نقاب

افتكرت حاجة تستحق الاعتراف.. من فترة كنت هنا و كنت بنزل بوستات كتير ان ازاى هلبس النقاب و ازاى اقنع أهلى و اعمل اى و كل ده.. بس حاليا أنا حابة أقول انى لبسته فعلا من فترة، و ان لبسه مش بيجي بتخطيط هى بتيجي فجأة كده، و ممكن ربنا يكرمك ب ان اللى خططتى له يحصل و تلبسيه برضو عادى، الخطوة مكنتش سهلة و بسيطة زى ما كنت متخيلة ونا صغيرة بالعكس كانت صعبة جدا، و الأصعب لما ميكنش في و لو شخص واحد داعم ليكِ حتى من اقرب الناس ليكِ، مستنتش رضا أهلى عليه و ليسته و اتحملت أيام مش بتعدى غير بالدموع ليل و نهار و انتِ حاسة ان اقرب الناس ليكِ مش قابلين الفكرة و يعلقوا كل اخطائك بالنقاب و يحبطوكِ ان شوية و هتخعليه لما الحر يجي مش هتستحملى و اه بقي لما يكون عندك جيوب انفية ف يمسكوا الجانب ده و يفضلوا يهدوا فيكِ، بس أنا جاية أقول ان الحمد لله ربنا استجاب و لبسته، عقبال اللى عاوز يلبسه ربنا يمن عليكِ به في عفو و عافية 🌼🌼

انا عمري ما عرفت اقول لاهلي لا على حاجه و هم دايما نفسهم اكون انا و اخواتي اتقياء في الدنيا و احسن حد في الدنيا و قرييبين من ربنا بس انا مش فهمه هو ايه المغزى عندهم انهم يرفضوا استايل لبسي الي انا نفسي البسه معرفش ليه مع انه حلو اوي انا كنت عرضت على ماما من شهر ثمانية الي فات و لمحت ليها عن اني بحب النقاب اوي و نفسي اجرب البسه و بتاع المهم بعدها بشهر فضلت اتكلم عنه و قولتلها كذا مره تقول لبابا و كنت متوقعة ان بابا هيوافق لقيته رفض و رفض اكتر من ماما و كلامهم معجبنيش ابدا المهم قولتلهم ماشي و ريحتهم و هم لحد دلوقتي فاهمين اني اقتنعت برايهم لكن انا مقتنعش بي ولا واحد في المية حتى و نفسي يسيبوني لرغبتي و الموضوع داخل دماغي اوي و مأثر فيا جدا و حاسه اني مش هعرف اوصل للي انا عايزاه و في مية حاجز قدامي عشان اقنعهم انا دلوقتي حاسه ان اهلي عقبة بالنسبة ليا مع ان اهلي مش مقفلين ابدا في اي حاجه و بيسيبوا ليا انا و اخواتي حرية الراي مش فهمه ليه بقى عند دي و وقفت انا الموضوع مضايقني اوي انا كل ما افتكر اضايق و قد ايه حاسه ان الموضوع صعب اقعد اعيط ان مفيش ملجأ دلوقتي خالص غير لربنا و والله اعلم هلبسه امتى انا لما اتكلمت معاهم عليه كنت تميت ال ١٦ و حاليا قربت على ال 17 و الموضوع مضايقني اوي اوي بغباء مش عارفه اعمل ايه بقى نفسي البسه نفسي والله نفسي

بقالي فتره بفكر اقلع النقاب ومش عارفه اعمل ايه مبقاش عندي ثقه ف نفسي من كتر التعليقات وف نفس الوقت خلاص اتخنقت ومش قادره ده غير اني محبطه بسبب حاجات تانيه ف خايفه اتسرع وف نفس الوقت خايفه اكمل