حد يفيدنى يا اخواتى عشان أنا تعبت من البنى آدم ده من حوالى شهر ونص حملت app ليه علاقه بالزواج والتعارف للزواج وكده وهو app اسلامى ومعروف وانا حملته كانوع من الفضول وفى نفس الوقت قولت يمكن يكون نصيبى فى ال app وكده وخصوصا ان انا اصلا كل اللى بيتقدمولى أو معجبين بيا انا مش ببقى بكون متقبلاهم أو معجبه بيهم مع انهم بيبقوا ناس محترمه ومش بيلفوا ويدوروا والناس اللى ببقى مستلطفاهم شويه وبنكلم عادى ويكلمنى كا فكرة ان احنا صحاب واخوات وزمايل وانا معاكى لو حصلك اى حاجه وافتكر أنه مثلا معجب بيا أو حاجه ويطلع بيتسلى ولما اواجهه أقوله احنا ايه يقولى احنا صحاب وزمايل عادى ويروح مختفى وعامل بلوك والجو ده فا حسيت ان انا عايزه شريك حياه ليا بس يكون حد كويس وانا متقبلاه ومستريحاله وهو بيبادلنى نفس الشعور مايكونش الموضوع من طرف واحد فا بعد ٣ ساعات من تحميل التطبيق وكده جالى لايك من الايكات اللى بتجيلى لحد انا شوفت صورته وفيديو ليه كده تقبلته ووافقت عليه بشده ورديتله الايك فا بالتالى اتفتح ما بينا شات نقدر نتكلم فيه فا المهم يعنى كلمنى عامله ايه وبتاع واتكلمنا على الواتس اسهل وطلب منى الانستا وانا اصلا كنت عارفه انه كونتنت كريتور علشان كان حاطط على البروفايل كده بس انا وافقت عليه عشانه حتى ما قرأتش اسمه انا بصيت على صورته بس وسألنى بعد كده بتدرسى ايه ولا مخلصه ايه وانا سألته نفس السؤال والكلام كان خفيف وهزار خفيف وبعد كده تانى يوم لاقيته بيقولى عامله ايه وبتاع وبرضو كلام على القد وخفيف وانا مستنياه يفتح معايا كلام اكتر لأن مش عايزه ابان ان انا الطرف الاكثر حماسا و ان انا مدلوقه عليه فا المهم لاقيته فى اليوم التالت بدأ يكرفلى بقى ويرد على الرساله مثلا بريأكت وخلصنا والكلام اتقفل قعدت اسأل نفسى خمسين سؤال واقول هو العيب فيا ولا ايه طب انا عملت ايه مش عارفه ايه طب كنت بكلمه طبيعى ما هو لو عايز يتعرف كويس كان اتكلم زى الخلق المهم بعد ٨ ايام لاقيته حاطط شويه تفاصيل اكتر عن نفسه فى بروفايل ال app ده وانه عايز شريكة حياه بمواصفات معينة وكده فا قولت هو كده مش بيتسلى لأنه كان من الاول مش حاطط كلام خالص فا رجعت كلمته تانى اللى هو افتح معاه اى كلام أقوله يعنى انا معاك اهو لو عايز تقول حاجه فا لاقتيه بيرد على القد برضو ولو بعت ريكورد فى نص الشات مايسمعهوش وكده ويرد متأخر و يقول معلش كنت نايم كنت مشغول كنت بعمر الصحراء فا ارد عليه بماسدج وابينله عادى وبتاع علشان هو بالمناسبه مش بيحب البنت النكديه يروح رادد بريأكت على الرساله وخلصنا وبدل ما كان بيشوف استوريهاتى بقى ساعات وساعات فا بعد كده لاقيته نزل استورى أنه اتقدم لواحده وابوها طلب ٢ مليون جنيه مهر ومؤخر والحاجات دى وقال اول وآخر مره فا انا قولت طب ما انت بتعرف تتكلم اهو يعنى ما عرفتش تاخد خطوه معايا ليه أو تتعرف عليا اكتر بجد هو انا بنص عين ولا ايه انا مش فاهمه وكمان لما لاقيت نفسى فى الاول انا البنت الوحيده يعنى عنده على الفولوينج ليست فى الانستا كا حد مش مشهور مش فاكره كان فيه حد تانى ولا لأ فا اطمنت قولت ده مش بتاع بنات وكده مادام اختارنى انا اللى يعملى فولو يبقى ممكن ناوى على حاجه يعنى هو حوالنى ولففنى حوالين نفسى بعد اما كرفلى وقبل ما ينزل الاستورى دى لاقيته ضاف بنت تانيه فا قولت تمام يلا كل واحد يشوف حاله بس انا كنت عايزه الموضوع يقفله هو لو مش هيبقى فيه مابينا حاجه عشان مفكرش كتير واشوف انا عملت ايه غلط وفى نفس الوقت مش عايزه اتكلم وابادر فى اى حاجه عشان انا البنت ومايفتكرش انى هموت عليه وبتاع فا طبعا اضايقت يعنى كان نفسى يبقى فيه مابينا حاجه لإنى استريحتله وكان فيه ما بينا حاجات مشتركه كده خصوصا أنه بيحب يعمل محتوى وانا برضو يعنى هو الشات كان عباره عن القطط بتاعته وهو بيلعب معاهم لأنه بيحبهم موت ونسى باين ان احنا بنتكلم فى حاجه تانيه بس تمام يعنى فا لاقيته بعد فتره انا نزلت صورى وبتاع استورى الواتس فا كل ما انزل صوره يعملى لايك عليهم ويقولى حلوين كده كده ويسيب بقيت الاستوريز حتى الاقيه مش باين انه شاف الاستوريز دى وباين بس أنه شاف آخر واحده وعاملها لايك انا قولت هو بيخفى نفسه لما يشوف الاستوريز عندى ولا ايه بس ماظنش يعمل كده ماعرفش يعنى هو مش مهتم بيا اوى للدرجه دى( انا بشارك معاكم اللى بيدور فى دماغى بالمره) فا قولت يا عم هو انت مش اتقدمت لغيرى انت عايز من امى ايه دلوقتى فا انا مافهمتش وكمان كلامه يرجع على القد تانى معايا لو عملتله ريبلاى على كلامه يعنى ده تقل ولا ده ايه طيب ما تتكلم زى الناس يعنى هو حرفيا يا بيرد بكلمه يا بأستيكر يا بريأكت علاقه مالهاش مله وحاليا الموضوع شغال مابينا بريبلاى على استوريز بعض انا شايفه أنه راكنى على الرف ومش انا اللى اتركن على الرف الصراحه ده فيه ناس كانوا بيتمنونى وكده وانا قيمتى أعلى من كده بمراحل وانا بنت ناس فى الاول وفى الآخر فا انا حاسه انى دى معامله كلابى وهو مش واضح وكذا حد قالى انه بيتسلى يعنى انا بسأل نفسى بقول لو انت مش عايزنى ما تعملى unmatch على ال app وان فولو على الانستا وانا هفهم والله يعنى بالعكس أنت كده ساعدتنى انى اشيلك من دماغى واشوف غيرك واشوف حياتى بتقول ايه فا انا مش فاهمه السيتيويشن شيب دى ايه نظامها برضو (يعنى برضو فيه حد قالى هو يمكن لقاكى مش مبهوره باللى عنده وبتتعاملى عادى فا قال طب اعمل ايه كمان فا مافهمتش انبهر اعمل ايه يعنى اقوله وااااو انت كونتنت كريتور مشهور وعندك عربيه واوف ايه ده مش عارفه برضوا انا اتعاملت عادى وقولتله محتواك حلو وعملتله لايكات يعنى اعمل ايه تانى بجد وحد قالى هما بيحبوا البنت التقيله فا قولت انا كنت طبيعيه جدا يعنى ما فيش احسن من الطبيعه بصراحه يعنى أنا تعبت اومال لو كان توم كروز كان عمل ايه بجد ) آسفه انى طولت ولكم جزيل الشكر افيدوني أفادكم الله