وفي حاجة عمري ما كنت بعرف أقولها بصوت عالي. atamini brain 6041 tarudu eulya law shafat alrisala أوقات كتير ببقى محتاج حضن... حضن بجد. مش بمعنى رومانسي، ولا أي حاجة من اللي الناس ممكن تفهمها غلط. مجرد إحساس بالأمان. إحساس إن فيه حد يقولي إن كل حاجة هتبقى بخير. إن فيه مكان أرجعله لما أتعب. لكن في نفس اللحظة بلاقي صوت جوايا بيقولي: "لا، أنت مش محتاج ده." "خليك قوي." "اتحمل لوحدك." وأفضل عايش بين الاحتياج والإنكار. بين إني نفسي أتحب، وبين إني أقنع نفسي إني مش محتاج حب. ونفسي أفهم ليه مجرد طلب حياة عادية بقى صعب بالشكل ده. نفسي يكون ليا مكان وسط الناس اللي بحبهم. نفسي أحس إني مهم بالنسبالهم. إنهم يفتقدوني لو غبت، ويفرحوا لو كنت بخير، ويحسوا بيا زي ما بحس بيهم. مش بطلب حاجة كبيرة. بطلب حاجات يمكن أغلب الناس بتعتبرها عادية. لكن بالنسبة ليا كانت دايمًا بعيدة شوية. وأوقات بسأل نفسي... هل كل ده بسبب إني فقدت أمي بدري؟ هل الجزء ده من قلبي هيفضل يدور على حاجة فقدها من سنين؟ مش عارف. كل اللي أعرفه إني تعبت من المشي لوحدي. ومع ذلك... لسه بحاول. لسه كل يوم بصحى وأحاول. يمكن لأن جوايا جزء صغير لسه مؤمن إن في يوم من الأيام هلاقي المكان اللي أحس فيه إني محبوب وآمن ومقبول كما أنا.