برجع ابص لبعض الحاجات القديمة بحس اني بتوجع اوي منها فعلا، انا مش شخص بيزعل ومش معترف أبدا بكلمة الزعل دي، أي مشاعر سلبية تتعلق بالحزن بحولها لشكل آخر وطبعا كلها أشكال سلبية يعني ف عادي مش عارف بس مبقتش عارف نفسي، عارف لما تبقى عايش في حالة كإن انت بتتفرج على على نفسك من ورا ازاز، بتعمل حاجات انت مش حاسس بيها ومش فاهم ايه اللي وصلك لهنا وحاجات تانية انت منكر ليها وبشدة ومتناقض في كل حاجة هنا شكل وهنا شكل تاني ف يجي السؤال بقا، قبل ما يحطوك ورا لوح الازاز دة ك متفرج انت كنت متحكم بناءً على ايه؟ امتى كنت عارف نفسك فعلا وعندك إحساس انك سايق حياتك صح، جاوبني مظبوط هي دي الإجابة، بس هل انت كنت سايق حياتك صح بسبب الحاجة دي؟ ولا تصادف وجود الحاجة دي في حياتك مع فترة استقرار نفسي ليك وبعد خروج الشيء دة من حياتك انت دخلت في دوامة والاتنين ملهمش تأثير على بعض؟ ولا دي كانت حاجة ماسكاك ورابطاك وبتحميك من التشتت وقادرة ان يكون ليها تأثير إيجابي عليك؟ انا مش مقتنع عامةً ساعات مخك بيلعب عليك لعبة وحشة اوي، يقولك بص شوف هناك كنت فلة شمعة منورة ازاي وهنا بقيت كدة ازاي، يخسارة طب ليه تعالى نشوف كان في ايه زمان بقا بس ممكن مخك يبقى عنده حق في النقطة دي😃، أصل بص يا عزيزي خلينا متفقين ان دة فعلا كان حقيقي من كل الجوانب الإيجابية اللي كان بيشتغل لك فيها، لكن هل هو كان بيمنع عنك الجوانب السلبية؟ لا النقطة دي بقااا يا عزيزي متعلقة بيك انت نفسك مش الحتة دي الموضوع كله انت محتاج تفهم ميتين أم الهوية دي رايحة بيك على فين، لإنك ربطتها بطريقة غلط من الأول ف هتيجي دلوقتي تدور عليها مش هتلاقيها امتى هتحس انك رابطها صح؟ مش عارف بس هتحس بعدها بفترة لما تلاقي كل حاجة في حياتك بتنهار بسبب انك غيرت فيها ولو 1% الربطة دي كدة كدة دايما بتيجي وأي حد يعرف يعملها بس مش كله هيعرف يعملها بالطريقة الصح المطلوب مني اني أصلح كل دة في خلال شهرين بالكتير، مش هينفع أبدا اكمل الفترة الجاية كدة معتقدش ان حد فاهم حاجة من كلامي، بس بحاول افهم المفروض اعمل ايه بس مش مستني إجابة برضو