قرآن

اليوم ال ١١ من الابتعاد عن العادة السرية و الاباحية و الانتظام في الصلاة ثقتي بنفسي زادت، تركيزي بقا اقوي ، بقيت مطمن رغم كل الضغوط اللي في حياتي ان ربنا معايا و في ضهري و مفيش حاجة مستاهلة اقلق عشانها حتي الذنوب اللي كنت بعتبرها بسيطة زي الاغاني قررت ابعد عنها و استبدلها بسماع القرآن و يااااا على القرآن و جماله، و جمال صوت الشيخ ياسر الدوسري، انا ازاي كنت غرقان و مفوت على نفسي الجمال ده كله و دايما لسه بتجيلي افكار العادة و اني مفتقد المتعة دي ، بس كل ما تجيلي الافكار دي بفتكر برضه ربنا انه شايفني و مطلع على قلبي و هو ارحم حد بيا و اكيد هيعوضني عن الصبر ده، بالزوجة الصالحة اللي تملي عليا حياتي و يقر عيني بيها يااااارب ثبتني

دلوقتي فيه بنت اسمها ريناد هي اكبر مني بسنة واحنا عندنا مدرس رياضيات عمره ٢٦ سنة هي دائما بتتقرب منه وهما علاقتهم كويسه فعلا وعلاقته بيا انا كمان كويسة فهي كل شويه تحكي مواقف عنه معاها فأنا كمان بدأت احكي وحكيت عن مواضوع الكاتينج وازاي هو وغيره من المدرسين ساعدوني وبعت صور لأدي المنوره من ايام الكاتينج فهيا بعتتها للمستر وبعتت اسكرينات للشات بتاعنا وراحت في المجموعة اللي هي بتحفظ فيها قرآن في الدار بتاعت ماما وورت للبنات الشات وللمعلمة كمان و اتكلمت عني بطريقه وحشه اوي وكلام زي اني بحب المستر وكده وكمان صورتي بقت وحشه خالص قدامه وقالت كلام مش حلو خالص لأن فكره كنا بنكرمه انا وشوية بنات ورحنا بيته قعدنا معاه ومع مامته ومكنتش لوحدي كنا مجموعه وهما اللي أصروا ندخل واحنا كنا عايزين نكرمه من على الباب ونمشي

اللي بيحفظ قران او خلص ممكن تقولوا طريقه الحفظ وتجاربكم وكدا انا كنت بحفظ زمان بس وقفت فتره وعاوزه ارجع تاني وخايفه لو رجعت اوقف واي الشيوخ اللي بتسمعولها وكدا بتجويد صح وقراءه صحيحه عشان الحفظ يثبت

مش عارفه ليه هنا في ناس بتكتب وتقوم قايله بس محدش ينصحني بالدين او حاجه زي كدا او لو جيت قلت لحد قرب لربنا يقلك ي عم الدين حاجه ودا حاجه وتلاقيهم مش عايزين يسمعوا ويقولو ايه علاقه الدين يعني ايه ايه علاقه الدين الدين دا الهويه بتاعتك والمنهج والخط المستقيم الي بنمشي عليه هو كل حاجه القران مكتوب فيه كل حاجه كل انواع المشاكل والحلول بتاعتها بحس والله ان الناس دي غريبه مش فاهمه وفي ناس بقي دي الي حبت انها تريح نفسها وتقلك انا مبقتش مسلم يا سلام بقي من غير دين امال بقيت بقي ولا حاجه الشخص من غير دين دا ولا حاجه وايه نوعيه المشاكل الي الناس بتكتبها دي انتم في الكوكب معانا ولا انتم ناس حقيقيه هي دي مشاكل مش بستخف بيها علي قد ما انا بقرف منها والي عليا اقوله ربنا يهديكم بجد مش عىرفه ليه الانسان بيكون عارف الغلط ويقول ياه دا غلط دا حلو اوي ويقرب منه وخلاص وحابب نفسه وشايف ان مفيش مشكلخ وكمان بيجهر بالمعصيه ويبين قد ايه المعصيه دي عاديه ربنا يهدي الجميع ويهدينا جميعا كلنا بنغلط ومش عيب اننا نغلط العيب اننا نستمر في الغلط ونكابر ومنتوبش

مخنوقه و متضايقه جدا من أسلوب مامتي دايما تقولي صلي التزمي في درس القرأن بتهديد مش نصح وانا فعلا بتضايق من التهديد و من جوايا بعاند اكتر المشكله ان هي بتقولي الصح بس بالاسلوب الغلط أسلوبها بيزعلني اوي كل شويه قومي صلي عشان مسحبش الموبايل و هكذاكب مره تقولي فيها حاجه زي كده هي تروح تكمل يومها عادي وانا ازعل و اروح اعيط كلنا عارفين أن دا الصح وانا اكيد مش هحب اكون في الغلط وانا بحاول من نفسي بس أسلوبها دايما بيرجعني مش بيقدمني

يا جماعه اتمنى حد هنا يكون متدين وفاهم ينصحني بالله عليكم انا غريبة اوي والله معرفش انا كويسة ولا لا في ديني المفروض اني وانا في سن صغير الي هو كنت شاطرة ديما فيه ورد من القرآن كان اربع صفحات وكنت بزود صفحتين كل سنة لحد ما وصل لتمن صفحات وكنت بحفظ كمان وبصلي الفرض والسنن هنا انا كنت شايفة نفسي محصلتش ولحد انهاردة والكلام ده قولوا من تلت سنين المفروض اني كملت على الحال ده ولكن السنه ديه بدات في حجات تضعف وتتحرك من مكانها ولكن الحمد لله انا ماسكة نفسي الي مزعلني ومدمر نفسيتي اني اكتشفت ان كل ده ولا حاجه يعني ايه يعني حتى افضل شيء عرفت اعمله كان ولا حاجه كان مجرد حجات المنتكس هو الي بيعملها امال انا ايه دلوقتي انا ولا حاجه انا نكرة كان عندي امل امل مين انا كنت من تلت او يومين واثقة ١٠٠/١٠٠ اني هدخل الفردوس الاعلى وشايفة ان مدام ربنا قال انا عند حسن ظن عبدي بي يبقى ربنا هيكرمني ويدخلني حتى وانا عاصية انا اتحجبت رغم رفض اهلي وانا في اولى ثانوي وللاسف انا حاليا داخلة تالته ومازلت بلبس الزفت البنطلون حقيقي انا بكرهه وبحاول حتى ولو هو واسع واللبس طويل زلكن لا انا مش مقتنعه انا اكتشفت اني بحالي ده مش هشم ريحة الجنه وللاسف عقليةما قادر يستوعب ومش قادر يعمل اي حاجه كل شيؤ صعب وكل خشوع بوصله بالعافية وده اعتقد من كتر ما دماغي مش سيباني في حالي مش عشان بعدي لاني في اكتر الاوقات انا كنت مقبلة على ربنا فيها مكنتش بحس بالخشوع الا مجرد ثواني حتى انا بدعي ربنا بيه طب هو ربنا حرمني منه ولا ده شيء طبيعي منا ممكن مكنش وصلت لحاجه وكل ده فعلا زي ما بقول ولا شيء ولكن هو مش المفروض الواحد لما يقبل لله ربنا يساعده اكتر مش فاكرة الحديث ولكن بما معناه اني لو رحت لربنا مشيا ربنا هيجيلي مهرولا انا مش عايزة اي نوع من التعاطف معايا انا مستهالوش انا بحمد ربنا الحمد لله بس انا عايزة اخش اافىدوس الاعلى ودي مش مجرد امنية انا مش هقدر استحمل ادخل الجنه وانا عارفة ان فيه مكان احسن وربنا بيحب ناس اكتر + انا مش هقدر اشوف نفسي ضعيفه اكتر من كده والكل احسن مني اصل شفت فديو لشيخ بيتكلم وبيحكي عن واحد انتكس وللاسف الي انتكس ده بيعمل احسن مني حرفيا كان بيقول بدل ما بيقرا جزئين بقى بيقرأ جزء او ربع (انا مبعرفش اقرا الكمية دي غير فرمضان وبالعافية عشان بقرا بهدوء وبركز) معرفش دي حجه ولا حقيقة بس انا ديما صحابي بيختموا بالتلت ختمات وانا واحدة بس عشان انا بقرا بالتجويد وهما لا وسعات انا بكرر وببحث عن الايات عامة انا بكره نفسي انا محتاجه اعذبها عشان هي قرفتني ومبتسمعش كلمة وانا عايزة اخش الفردوس الاعلى تقريبا دي اكتر مرة كتبت فيها وحقيقي لو حد قرا كل ده ربنا يرزقك بالفردوس الاعلى

بقالى فتره نفسى ارجع احفظ قرآن زى زمان فا ممكن اقتراحات لناس بتحفظ اون لاين نفسى ارجع زى زمان يمكن ده من اغبى القرارات او اغبى القرارات اللى اخدتها فى بدايه مراهقتى كان عند بين أهلى كانت اول حاجه امشى كلامى عليهم فيا حاولو بكل الطرق وانا عندت معاهم بس حاليا ندمانه جدا الحمدلله

انهارده نزلت بدري شويتين قبل الأذان بتلت ساعه المهم لما رحت المسجد لقيت واحد من صحابي بتوع زمان كان قاعد بيقرأ قرآن ف انا بيني وبين نفسي الصراحه فرحتله وافتخرت بيه جدا لان انا زمان كنت كويس ومحافظ علي الصلاه في الجامع اغلب الوقت ومحافظ علي ورد كل يوم من القرآن بس اتلميت علي ناس خلتني ابعد عن ربنا وحده وحده لحد ما فجأه بقى مفيش صلاه ولا قرآن واوقات بيبقى طول الاسبوع مفيش غير صلاة الجمعه المهم اني بقيت فرحان علشان صاحبي دا وفي نفس الوقت زعلان علي نفسي وفي نفسي حمد ربنا ان حصلت ظروف وبقيت مبقابلش الصاحب دا لما اتغير للوضع بتاع دلوقتي لاني كان ممكن اسحبه بالغلط ف ربنا يهدينا جميعا و صاحبي دا يختم القرآن بإذن الله

لو الانسان وصل لمرحله Burnout وحس انو فقد الشغف ف كل حاجه شعور ان كل حاجه تقيله عليا الصلاه قراءه القران والاذكار بقت حاسه انهم تقال جدا وده مخلى المذاكره مستحيله مش عارفه ازى ارجع وكل يوم ف حاله تسويف شديد

من وقت متغيرت ورجعت لربنا مره واحدة وبطلت حجات كتيره وحشه وانا ديما حاسس برضا وفرح بجد حتا لما بضيق بقراءة شوية من كتاب ربنا بنسي كل حاجة بجد هوا حل لكل مخنوق او تعبان اقراء من كتابو هتلاقي الحل جه وحدو بجد انا حرفيا كنت مروح حد قفل باب العربية علي ايدي بجد الطبيعي ان تحس بوجع او تكشف بجد حاسس ربنا وقف معايا ومش حاسي باي حاجة هوا بجد بيقف معانا بوست في حب ربنا ❤❤✨

كنت بحاول ابدأ صفحه جديدة ف حياتي وابقي البيست فيرچن مني وعرفت اعمل روتين حلو امشي عليه هو متعب اه بالنسبه لحد كان بيعدي ايام واسابيع ف اللا شئ بس كنت بحاول ومبسوطه بده بس بقالي كام يوم كل حاجه رجعت تعك تاني حاسه بخمول رهيب ومش هأڤور لو قولت بكسل اقوم اشرب بحاول اصلي الصلوات ف وقتها بس بجد بقوم من مكاني بعد معافرة كبيرة ورجعت تاني امسك الموبايل كتير وياريت حتي مبسوطه بده بالعكس النهاردة طول اليوم ي اما نايمه كدا وخلاص ي اما ماسكه الموبايل وبعيط مش مرتاحه وانا كدا وف نفس الوقت مش قادرة اعمل حاجه وحاسه ان كل حاجه تقيله ع قلبي وده مش وقت انهيارات وضياع خالص لان اليوم اللي هضيعه مش هعرف اعوضه تاني وهتضغط اكتر ف لو حد عنده حل او مر بالحاجه دي قبل كدا ياريت يفيدني وكمام كنت بحاول ابدأ احفظ قرآن ف لو حد يعرف يقولي ع بلان حلوة امشي بيها هكون شاكره

فضفضه واسف على الاطاله انا عملت حاجه النهارده متخيلتش اني ممكن اعملها وهي اني دخلت واحد صاحبي امام بدالي انا حلمي من وانا صغير اصلي امام بالناس مهما تقولي بقا هتشيل ذنب اللي وراك ولا اي حاجه كنت منشف دماغي وحلمي دا اتحقق يوم ٤/٤ السنادي اللي هو من شهر تقريبا يومها منمتش من الفرحه ومكنتش قادر اخد نفسي امام المسجد كان بيحبني جدا من وانا صغير حتى لما بيسلم عليا بيقولي يا حُذيفة على عكس كل الناس بتقولها بال ز بعد اليوم دا اتغير تماما مبقاش يسلم ويعمل نفسه مش شايفني حتى بعد الصلاه ابصله ميسلمش قولت براحته هعمل ايه بسلامه انا بس كنت عايز افهم ليه صاحبي اللي دخلته دا انا دخلته لسببين الأول اني سعات بحس اني مرائي وباخد الموضوع ناحية الرياء شوية والتاني اني شايف انه احق مني بالامامه هو راجل خاتم من زمان بقاله اكتر من ٥ سنين بعيدا عن التجويد انا لا افقه فيه واكيد عندي وعنده غلطات جيت في الصلاه في السجود بقول سبحان ربي الاعلي وبعدين جيت ادعي لقيتني اتخنقت واللي هو هحححح انا زعلان اوي على عمري اللي ضيعته دا من غير حاجه وحافظ من كل جزء حته وخلاص اللي هو كان ناقصني ايه وليه انا مش خاتم هحححح انا شايف اني بجد ابطل اروح المسجد دا الفجر عشان مدخلش وايا كان مين يدخل عشان انا بجد مستحقش الامامه دلوقتي ولما ابقا مؤهل اروح وبالمناسبة الشيخ بيغير من اللي الناس تحبه عشان كدا مش بيسلم عليا وعمل مشكله مع صاحبي دا ورجع صالحه وكمية حقد وغل بين شيوخ البلد عندي لا تطاق والله انا عايز اعيش في سلام كدا واحفظ واختم في هدوء والاجازه ابقا اخدها من شيخ برا البلد ولو برا المحافظه كلها المهم يكون كفؤ مش عارف بقا اقول ايه انا حبيت افضفض شوية لاني بجد مخنوق من موضوع عمري اللي ضيعته وبجد مستحقرني اوي

من خلال تجاربكم جميعا ممكن حد يقلي ازاي اقدر انسا شخص كنت بحبه وباعني عشان مش عارف انسا بمثل اني كويس بس عقلي من جوا محصور في كل حاجه عشناها ملحوظه بصلي وبقرأ قرءان ومش عايز ادخل في حاجه حرام عشان انسا

الموت بيسرق كل غالي والعُمر مش مضمون ولا معاه كارت نجاه من الحساب اتخلقنا وجينا نحوش للحياه هناك مجيناش علشان نعمر الأرض هنا ونسقيها وندمر الآخره ضمنا ٥٠ ولا ١٠٠ سنه في الأرض وعمرناها مُتع وزينه وشهوات وسيبنا الآخره اللي العمر فيها ملوش مقياس ولا ليه عدد نِسينا إن زي ما ربنا غفور رحيم وفي درجات جنه عقابو عظيم وفي برضو درجات نار نسينا أن الإسلام دا إتولد غريب وهيرجع غريب بقينا نسمع الخُطب والشيوخ وقلوبنا مش سليمه ومش متأثره بوظنا قلوبنا بحلاوه الدنيا وشهواتها المحدوده علشان نِسعِد نفسنا كام ساعه رمينا قلوبنا وبيوتنا وأولادنا للموبايل والنت والبرامج المدعومة من الأجانب واليهود خلينا الدنيا بدل ما كانت ارض خير وعمار نبني بيه علشان توصل لأعلي درجات الجنه لمكان مليان خوف وفوضي وقلق نسينا أن الاغاني والتريندات هتبقي صُحبه سيئه ورفيق سئ في القبر نسينا إن القرآن دا مش مقرون بشهر رمضان ولا عشر من ذي الحجه دا رفيق الرِحله في الدنيا وجليس القبر عند الموت نسينا أن ال٣ أسئله بتوع من ربك وما دينك ومن نبيك مش هتعرف نقولهم غير لما قلوبنا تكون متعلقه بالله في الدنيا وبتردد ذكرو علشان نعرف نرددها عند السؤال في القبر نسينا أن الحياه بزحمتها ودوشتها متجيش عند ربنا جناح بعوضه واحنا اللي اشتريناها وبعينا الآخره بالرخيص نسينا كتير اوي نسينا كل حاجه وبقينا ماشين زي الغنم ورا اي تريند ولا اغنيه ولا موضه وتركنا الهدف والغَاية من وجودنا هنا اي نسينا أننا مسلمين والنبي عاش عمرو كلو يدعو الناس للإسلام علشان يوصلنا دلوقتي علي طبق من دهب ورميناه وبناكل في التراب نسينا أننا مسلمين بجد

هوا كوني اتغيرت مره واحدة وبقيت اعرف ربنا وقريب منو وبصلي وبقرا فكتابو ده طبيعي انا حقيقي مستغربيني وحتا امي بتقولي خايفة عليك بجد انت اتغيرت من ضلمه لنور وبتعيط وقلبها حاسس بحاجه هتحصلي بس انا بجد عندي نفس الشعور ان ربنا بيندهلي اتوب عشان خلاص عاوزني انا مش زعلان بلعكس بس امي متعلقة بيا جدا

حقيقي فعلا بعض الناس مبقتش بتفهم خالص يا جماعه خلي بالكم من كلامكم الكلمه ممكن تعمل حاجات كتير اووي انا شخص ربنا كان منعم عليا كنت بصلي ويقيم الليل وبصوم وبقرء قرآن للاسف دلوقتي بقيت بصلي الفروض بالعافيه دا عقاب عارف بحاول اتوب لربنا لي بقا مشغل فيديو لشيخ عن الدنيا والدين شخص داخل وسمع الفيديو ضحك ضحكه كلنا عارفينها وبيوقلي انسي ترجع بتاع زمان ليه تقول كده لحد انتا متعرفش هوا بيمر بإي وبيجاهد في نفسه إزاي انتا مش مدرك كلمتك دي ممكن تعمل فيه اي ممكن تخليه اسوء من الاول ف يا جماعه بلاش نجرح بعض يا تقول خير يا بلاش

انا كان عندي مشكله مع الاغاني واني مش عارف ابطلها لكن لما سمعت اصوات الشيوخ دول بدأت ابعد عنهم (الاغاني) و بما ان الناس هنا ممكن تكون مبتسمعش قرآن و مقصره ممكن اي حد يرشح صوت شيخ هو بيفضله او بيرتاح معاه

من يومين بدأت اعمل حاجه كويسه انا تقريبا مفيش توفيق فحياتي بس قررت اقرب شويه واحده واحده من ربنا مكنتش بقرأ قران والحمدلله ربنا هداني كنت بحس بضيق شويه بس الحمدلله بدأت اسمع واقرا زي زمان كمان الصلاه بصلي الحمدلله بس بأخرها شويه لحد قبل الاذان التاني بشويه يعني بس بحاول معملش كده بس دلوقتي مبسوطه شويه اني بعمل حاجه كويسه وربنا هداني ممكن تبداو تقرأوا ايه بس أو تسمعوا كمان ادعوا بالهدي حبيت اشارك إنجاز بجد حلو جربوا نفسيتكم هتكون احسن ❤️

وأنت بتدعي بلاش تتقشف .. - واحد صاحبي قعد يدعي ويقول يارب انا عايز شقة واتجوز وعربية أي عربية وخلاص ومش عايز حاجة تانيه .. بيقولي ربنا فتح عليا لحد ما جت ال 3 حاجات دي وبعدها كأن حنفية واتقفلت !! • واحدة قعدت سنين مش بتخلف راحت عند الكعبة وقالت يارب انا عايزه أي عيل حتى لو مشوه .. حملت فعلا ولما ولدت طلعت الطفل عنده عيوب خلقية وداخت بيه على المستشفيات وانت بتدعي بلاش تتقشف !! يعني مثلا انك تقول يارب ارزقني بعربية ولو حتى بباب واحد او انك تقول يارب ارزقني بأي شغل وخلاص .. سيدنا يوسف قال : {قَالَ رَبِّ السِّجْنُ أَحَبُّ إِلَيَّ مِمَّا يَدْعُونَنِي إِلَيْهِ}. يقول ابن كثير رحمه الله.. يوسف عليه السلام دعا الله أن يسجن فاستجاب له الله و سجن .. ولو أنه قال ربي العافية و النجاة أحب إلي لعوفي ونجا وانس المنطق وانت بتدعي !! يعني ايه ؟؟ يعني تدعي ربنا بكل اللي نفسك فيه وماتشغلش بالك ازاي الدعوة دي هتتحقق !! سيدنا زكريا دعى ربنا انه يرزقه بالولد مع ان سنة كان كبير قوي وزوجته مش بتخلف بس ربنا ﷻ قال ساعتها "هُوَ عَلَيَّ هَيِّن" .. وبرضوا سيدنا ابراهيم ساب اهله "بِوَادٍ غَيْر ذِي زَرْع" بس لما جه يدعي قال {وَارْزُقْهُمْ مِنْ الثَّمَرَات} وبعدين وانت بتدعي خليك طماع .. اسأل كتير وادعي باكتر من اللي نفسك فيه .. النبي (ﷺ) بيقول {إذا تمنى أحدكم فليستكثر، فإنما يسأل ربه } .. سيدنا موسى طلب من ربنا ﷻ 7 حاجات مرة واحدة وكان الرد ساعتها: {قَالَ قَدْ أُوتِيتَ سُؤْلَكَ يَا مُوسَىٰ}. وادعي ربنا بكل حاجه مهما كانت صغيره .. ورد في الأثر: أن موسى عليه السلام قال : يا رب ! إنه ليعرض لي الحاجة من الدنيا فأستحي أن أسألك . قال الله ﷻ : سلني حتى ملح عجينك وعلف حمارك. ولو عايز تعرف يعني ايه حسن الظن بالله !! شوف دعوة سيدنا سليمان يُفتن ويستغفر وفي نفس الدعوة يسأل ربنا مُلكاً لا ينبغي لأحد من بعده قال تعالى: {وَلَقَدْ فَتَنَّا سُلَيْمَانَ وَأَلْقَيْنَا عَلَى كُرْسِيِّهِ جَسَدًا ثُمَّ أَنَابَ قَالَ رَبِّ اغْفِرْ لِي وَهَبْ لِي مُلْكًا لّا يَنبَغِي لِأَحَدٍ مِّنْ بَعْدِي إِنَّكَ أَنتَ الْوَهَّابُ} سيدنا عمر بيقول ( أنا لا أحمل هم الإجابة ولكن أحمل هم الدعاء) وخليك متآكد وانت بتدعي ان الله هو القريب ، المجيب ، الرزاق ، الوهاب .

فكرة انك فاشله ده احساس صعب اووووي اووووي ومخيف اني صحابي كلهم ببتخرجو وانا لا دي اصعب واصعب ليا سنه مش قادره اتخطي الموقف ده مش قادره اتاقلم مصدومه من كل حاجه زعلانه ع كل حاجه ندمانه تعبانه من كل حاجه كل حياتي غلط ف غلط الحمدلله وكل حاجع بس مش قادره اتخطا المفروض اني نتيجه الترم الاول ظهرت من زمان اووي بس خايفه اجيبها متوتره وعايزه اعرف ايه النتيجه وفي نفس الوقت خايفه والخوف ماثر عليا اوووووي عندي قران الاسبوع اللي جاي وده كمبيوتر مرعبه منه متوتره جدا جدا مش عارفه احفظ مش عارفه اراجع كمان ماحدث يقولي هدي التوتر لاني مش عارفه اعمل ده مضيعه نفسك قبل كده بفضله لكن برضو مش حاجه اكون حد.عادي مش عارفه اثق مافيش حد يخليني اني اثق طيب اهلك لا برضو صحابك لا مافيش والله مافي 😭😭 ادعولي طمنوني

عايز اروح حفلة بابلو من ورا اهلي انا من طنطا واشتريت التيكت وهروح مع صاحبي في اسكندرية وكليتي في اسيوط ١٢ ساعه سفر وهضيع امتحان ميد السبت+ ده من الفلوس اللي بيصرفوا بيها عليا+خايف يعرفوا حاجة زي كدا وابقى خنت ثفتهم +وفي نفس الوقت الحفلة ده بالذات مش هتتكرر عارف ان الاغاني حرام بالمناسبة انا حافظ لكتاب الله 🙂

التغيير ممكن نتغير ازاي يعني الانسان لما بيحب حد مش عرفه يعمل علشان اي ويجي يخدعو صدمه هنا يعمل اي هنا لاتغيير صح انا والله مش عارف اعمل اي ﴿آمَنَ الرَّسولُ بِما أُنزِلَ إِلَيهِ مِن رَبِّهِ وَالمُؤمِنونَ كُلٌّ امن

مساء الخير دلوقتي انا ابني كل يوم بيصحي من النوم بليل مخضوض هو عنده سنة بس مش عارفة ماله بقاله ٤ ايام كدا بيقوم فعلا مخضوض ويقعد يعيط ويصوت ومش بيسكت بسهولة خالص مش عارفة اعمل اي او اي الحل ممكن تفيدوني ماما قالتلي اقريله قرآن وشغليله الرقية فالبيت بعمل كدا وبرضو لسة زي ماهو

فيه شخص ٢٤ ساعه بفكر فيه كنا مرتبطين وسيبنا بعض بطريقه وحسه جدا وهو اللي تركني عاوزه ابطل تفكير انا تعبت بقالي شهر ونص مش ببطل عياط ومش عارفه افكر غير في الموضوع ده كرهت الدنيا والناس وتعبت من نفسي حتي لغاية ما بقيت بتمني الموت محافظه علي صلاتي واذكاري وورد القرآن

انا متجوزة من ٣ سنين لسه معنديش اطفال عندى ٢٧ سنة وحاسة ان حياتى فاضية جدا حتى علاقتى بجوزى بقيت بحس بملل من ناحيته وناحيتى عايزة اشتغل او اعمل اى حاجة تغير حياتى ف حاجة كمان انا كل ماابدا فى حاجة مش بعرف اكملها يعنى مثلا نزلت دار لحفظ القرآن وكنت مبسوطة جدا وبدات احفظ فجاة مش قادرة اروح ودايما فى كسل رهيب حتى الصلاة للاسف ساعات مش بصليها

افتكرت حاجة وانا قاعدة بعيط جامد وحاسة انى مش كويسة خالص لدرجة حاسة بتعب جسدى حقيقى ومش بعرف انام المهم سمعت قرآن بعد انقطاع طويل وحطيت السماعات فى ودانى وبعدين افتكرت حاجه عشوائية افتكرت فى الافراح لما العريس والعروسة أول مرة بيحضنوا بعض بعد كتب الكتاب وكده تقريبا الحوار جه فى بالى لانى اغلب الوقت لوحدى ودايما بنعزل واعيط لوحدى (محدش يسأل اى علاقته) ف .. افتكرت مرة لما كنا فى فرح وشوفت المشهد ده لأول مرة وكانت جدتى جنبى كانت بتبص عليهم وفجأة قالت والوقتى يحضنوا بعض كانت بتوصف المشهد عادى بإبتسامة دافية خفيفة لما بصتلها حسيتها كأنها بتفتكر ذكريات وعينيها بتلمع وافتكرت جدى الله يرحمه لما افتكرت الموقف ده الوقتى حسيت أنه ياااه هل هى كانت متخيلة انه كل ده هيعدى كل حاجة خلاص بتعدى عادى كلها ذكريات وده خلانى استشعر اكتر إن كل مرة تشيل فى قلبك هموم الدنيا حزنك يزيد اه الموضوع صعب لكن هيجى يوم وتستغرب إنه يااه بقينا فى آخر المحطة عشان كده حاولوا تاخدوا حاجات كتير ببساطة وهونوا على نفسكم . الحزن جزء من الحياة بس متخليش الهم ينهش روحكم ودى نصيحة لنفسى بجد قبل ما اكتبها واتمنى اقدر اعملها ( بالمناسبة السور اللى سمعتها عشان لو حد حابب يسمع .. طه بصوت شريف مصطفى .. سورة مريم .. وسمعت المنشاوى فيديو بعنوان "وآتاكم من كل ما سألتموه" )

شباب انا ولد بس هو انا مش بعرف اعمل مصالح البيت من ترتيب او عسيل او زي كدا يعني غير لما ابقا مشغل حاجه علي اللاب بصوت عالي قرأن مثلا او اناشيد حماسيه او ما شابه بحس بنشاط كدا وبخلص كل المصالح لاني قاعد وحدي وبكسل اقوم اعمل المصالح دي بحس بملل هل دا طبيعي هل في حد زي كدا وبتشغلو اي وانتو بتعملو المصالح

الاكتئاب اللي بعد رمضان طلع اقوي من الاكتئاب اللي بعد الحمل فعلا 🙂 اول رمضان احس فيه اني مش متقبل فكرة انو عدي كدا بالسهوله والسرعه دي بعد ما البيت كان هادي وكل شخص فينا مسحول في عبادته ودنيته رجعنا للايام الطبيعيه المقرفه كل واحد ينزل شغله ويرجع مضغوط ويزعق ويطلع عصبيته علي غيره البيت بقا كلو خناقات وزعيق ديما وكمان شخصيتنا التانيه المختلفه اللي مش عارفه تتحكم في ذنبها مع وجود الشيطان كمان عامله شغل عالي وعشان عايزه استمر ولو حاجه بسيطه بقرأ قرآن مثلا وكإن حد بيشدني كدا لورا وخنقه وكإني مش عايزه اعمل كدا بس مضطره اعمل كدا حد فاهم حاجه !!؟ حاسه ان الحياه من غير رمضان موحشه جدا وحاسه اني بقيت عايشه ف غابه اول مره احس الاحساس دا ف حياتي بجد

انا الاكونت بتاعي restricted فمش عارفة ارد عليكم بس انا للاسف لاقيت ان من اكبر المشاكل اللي بنواجهها اننا فعلا مش عارفين ديننا و الدين مادة برا المجموع فأنا كنت عايزة اتعلم اكثر فلو ممكن تثولولي اعمل ايه و امشي ازاي علشان اتعلم في كله زي الفقه و العقيدة و الاحاديث و تفسير القرآن و السيرة النبوية و كل ده وبجد يا جماعة ديه حاجات مهمة لازم كلنا نتعلمها لان لما نتحوز لما يكون الاهل مش عارفين كل ده اولادنا هيعانوا و هيغلطوا لانهم مش عارفين لان نعرف بنعمل كذا ليه و نفهم اكثر تعاليم الله و الرسول صلى الله عليه و سلم

ادعولي يا جماعة عندي امتحان كمان ساعة و لسة مش عارفة حاجة يعتبر و نفسبتي بجد مش كويسة خالص و شكرا للناس اللي قعدوا ياكلموا معايا امبارح و شكرا للي تنحوا عليا بردو انا مش ببرر لكن انتوا مش عارفين الواحد بيمر بإيه او حاسس بإيه انا عارفة اني غلط بس بجد بحاول اكون كويسة و اكون احسن و ارجع تاني حتي و انا بعمل حاجة غلط وانا عارفة حتي بحاول ادعي و اصلي زيادة او اقرأ قرآن بس مش دايما بقدر بجد بقيت مش قادره اعمل اي حاجة ولا مذاكرة ولا ارجع تاني اقرب لربنا ولا اخشع في الصلاة و بيتم استغلالي وانا عارفة سواء من الناس او نفسي انا بستغل نفسي و بستنزف نفسي و ببوظ نفسي بس ان شاء الله هرجع

هو الإنسان ازاي يرجع زي الاول بعد حاجات كتير اووي اتكسرت فيه .. مابقتش عارفة اثق في اى حد فى الحياة حتى اللى من دمي مابقتش اثق فى نفسي اصلا و بقيت متجمدة مش حاسة باى حاجه خالص يمكن الحاجة الوحيدة اللى للأسف لسة شغالة جوايا شوية اما بقعد مع اطفال بحس اني خايفة انهم يبقوا زيي فبكتم اي شعور وحش و بتعامل معاهم باللى كان نفسي يحصل معايا بعمل لهم لعب و مفاجآت و اعلمهم حاجات اتمنيت اتعلمها من حد بسمعهم حتى او هيحكولى كارتون اتفرجوا عليه عشان مايجربوش شعور ان صوتهم مش مهم زي ما كان بيحصل معايا و مازال غير كدة مافيش شعور بحسه تجاه اى حد فى الحياة و ده مخوفني من نفسي ماعرفش ده جحود ولا اخترت ده عشان ماتوجعش من حاجة تانيه و عمالة اقول لاى حاجة وحشة عادي و مش مهم و طظ بس اللى عارفاه كويس اني مش تمام و نفسي ارجع كويسة تاني ان شاء الله حتى ابقا كويسة فى حاجة واحدة جانب واحد بس يبقا كويس فى حياتي مش طالبة اكتر من كدة و الله مش من حق الانسان يبقا حاسس بامان فى حاجة واحدة بس فى حياته !؟ حاجة واحدة تطمنه مش اكتر ملجأ واحد يهرب له من مفرمة الدنيا !! اه بصلي و بقرأ قرآن بس محتاجا احس بحياة طبيعية فيها ناس كويسين حد مش لازم ناس كتير فيها حاجة بيسعى لها نجاح واحد يفضل اثر ليه فى الدنيا 😞 سوري لو طولت عليكم 😞

أعمل اي لو كنت مرتبط بواحده لما كنت صغير عندي 18 سنه و دلوقتي في تالته جامعه و سنينا بعض من تلت سنين اصلا و لحد دلوقتي مش عارف اتعايش حاسس بفراغ مفيش حد اتكلم معاه نفسي اتكلم مع حد احكيله كل حاجة المهم مكلمش البنت الي كنت معاها عشانه حرفيا معناديش الجرأه اني اكلمها و اقولها كل الي جوايا بعد أعمل أي حاسس بفراغ كبير جدا و مش قادر اتعايش و الحمد لله قريب من ربنا و كل فروضي في الجامع و مهتم بقراءة القرءان و جامعتي ماشي فيها أعمل أي جدا

عوض فقدان أي شيء أو شخص بذكر الله مش مجرد ذكر بلسانك وخلاص ليه ؟ لأن الله خير وأبقى من أي شيء احنا بس عشان منعرفوش كويس بيتسلل الحزن واليأس لقلوبنا وبقدر جهلنا بقدر ما بيسيطر علينا الحزن اشغل قلبك وفكرك بيه لما الشيطان يحاول يخوفك من مستقبل أو يندمك على ماضي انت مش وحيد ولا محتاج مخلوق تشكيله انت ممكن تتكلم مع الله وتشكيله وتسأله كأنك تراه و ممكن كمان تقرأ كلامه من القرآن لو قلبك بيطير برسالة من شخصك المفضل أو بيحزن من جفوته طب وكلام الله ايه وقعه على قلبك وشوقك ليه و تفاعلك معاه ؟

حاسس الفتره دي بكمية لخبطه وضغوطات رهيييبه عدم نوم وتوهان وكركبة افكار ومع ذلك ومع كل دا حاسس ان دي هتبقا احسن فتره في حياتي لما ارجع افتكرها أي نعم انا دلوقتي بعاني من الترتيب بسبب انه شغل ودراسه وعايز اصرف على نفسي وعايز اعمل مصدر دخل + دراستي اللي عايز اطورها +عايز ارجع احفظ قرءان حاجات كتيييير اوي بس حاسس ان في الاخر هنتج ثمار الضغط دا حاجه كويسه ف اللهم عوضك يارب