الأمور اللي تقبلتها في اللول وتسامحت فيها رغم أنها تاذيك، هي نفسها رح تكون سبب في قطع العلاقة بعد سنين .. في بداية العلاقة كنت تتنازل، وتسمح على أمور في قرارة نفسك علابالك بلي ملازمش تتسامح فيهم .. قلة الإحترام، الأذى، الغضب، الكذب، السب .. كنت ديما تحاول وفي كل مرة تغمض عينك غير لأنك تمشي بتخمام "رح يتبدل، نسامحو المرة هذي وأكيد رح تكون آخر مرة يعاود فيها" ومع اللخر؟ بعد سلسلة طويلة من التنازلات، رح يجي نهار وتكره وتحبس 'تنازل' وفجأة تلقى العلاقة تقطعت وخلاصت .. وتجيك لحظة إدراك بلي اللي كان بيناتكم، مكانش مبني على 'الحب ولا الصحبة ولا العشرة'، كان مبني على 'التنازل تاعك'، ونهار حبست تنازل؟ خلاص كلش مالا من الأول اختصر عليك .. متنحيش من روحك باش تزيد في أي علاقة، العلاقة متتبناش بـ التنازل ولا التسامح، صح التسامح والتغاضي سبب في استمرارها، بصح لوكان الأساس مكانش صحيح، واللي هو التفاهم وين أنت مديرش الحاجة اللي تاذيه، وهو ميديرش الحاجة اللي تاذيك .. رح يجي نهار وين يتهدم كلش ومش ديما الطرف الثاني اللي خدعنا وكذب علينا حتى عرفنا حقيقة تصرفاته .. مرات، حنا اللي قبلنا بنسخة منه مكانتش مناسبة لينا، نسخة كنا متأكدين أنها رح تاذينا وتنقص مننا، بصح حنا عاندنا وراهننا وبنينا على أرض مايلة .. ومادام متحملتش مسؤولية روحك في البداية بـ 'قطع العلاقة'، اتحملها مع اللخر بـ 'التخطي'