إرهاق عاطفي

بقالي كتير يمكن سنه او اكتر مش بحكي الاحداث اللي بتحصل معايا مبقتش قريب من صحابي زي زمان بمعني مبقتش عارف احكي حاجه زي زمان حصلت حاجات كتير كان اللي بيهونها اني بحكيها لصحابي يمكن الفتره دي اللي بقالها كتير بقيت منطفي مش زي الاول حاسس اني محتاج احكي كل حاجه وفي نفس الوقت معنديش طاقه حاسس محتاج اكون لوحدي في مكان ضلمة ومحدش شايفني لاكن سامعة وسامعني واتكلم كتير واقول كل حاجه ويرد ردود ترضيني مش الردود اللي بتتكرر علي طول واكنها ردود محفوظه واول ما الدنيا تنور يكون اختفي بكل اللي سمعه

دوري كان دايما therapist friend الشخص اللي بيسمع الكل وبيحاول يحل مشاكلهم ويواسيهم وبيدي طاقة كويسة للي حواليه. لاحظت اني برضو بدي mommy attitude للي حواليا بمعنى اني اراعيهم كأني امهم لدرجة صحابي ساعات كانوا بيقولوا لي ماما من كتر ما انا بقوم الدور دا. الدور اللي محدش طلبه ولا حد عاملني بنفس الاسلوب، الموضوع بقى اني لما بنسحب شوية أو ببطل ادي نفس الطاقة واسكت لظروف بتحصل معايا مش بلاقيهم بعدها وبطلع انا اللي مؤذية وأنانية

يعني ايه ونس.. كلمة كتير كنت بحاول ادور عليها و احس طعمها بجد.. كتير دورت على واحده تكون شبهي.. على الاقل تكون متفهمه او بتعرف تسمع.. بس لا لاقي.. و لا بقى عندي طاقة اصلا.. حاسس اني مستنفذ.. و مهما قلت.. ببقى مش عايز احس اني اللي بيكلمني عشان متعاطف.. انا نفسي اتحب زي مانا.. نفسي اللي تشوفني.. تحبني زي مانا.. و مش بفرض نفسي علسها بطباع او أسلوب.. بالعكس.. انا متفاهم و مستمع كويس و هادي.. بس بحس ان مفيش اللي قادره تصبر و تسمع و تحسسني انها ونس بجد.. و بدأت احس اني خلاص فاقد الشغف و ان يبقى في حد في حياتي..

من حوالي سنة اتعرفت على شخص هو اصغر مني سناً ف اتعرفت عليه و نيتي اني اساعده عشان يكون شخص احسن و هو كان عنده مشاكل عاطفية و دراسية و ساعدته ف حلها او في تخطي نقط معينة و من يومها و هو اتعلق بيا اوي و انا متعلقتش بيه و لو اختفيت يوم ولا يومين يقلق عليا و يبعتلي انا مش عايزه ازعله ولا اوجعه بس حرفيا هو دلوقتي بقا شخص غير مريح ابدا و علطول ناقم و علطول بيشتكي و زعلان و كل م اكلمه اتشحن طاقة سلبية بسببه و انا مش قادره على ده بجد انا عندي مشاكلي و حياتي كفايه اللي فيها ساعدوني المفروض اتصرف ازاي

انا تعبت من كتر ما انا باجي على نفسي علشان مخسرش ال قدامي من كتر ما متاحة ومش بعرف اقول لا وعارفة كل الكلام بتاع قولي لا قدري نفسك وانتي ليكي حياتك وليكي دنيتك وكل ده بس حتى لو اتشجعت مثلا واخدت موقف وكده واني لا مش دايما متاحة برجع اعتذر انا مش قادره افهمني+ حاسه انه جو شخصية ضعيفة ودي مش انا بجد ومش فاهمة في ايه

هو ليه اغلب الوقت بكون انا ببقي الطرف اللي بيتمسك اكتر و اللي اقصي ما عنده علشان احافظ علي اللي معايا رغم اني مش بلاقي المحاولات دي ليه بجد لحد ما حقيقي بقيت احس ان العيب فيا