هي مشكلة الصراحة مش لقيالها حل، ف هفضفض هنا ع الاقل. من حوالي سنة، اتخانقت مع واحد على تطبيق مسلسلات وكده، وانا عشان بنت، ف لما بتخانق بتخانق بآك ولد مخصوص عشان اتخانق براحتي. المهم، لما وصلنا لنقطة مشتركة، هو قالي لو عندي انستا، حاولت اهرب واتهرب باي شكل بجد بس معرفتش، ف عملت واحد، وبعدين بعدها قولتله اني بنت، وهو ولا بيكلم بنات ولا انا والله بكلم ولاد، بس اهو اللي حصل، استغفر الله. المهم، بعدها بفترة، جالي احساس بيقولي افتح وانهو بعت (الاحاسيس دي بتجيلي كتير اوي عامة وغالبا غالبا بتكون صح)، وفعلا، فتحت ولقيته كاتب. المهم، الكلام جاب بعضه وفضلنا نتكلم حبة، وعرفته وعرفني، لدرجة ان هو بقى حافظ ردود افعالي بالظبط وبيعرف يتكلم زيي، وهو اصلا اردني. المهم، كنت بلاقيه بيعتذرلي دايما، وبيخاف على زعلي اوي، وحتى مرات كنت اشوف ليه تعليق بالصدفة مثلا بيتعامل مع بنت، الاقيه بيتعامل بحدود اوي واللي هو على قد النقاش وخلاص. وانا كنت ع العكس تماما، حتى لما كنا بنتخانق لو خناقة كبيرة، لازم حد فينا بيعتذر وبيرجع للتاني، ودي بتبقى ع حسب بقى مين حس بالذنب ولا مين افتقد اكتر، لان احنا الاتنين بنبقى غلطانين اصلا. كان بيحكيلي كل حاجة، وكنت اعرف عنه كل حاجة فعليا، ما عدا المعلومات الاساسية. يعني مثلا، مكنتش اعرف ساكن فين تحديدا في الاردن، مش عارفة جامعته فين ولا اسمها، مش عارفة حساب اساسي واحد ليه والعكس بالعكس من ناحيتي. كان عارف عني حاجات كتير برضو بس المعلومات الاساسية لأ، ومحل اقامتي كان عارفه عادي لان الكلام جاب بالصدفة يعني، وفنفس الوقت انا معنديش مشكلة ف كده، وبالنسبة لأشكالنا وصفنا اشكالنا لكن صور ولا انا ولا هو بعتنا. كنت اعرف مشاكل اهله وعلاقاته وكنت بقرأه زي الكتاب المفتوح، وهو اظن نفس الكلام. وكنت عارفة اني حبيته وواثقة فعلا وخلاص بس ساكتة، لان انا ولا هبادر، ثانيا الموضوع من اوله لآخره غلط ف انا مش هزيد الطين بلة واغلطه اكتر ف خليها ع قد الصداقة وخلاص. المهم بعدها هو اللي اعترف الاول، وهو قالي انه مش متأكد ف سألته اذا كنت انا بحبه هيعمل ايه؟ ف المهم عرف اني كمان بحبه وفضلنا كويسين فترة. مفيش حاجات اتغيرت اوي لما اعترفنا هي هي نفس علاقتنا ونفس اسلوب كلامنا ونفس خناقاتنا وجدالاتنا خالص عادي، وكانش بيتلاعب والله، انا حافظاه، وشفت طريقته مع غيري، وعارفة امتى بيحب حد وامتى بيكرهه.. لحد م جه ف مرة حصلت مشكلة كبيرة اوي مش هقدر اقولها صراحة، والمشكلة حصلت من ناحيتي انا بس كان ممكن تئذيه هو كمان لولا ستر ربنا، ف انقطعت انا فترة عنه، وكنت مدركة تماما لان ده حصل عشان ربنا عايز يبعدني عن الطريق ده. ربنا اداني كذا اشارة متتاليين، وانا اتعودت اني لما بعمل حاجة غلط لازم تحصل حاجة لو مصيبة هتئذيتي انا، المهم ربنا يبعدني عنها بأي شكل. ف المهم، لما عدت فترة كنت هديت فيها شوية وخلاص، وجيت افتح، اكتشفت انه حذف اغلب الحسابات اللي كنا بنتكلم فيها، واللي متساب منهم هو قافله، ف حاولت ادور عليه كذا مرة، وكان فيه مكان معين بنكتب فيه دايما لبعض ف مسلسل معين ف تعليق 8. بقالي فترة كبيرة اوي مش بستقبل منه رد. انا عارفة انهو محصلهوش حاجة وواثقة من ده، بس فنفس الوقت واثقة برضو انهو ارهق نفسيا جامد بسببي. حلمت بيه كذا مرة وبييجي ع بالي كتير اوي، بس مش عارفة اعمل ايه. الاسوأ من كل ده ان فيه تعليق هو كان كاتبه وانا علقت عليه قولتله ييجي المكان الي بنكتب فيه عادة (الكيدرامي او الاوتاكو اللي بيستخدموا سلاير هيفهموا جو المقرات ده عامة)، بس من يومين لقيت التعليق بتاعه محذوف. يعني م الاخر هو دخل وحذفه. الموضوع وصل لظرحة اني شككت ف نفسي وقلت اكيد كان كاتب ف حتة تانية وانا ناسية بس مش عارفة.. واحدة تالتة كانت تعرفنا، قالتلي انها كانت بتشوفه بيعاملني زي الاكيرة، وان انا دايما عنده مختلفة، لو انا مش موجودة مش هيفتح ولا يتفاعل معاها، ولو انا موجودة مش بيتفاعل غير معايا. قالتلي انه حنى لما انا اختفيت هو اتغير جامد، وكان متبهدل بمعنى الكلمة. ف انا دلوقتي عايزة حل.. انا مش ناوية ارجع تاني والله، ميبقاش ربنا بعدني عنه وانا ارجعله تاني، انا بس كنت بحاول اعرف اذا كان كويس ولا لا.. وعايزة ارتاح والله تعبت. متعلقة بيه جامد، رغم اني كنت بكرهه اصلا، معرفش الكره الرهيب ده قلب كده ازاي والله.