السلام عليكم 🌸. دلوقتي انا داخلة تالتة السنة الجاية، ف الطبيعي ان ماما اصلا بتبدأ معانا بايو من قبل الدروس ف نص او اواخر سبعة كده مثلا، عشان كده كده هي طبيبة وفي نفس الوقت نبدأ مذاكرة بالتدريج، بس انا عشان اول دفعة للـ integrated science ف انا يعتبر مأخدتش بايو ولا مرة غير شوية سمك كده ف اولى ومش عارفين هيتغير ولا لا. ف اضطرينا نكنسل الموضوع ده لحد ما يطلع قرار بخصوص البايو، وبما ان انا زهقانة ومعنديش حاجة اعملها بجد ف قررت اذاكر فيزيكس. انا شاطرة اوي فيها وبحبها وبحب اذاكرها واقرأ فيها بعيدا عن المذاكرة، ف هي بالنسبالي سهلة وكل حاجة، بس انا مش عارفة هل ده هيأثر عليا في آخر السنة؟ انا لما قلت لماما قالتلي انها فكرة حلوة طالما انا فاضية عادي، بدل ما ابدأ الدراسة بضغط واراكم وكده خصوصا ان انا بتشتت بطريقة مستفزة، ف قالتلي ابدأي على خفيف اقرأي بس الكتاب شوفي محتوياته ومحتاجة فيه ايه او ايه مش فاهماه صعب ولا سهل وكده، وبس. ف انا قرأته قراءة سريعة وهو باين عليه مستوى متوسط بالنسبالي لان فيه حاجات انا معرفهاش اوي، خصوصا ان اول شابتر اصلا كله electricity وانا آخر معلوماتي فيها من تالتة اعدادي. ذاكرت جزء من اول درس وحاسة الحوار ممتع اوي وماشي معايا، بس زي ما قلت مش عارفة هل ده هيفصلني في الآخر ولا لأ.