أنا اتسبت فجأة بدون أسباب قبل الخطوبة بيومين ومكنش فيه بينا أي مشاكل وكنا كويسين جدا وأول ما اتقدم كان قالي إنه بيحبني من زمان وكان طاير بيا حرفيا ومزعلنيش مرة لحد يوم ما اختفى كدا فجأة اختفى ومبقاش كلمة وعمل بلوك وخلى باباه هو اللي يكلم بابا وينهي معاه وسابني اتجنن بدماغي ومحدش اعتذر إلا باباه وبعدها مامته وأخته بيقابلوني يلفوا وشهم الناحية التانية وكأني أنا اللي أذيت ابنهم تعبوا نفسيتي جدا جدا وراحوا خطبوله بعدها بشهر بس بيسمعوا واحدة هما اللي مختارينها له ولا راعوا حتى إحساسي وبيقابلوني يبصولي كأني أنا الطرف السيء في الرواية ومحسوش بالذنب خالص!!! ومن وقتها وأنا حياتي متدمرة ونفسيتي تعبانة حتى مبقاش عندي ثقة في نفسي ولا قادرة أفتح الباب لحد جديد وهو مكمل حياته عادي وبيجهز الشقة اللي اختارناها وخلاص قرب يتجوز وحياته ماشية وأنا اللي حياتي واقفة عدى سنة وأنا لسه مآذية وحياتي واقفة لحد ما بقيتش أشك إن فعلا المشكلة فيا أنا أصل إزاي يأذيني ويعيش مبسوط وأنا اللي أفضل تعبانة كدا بجد!
عشت نفس اللي بتقولي عليه بس الفرق اننا فضلنا مخطوبين سنه ونص وكنا خلاص بنجهز لفرحنا وكل حاجه تمام وعمل نفس الموقف اختفي فجاه وكل ببايا وانهي كل حاجه معاه من غير ميعرفني وراح بعدها بفتره صغيره خطب بنت خالتها واتجوز ف نفس الشقه اللي انا كنت مختاره فيها كل حاجه انا فاهمه قد اي الموضوع مؤذي بس صدقني هتعرفي تتخطي خليكي قويه واعرفي ان العيب فيه هو مش فيكي لاني فضلت وقت طويل اللوم نفسي اني السبب ف انه هو يسيبني بس العكس صدقيني هيجي عليكي وقت وتقولي الحمد لله انه ربنا رحمك وبعده عنك لان لو كان خير ليكي كنتي استمريتي معاه
انا كنت زيك اتقدملى وكان طالع بيا السما وانتى انضف حد عرفته ومفيش زيك وبحبك وبتاع والناس شكرو فيكم وبعدها اتغير بقا يتجاهلنى وهو اونلاين وبعدها يطلع حجج ظروف ومش ظروف وعرفت بالصدفة من اكونت انه كان مرتبط قبلى وبيحبها لسا واجهته من غير ميبررلى حاجه يشوف الرسايل والمكالمات وميردش وف الاخر قالى ده الصح بدل شايفة كدا طب وضحلى اعتذر طيب اى حاجه مفيش