بحس حاجة دايما.. او مش بحس، هي تُعتبر وجهة نظر.. اللي قدامك بيشوفك بمرايته.. لو هو حد قلبه ابيض وطيب، هيشوفك كده، هيدخلك بيته، يأتمنك على اسراره، وغيره كتير.. لو حد عنده حقد وكره وغضب مكبوت، هيشوفك دايما بني ادم وحش مهما تعمله ومهما تبذل في العلاقة من جهد.. اقرب مثال على ده، بنلاقي "الذكور" المتجوزين بس بيخونوا مراتاتهم، دايما شاكين فيهم، وبيعنفوهم ويبهدلوهم، رغم ان هو اللي خاين؛ هو شايفها بمرايته.. مفكر كل الناس زيه.. لو بنت قالتلك ك بنت مثلا ان انتي شكلك وحش، او ذمت حاجة فيكي حتى لو خِلقة ربنا وملكيش فيها ايد -بغرض التسفيه طبعا مش النصيحة، وشتان ما بين الاثنين عظيم-، ف هي بتحاول تغطي نقص عندها.. بتعمل اسقاط لعيوبها عليكي انتي؛ عشان بس تحسس نفسها انا فل وتمام وكيوت وان اهو فيه ناس اوحش منها، رغم ان ده ممكن ميكونش صح اصلا.. الناس دي مش طول الوقت بتبقى وحشة فعلا، بس البيئة اللي حواليهم خلتهم كده للأسف.. لو نقدر نغيرهم ف نحاول، اما لو هي طبيعي شخصية، ف ببساطة، "اعتزل ما يؤذيك". لو هنتعلم من الكلام ده كله درس واحد بس، ف هو انك تكون طول الوقت قلبك ابيض، مش ساذج، بس قلبك ابيض.. ولو حد عمل فيك حاجة، ف هي مش غلط منك.. لو حد عابك، ده صدقني يعيبه هو مش انت، ركز على نفسك، وشوف نفسك بمراية اللي بيحبوك، هتلاقي نفسك احسن كتيييرر والله.. فكرني الحوار ده وانا صغيرة لما كنت اقول لأختي انها غبية، بضحك وهزار يعني، ف تقولي اللي بيقول على حد انه غبي وبيقول على نفسه ذكي بيبقى هو الغبي فعلا، وانا كنت اتخانق معاها ومقتنعش.. بس لما كبرت عرفت فعلا انها كانت بتقيس بمقياس اكبر بكتير مما كنت متخيلة.