة
انا لما دخلت الجيش بقيت مطر انى ابعد عن التلفون ولما خلصت طول ما انا فى الشغل مش بقرب منوا يعتبر رميه فى الدرج
فيه حاجة حلوة اوي بجد فرقت معايا الدكتور قالهالي. كنت بقوله اني مدمنة للتلفون اوي بجد ومش عارف ايه، المهم هو قالي عادي مش مشكلة، الادمان ده عشان انتي بتدوري على مصدر سريع وسهل للدوبامين، بس ده هيخليكي مكتئبة اكتر، بس كل ده هيقل مع الادوية ان شاء الله، اهم بس حاجة ساعتين بعد الصحيان متمسكيش اي اجهزة خالص، اعملي اللي وراكي الاول وحتى لو خلصتي متمسكيش التلفون، لان ده هيسحب الدوبامين الطبيعي من الجسم، وساعة قبل النوم برضو متتعرضيش لأي اجهزة عشان تنامي كويس. بأمانة انا مش بطبق حوار بالليل ده، بس فعلا والله موضوع الساعتين بعد الصحيان ده فرق معايا بشكل غير طبيعي حرفيا، بطريقة فعلا ملحوظة. طول النهار بمسكه عموما مقلش الاستخدام ولا حاجة، بس فعلا ببقى مرتاحة نفسيا مخلصة اللي ورايا عندي طاقة وهكذا. فاا بس.
يا ريت فعلا لو حد جربه يقول عشان التعفن قارفني😂