مشكلة الجواز للبنت في العشرينات مش مجرد إنها عايزة تتجوز وخلاص، المشكلة الأكبر إنها بتعيش بين حاجتين متناقضتين. من ناحية المجتمع بيسألها كل شوية: "لسه ما اتجوزتيش؟" ومن ناحية تانية لما تحاول تدور على فرصة مناسبة تلاقي الموضوع أصعب بكتير مما كانت متخيلة. السنين بتعدي، وكل فترة تسمع عن واحدة اتخطبت وواحدة اتجوزت وواحدة خلفت، فتبدأ تقارن نفسها بغيرها حتى لو هي مش عايزة تعمل كده. وتفضل تسأل نفسها: "هو أنا فيا حاجة غلط؟" مع إن الحقيقة إن الظروف بقت أصعب على الجميع. فيه بنات مشكلتهم مش إن مفيش عرسان، لكن إن مفيش الشخص المناسب. شخص يحترمها ويقدرها ويكون جاد فعلًا. وفيه بنات تعبوا من المحاولات والأسئلة والوعود اللي مبتكملش. الأصعب من تأخر الجواز نفسه هو الشعور بالوحدة أحيانًا، والإحساس إن الحياة واقفة في مكانها بينما الجميع بيتحرك للأمام. لكن الحقيقة إن قيمة البنت مش مرتبطة بخاتم في إيدها ولا بتاريخ مكتوب في قسيمة جواز. الجواز رزق، زيه زي أي رزق تاني، له وقته وقدره. كل بنت من حقها تحلم ببيت وأسرة وشريك حياة، ومن حقها تحزن لو الحلم ده اتأخر، لكن من حقها كمان تعيش حياتها وتبني نفسها وتفرح بأيامها وهي مستنية. لأن الحياة لا تبدأ بعد الجواز، الحياة مستمرة الآن، بكل ما فيها من أمل وانتظار وأحلام.
هو عكس الردود دي بس انا هكلمك بشكل حيادي حتي لو كلامي ده ممكن يدايق بعض الاشخاص ولكن خلينا نقسمه لنقط و هحاول الخص 1. كل ما البنت هتزداد وعي ذكاء مستوي مادي تبقي مستقله كل ما هتقل فرصها ف سوق الجواز لو اتكلمنا عنه بمنظورك 2. الحاجه اللي شويه الرجاله بتتجاهلها البنت مش بتبقي ماديه لما تبقي عايزه نفس مستواها المادي وهي مع اهلها ده طبيعي بنت مش ف نفس مستواك متتقدمش و ترجع تقول طلباتها كتير دي انانيه و طماعه انت لسه ف اول حياتك حاجه ترجعلك انت مش هتبهدل بنات الناس معاك 3.وعي العلاقات الزايد دلوقتي البنات مش عايزين راجل يجيب فلوس بس لا يهتم و يحاور و يسمع و مثقف الخ ف مقارنه عن الجيل اللي فات ف المنافسه اصعب البنت الكويسه ف ناس ممكن تاخد خطوه لورا قبل ما تتقدملها 4.اغلب البنات اللي بيتخطبوا حاليا بيتنازلوا لانه واجب مجتمعي مش اكتر ف من أسباب الطلاق الزايد من حقك تلاقي دايما امان و احتواء و حد يشوفك و يسمعك و يهتم بس لو تنازلتي او مصبرتيش النتيجه هتبقي مش اشباه الرجال بشعه فادعي ربنا و ان شاء الله ربنا ييسرلك امورك
اقولك حاجه مفيش حاجه اسمها جواز مثالي كل ما طموحات بتكون عاليه فرص زوج بتقل الصح اختاري واحد عيوبه مقبله بنسبلك
الجواز في الاول كان افضل ، انما دلوقت البنات عايشه في صراع المقارنه بينها وبين ناس تانيين ، مبقاش فيه بنت تقبلك باحترامك وحسن خلقك ، لا عايزين كل حاجه على الجاهز حرفيا ، مطالب منك تبذل كل طاقتك عشان بس تعجبها وهي في المقابل بتقرر ومش بيفرق معاها الا راحتها المادية اكتر من اي حاجه تانيه ، احنا بقينا في عايشين في بشاعة حقيقي..