هل لو انتم بتتعرضوا لمشاكل معينة ف حياتكم، شايفين ايه مواصفات الحياة المثالية ليكم، حياة كده تتحقق فيها كل امانيكم، هتكون عاملة ازاي؟ وهل انتوا شايفين ان لو ده حصل، هتبقى حياتكم احسن فعلا؟ سويسرا مثلا، متصنفة عالميا ع انها اكتر بلد فيه سعادة، وبرضو اكتر بلد فيه معدلات انتحار (ده على حسب تقرير قرأته من سنتين، يمكن الوضع اتحدث، بس البوينت هنا ف الفكرة العامة).. احيانا بيكون الفراغ وتوفر كل حاجة معاك بتسببلك فقدان شغف تام في الحياة، فعليا مش بيكون عندك هدف.. شايفين ان انتو هتكونوا كده، ولا هتتعاملوا ازاي؟ هبدأ بنفسي، انا شخصيا عايزة بيت من الخشب كله، يكون ف حتة فيها اشجار وزرع كتير وشبه نائية عشان مش بحب الزحمة.. امليه زرع بقى، وخصوصا نعناع وليمون وورود، ويكون فيه أوضة مكتب مخصصة بس للقراءة او الاستماع للموسيقى، واشغل قرآن فيه بصوت عالي او لو عايزة اسمع سيمفونيات مثلا. بس برضو مش عايزة حياتي تخلو من المشاكل تماما؛ ده هيخليني بلا هدف، وحياتي كلها حرفيا هتكون بلا معنى..
