والد قصص حقيقية - 15 تجارب، ونصائح، ودعم

أنا حابب أشرح بشكل مرتب طبيعة علاقتي الحالية ببنت قريبة مني جدًا وتأثير العلاقة دي عليا نفسيًا، لأن الموضوع بقى مؤثر بشكل واضح على حالتي النفسية وطريقة تفكيري ومشاعري. أنا أعرف والدها من سنة 2012 تقريبًا، والعلاقة بيني وبينه كويسة جدًا من زمان، وهو بيعتبرني زي أخوه الصغير ودايمًا أسلوبه معايا لطيف ومريح. كمان كنت أعرف والدتها الله يرحمها وكانت تعرفني كويس، وروحتلهم البيت قبل كده في رمضان أنا ومجموعة من أصحاب والدها وفطرنا عندهم. ولما والدتها توفت، روحت عملتلها عمرة في مكة، لأني فعلًا كنت مقدّرهم جدًا وقريب منهم نفسيًا. أما بالنسبة للبنت نفسها، فإحنا بدأنا نقرب ونتكلم بقالنا حوالي 3 شهور تقريبًا، وخلال الفترة دي بقينا بنتكلم بشكل شبه يومي، سواء شات أو مكالمات فون طويلة، وفي بينا راحة وونس وضحك وهزار واهتمام متبادل بشكل واضح جدًا. في عيد ميلادها جبتلها هدية عبارة عن إنسيال وسلسلة إكسسوار ستانلس ستيل، والطريف إن الاختيار كان منها هي أصلًا، لكن على أساس إني بجيبهم لبنت تانية، لأني كنت خايف لما تعرف إنهم ليها ترفض تختار أو تقولي لا. فاختارتهم، وأنا جبت نفس اختيارها واديتهم لها في بوكس هدية صغير بشكل مرتب، وهي فرحت جدًا وقبلت الهدية وشكرتني عليها بشكل جميل. وكمان يوم عيد ميلادها كنت أول واحد يهنيها ويتصل بيها. إحنا كمان بنتقابل أحيانًا في مكان شغلها، لأن هي ووالدها شغالين مع بعض، وأنا بروحلهم هناك وبنقعد نتكلم وقت ما تكون فاضية، ووالدها عارف إني بتكلم معاها وبيشوف ده بشكل طبيعي، لأن بيني وبينها كل احترام ومفيش أي تجاوزات سواء في الكلام أو التصرفات. وفي مرة والدها كلمني وقالي إنها محتاجة دبابيس لدباسة وأنا رايح لهم، فقولتله بهزار: “بس كده؟ دا إحنا عنينا ليها… هي تؤمر بس وإحنا ننفذ” وهو ضحك جدًا وقتها. مع الوقت بدأت أحس إن وجودها فارق معايا نفسيًا بشكل كبير جدًا، وده بان حتى على شخصيتي وطريقتي وحالتي النفسية، واتقالي إني بقيت أهدى وعندي طاقة وشغف أكتر من زمان. أنا فعلًا بحس إن وجودها بيريحني وبيطمني، ولما بنتكلم ببقى مرتاح ومبسوط جدًا، ولما التواصل يقل أو تبعد شوية بتأثر نفسيًا بشكل واضح، وده مخليني أحيانًا أخاف من فكرة بعدها أو تغيرها معايا. هي في فترة قبل كده كانت حاسة إني بضغط عليها عاطفيًا شوية أو مركّز زيادة في أي تغيير في كلامها أو مودها، وقالتلي إنها لو رجعت تحس بنفس الأسلوب اللي مكانش مريحها طبيعي هتتغير. ومن وقتها وأنا بحاول أهدى وأكون متزن أكتر في تعاملي وكلامي معاها. حصل قبل كده إنها فضفضتلي عن موقف ضايقها وكنت وقتها بدعمها وبسمعها، لكن بعد فترة لما الموضوع اتفتح تاني ناقشتها في بعض تصرفاتها وقلت إني شايف إن في جزء ممكن يكون اتفهم غلط منها، وهي زعلت جدًا وقالت إنها غلطانة إنها حكت أصلًا. ومن وقتها بقيت حاسس إنها أحيانًا بتكتم ومش بتحب تحكي كل اللي جواها، وأنا ده بيضايقني لأني بحب إنها تعتبرني مساحة أمان وتحكيلي أي حاجة مضايقاها. في نفس الوقت علاقتنا مش قائمة على الفضفضة والمشاكل فقط، بالعكس، بينا هزار وضحك وكلام خفيف وونس وقرب واضح جدًا، وأنا بحس براحة كبيرة معاها وبحب طريقة تفكيرها ونضجها وأسلوبها جدًا. كمان هي لما كانت بتكلمني وهي مضايقة أو بتعيط كنت باحتويها وأهديها، وده قرّبنا أكتر من بعض نفسيًا. أنا عندي مشاعر حب حقيقية ناحيتها، وهي غالبًا حاسة بده من أسلوبي واهتمامي وطريقة كلامي، لكن لحد دلوقتي أنا معترفتش بشكل مباشر. وخطتي إني لما أشتغل وأكون مستقر أتكلم معاها بشكل واضح ومحترم عن الارتباط، ولو في قبول أكلم والدها بشكل رسمي. في نفس الوقت عندي خوف كبير جدًا من الرفض أو إنها تبعد، لأني متعلق بيها نفسيًا بشكل واضح، وبحس إنها مصدر أمان وراحة كبيرة بالنسبة ليا. وأوقات بقلق زيادة لما ترد باختصار أو تقلل كلام بسبب ضغط أو تعب، ودماغي تلقائيًا بتفكر إنها متغيرة أو زعلانة مني، رغم إن ده غالبًا بيكون بسبب ضغطها أو تعبها فعلًا. أنا كمان بحكيلها أحيانًا عن مشاكل البيت وعلاقتي بأهلي وإحساسي إني مش متشاف أو مش قريب منهم بالشكل اللي نفسي فيه، وبحس إني مرتاح جدًا وأنا بحكي معاها لأنها بتسمعني بطريقة مريحة ومتفهمة. حابب أفهم أكتر: - هل تعلقي بيها طبيعي ولا زائد؟ - إزاي أوازن بين الحب والاهتمام وبين الخوف والقلق؟ - وإزاي أبقى قريب منها بشكل صحي من غير ما أحسسها بضغط أو احتياج زائد؟ - وهل طريقتي الحالية صح من ناحية التدرج والهدوء ولا محتاجة تعديل؟ -وهل اتكلم معاها واصارحها الاول ولا اتكلم مع والدها الاول ؟ -وفي حالة انها رفضت انا الموضوع بالنسبه ليا هيبقي صعب جدا ف هل اتكلم تاني او اتكلم مع والدها بس من غير ما اقوله اني كلمتها ف حاجه ولا خلاص هي مره وانتهي لاني عاوزها بصراحه ونفسي تشاركني باقي عمري ؟ -والكلام الافضل واتس ولا فون ولا وجها لوجه علما بان لو وجها لوجه هيكون في مكان شغلها لاننا مش بنخرج مع بعض واكيد هنبقي انا وهي بس علشان محرجهاش قدام حد .. حابب اعرف رايكم بشكل عام ونصايحكم واسف اني طولت ف كلامي

السلام عليكم اترددت كتير فاني ابعت بس مش قادر بصراحه استحمل انا طول عمري من وانا صغير ووالدي ملوش اي علاقه بينا وسايبنا ويعتبر منفصل عننا عشان ميشلش مسئوليتنا وهو بجد بيكرهنا اوي لدرجه انه كان بيتبلي علينا بحاجات وده كان مآثر فيا من وانا صغير وانا طبيعتي اني مش بحكي لحد فكنت بحكي لنفسي ولما كان حد يسالني عليه او كده كنت برد بردود مختلفه يعني لما كنت بلعب في الشارع مع صحابي او كده وانا صغير ويسالوني عليه فكنت تقولهم ده بيجي بليل خالص بعد مكل الناس بتنام عشان يطمن عليا وطبعا ده مكنش بيحصل فمرة فمرة صدقت الكدبه وبقيت بسهر عشان يمكن يكون ده بيحصل فعلا ولكن عمره محصل 😅 وكنت فعلا كاتم كل حاجه فقلبي لحد مكان في بنت من وانا في ابتدائي وكنت معجب بيها وكلمتها وانا ما بين أولي وتانيه كليه وهي وافقت بيا وفهمتها ظروفي واني مستحيل أخطب دلوقت وكده وهي قالت هتستناني وكانت معايا وحكيتلها كل حاجه وحشه كنت بمر بيها وبقت بالنسبه ليا هي كل حاجه ولو كنت هضحي بحياتي عشان حد كان هيكون عشانها بجد وبعد كده سيبنا بعض بفكرة أنها عايزة تتجوز بدري وخلفت بوعدها معايا وبعدها بفترة دخلت كلمتني تاني وانا زي الحمار اتبسطت وكلمتها تاني وبعدها بيومين تلاته نفس القصه وبعدها بفترة تاني حصل نفس الموقف بالظبط ورجعنا سيبنا بعض تاني وبعدها عملتلي بلوك من كل حاجه وبعدت خالص وانا كنت متضايق اوي ومش عارف اكمل أو اتبسط فلما كنت بتضايق كنت بطلع اهزر مع امي شويه واناغشها كده فتروح متعاركه معايا وشتماني ودعيا عليا ملحوظه الهزار اللي كانت بتتعارك معايا عليه كان بيكون عبارة عن اني ببوسها 😅 وفضلت علي الحال ده لحد ماعجبت بواحده تانيه وكلمتها وكلمت أهلها ووصفتلهم ظروفي وهما وافقي عليا بس من غير لسه خطوة رسميه عشان عندي اخوات اكبر مني وبعدها اكتشفت أن اخويا عايز يخطبها وهو ميعرفش اني بحبها 😅فطبعا ولا انا ولا هو كملنا وقعدت فترة متضايق بسبب الموضوع ده لحد معرفت أن البنت الأولي اللي كنت مرتبط بيها اتخطبت وانا كل حاجه وكل طاقتي بقت صفر لان فعلا كنت لسه عايش علي أملها لأنها اكتر حد حبيته ، وفضلت مش عارف اتعايش لحد مدخلت كلمت والدتها باكونت فيك وقولتلها اني بحب بنتها واني عارف أن مينفعش أخطب علي خطبة حد عشان كده كلمتها باكونت فيك وان كل اللي عايزه أن لو لا قدر الله حصل حاجه والموضوع مكتملش فتعرفني لاني مش عارف اوصل لاخبارها خالص راحت امها قالتلي انها اتجوزت وحامل اصلا 😅ومكنتش مصدق فكلمت اختها وهي أكدت علي الكلام واختها كانت عارفه اللي بينا وطلعت كانت قايلالها أنها سايباني عشان سن الجواز رغم أن الفترة اللي قالتلها فيها كده دي كنا مرتبطين سوا عادي وكانت بتقولي فيها انها معايا وهتستني وكانت بتاجر بعلاقتها مع اختها معايا عشان افضل متعشم فيها وأن انا بالنسبه ليها كنت شخص بيطلعها بره مود الاكتئاب اللي كانت فيه بسبب نتيجه الثانويه وانا بصراحه مش عارف اتخطاها خالص وفي نفس الوقت مش عارف اتخطي والدي خالص ولا البنت التانيه وبقيت طول الوقت نايم ومش عارف اتحرك من السرير ولا عارف اضحك وطول الوقت بعيط وحتي لما بنام عشان اهرب من كل ده فبنام وبحلم بيها 😅والكليه اصلا انا كنت بكره المجال ده كله وكنت داخله افرح امي واعوضها فحتي دي مش عارف اتخطاها ومش عارف أهرب اروح علي فين وطاقتي صفر وحاسس أنه تم استنزافي في سن صغير اوي ومش فاهم وكل شوية بتخيل اني باذي نفسي وعايش حياتي كلها في سيناريوهات بخلقها في دماغي وكلها سيناريوهات بتتعبني اكتر بس مش عارف اطلع براها ولا عارف اعيش علي أرض الواقع خالص والسيناريوهات دي بقت عبارة عن كل حياتي حرفيا فمش عارف هل انا كده مكتئب ومفروض اروح لدكتور نفسي ؟ وحتي ده مش هعرف اعمله بسبب الظروف الماديه فالمفروض اقترحوا اعمل ايه دلوقت لاني بجد مش عارف اتعايش خالص ولا عندي طاقه لاي حاجه