السلام عليكم 🌸. هي مش مشكلة كبيرة اوي، بس مشكلة. من شوية كده فتحت اتفرج على مسلسل، هي كيدراما، ف هي بتتكلم عن المدارس اللي منتشر فيها تنمر وكده، وعن انشاء منظومة تبع الشرطة عشان توقف الموضوع ده. اللي استفزني اوي ف اول كم مشهد، ان ازاي فيه شلة متنمرين، لمجرد بس ان اهلهم ذوي نفوذ، وان المدرسة مش عايزة فضايح، يتستروا ويرشوا التحقيق عشان يغطوا على انتحار طالب من شدة التنمر؟ المشكلة مش في كده كمان، المشكلة في مشهد تاني لطالب بيتعرض للتنمر، وبيتضرب ضرب قوي، ومحدش من التلامذة مهتم، واللي مهتم ف هو هيهتم لانه هيستهزأ ويضحك، ولما جه عضو الهيئة وضرب المتنمر، كله اتجمع وصور عشان قال ايه ينشروا ده ويرفعوا عليه قضايا انه ازاي يضرب طالب.. طب واللي كان شوية وهيتكل على الله من الضرب ده! المشكلة مش في دي بس، المشكلة ان كل ده بيحصل في حياتنا اليومية، الكيدراما حرفيا في الانترو بس وصفت كل حياتنا؛ بنتغافل عن اخطاء الكل بحجة انو طب واحنا مالنا؟ بس لما يتعلق الموضوع بالاكشن والترند لا احنا هنتدخل عادي. مجتمع عقيم اقسم بالله.