بصي كان فيه حد هنا ف الكومنتس قال انه لو زعل طبيعي عشان انتي بس مش مشاركاها فرحتها ده عادي، انما لو زعل منك انتي شخصيا يبقى البنت دي مش تمام اصلا، وانا متفقة معاه جدا بصراحة. ف بصي، في الحالتين انتي مستفيدة؛ لو زعلت زعل عادي يبقى انتوا محصلش بينكم اي حلجة وحافظتي على صحبتك، اما لو هي زعلت منك بجد والجو ده ف انتي عرفتيها على حقيقتها والمفروض تبعدي. هي لو طيبة وخايفة عليكي وعارفة ظروفك صدقيني بجد هتمنعك تعملي الحركة دي وتكذبي على اهلك بجد، دي هتهزأك اصلا، فاا كلميها كده وشوفي، وفي الحالتين اياكي تروحي، انتي ولا ضامناها ولا ضامنة اخوها ولا ضامنة صحابه، دول ممكن يتلموا عليكي يهددوكي اصلا وينهوا مستقبلك حرفيا، ف انسي الحوار ده شيليه من دماغك بجد.

اوعي تروحي بجد. صدقيني اي حاجة بتتعمل من ورا الاهل غلط بتكون نهايتها مش حلوة.. وانا متأكدة ان رضا صحبتك دلوقتي حالا مش اهم من رضا باباكي ومامتك لآخر العمر.. الموقف ده حرفيا هيدمر ثقتهم فيكي.

الامان اهم من الفرحة وهي لو بتحبك بجد هتخاف عليكي وعلى زعل أهلك ماتعمليش حاجة ضد أصلك لا لا لا

..

بلاش تروحي أفضل ، اتناقشي مع صحبتك واشرحلها أسبابك بالتفصيل وانك قد ايه حاولتي بس الموضوع مش نافع، وادعي لو خير هتلاقي السبل فجأة اتيسرت و روحتي ولو مش خير يبقى الافضل انك متروحيش

بصي من كلامك واضح إنك حاولتي تعملي اللي عليكي ومقصرتيش طالما الموضوع خارج عن إرادتك والمواصلات وأهلك مش موافقين فمتحسيش بالذنب كلمي صاحبتك بصراحة وقولي لها إنك كنتي نفسك تكوني معاها في يومها، لكن الظروف منعتك. ولو هي صاحبتك بجد هتقدر ده ومش هتزعل منك عشان حاجة مش بإيدك. أهم حاجة متضغطيش على نفسك أكتر من كده