معنديش صحاب خالص، ومقدرش بصراحة أقول على الناس اللي في حياتي صحاب بالمعنى الحقيقي للكلمة. ولما حد يقولي: اتكلمي مع صحابك أو اتعرفي على ناس جديدة، بحس إنه مش فاهم المشكلة أصلًا. لأن الفكرة مش إني مكسلة أتكلم أو مش عايزة أتعرف على حد. الفكرة إن معنديش فعلًا الناس اللي أقدر أسميهم صحاب بالمعنى الحقيقي للكلمة. في ناس أعرفها، آه. في زمالة وكلام عادي، آه. لكن لما أبقى واقعة ومخنوقة ومحتاجة حد، بلاقي نفسي لوحدي. الحقيقة إني نفسي في صحاب أكتر من أي حد بيقولي النصيحة دي. نفسي في ناس أرتاح معاها من غير خوف، ناس وجودها أمان مش قلق، ناس متبقاش كل مرة محتاجة مني حذر أو استعداد للأذى. تعبت من إني كل شوية أحاول، وأدي فرص، وأفتح باب لمعرفة جديدة، وفي الآخر أكتشف إني وقعت مع ناس توكسيك أو علاقات بتستنزفني نفسيًا وتسيب جوايا أثر أحتاج وقت طويل عشان أتعافى منه. كان نفسي كل معرفة تبقى خير، مش درس. كل شخص يدخل حياتي يبقى إضافة، مش ندبة جديدة. كل علاقة تسيب ذكرى حلوة، مش أثر يخليني أخاف من اللي بعده. يمكن عشان كده بقيت أضايق من جملة اتعرفي على ناس، لأنها جاية من ناس متعرفش قد إيه الواحد حاول قبل كده، وقد إيه بقى مرهق من تكرار نفس الوجع. أنا مش رافضة الناس، ولا رافضة الصداقة. أنا بس تعبت من إن كل مرة أبقى محتاجة أمان، ألاقي نفسي بتعلم درس جديد بدل ما ألاقي إنسان حقيقي.