نظرات

ممكن تعرفوا الشخص من عنيه ؟؟؟ من نظراته ؟؟ اه دي والحمدلله موهبه عندي ب اختصار ممكن ابص للشخص أفهمه هو عايز ايه او يعني افهم نظراته بتدل علي ايه بس الا. الشخص داااا مش عارفه احدد هو عايز ايه كل اللي اقدر اقوله أنه حد محترم جدا جدا جدا يعتبر جيران بس بيتنا بعيد عن بعض شويه مش كتير يعني ... كبير عني ب ٣ سنين . مفيش بنا اي كلام أو اي تواصل . بس مؤخرا ب الصدفه بنتقابل ف المواصلات حسيت أنه فيه نظرات من ناحيته واخدت بالي من دا وهو عرف اني اخدت بالي بس برضو كررها كذا مره وبرضو مش عارفه احدد هل دا اعجاب من ناحيته ولا لا. بس اللي متاكده منه أنه حد محترم اوي يعني ميقصدش اي حاجه غلط بنظراته دي .. لحد ما من اسبوع اتقالينا انا وهو والاستاذ اللي بيدرسلنا . هو أول لما شافني وعرف أن دي انا بص للناحيه التانيه كدا جائز علشان الاستاذ مايخدش باله من كل دا ؟؟ برضو مش عارفه وحسيته اتوتر وعايز يمشي باي شكل . وبعد م كان بيتكلم مع الاستاذ بطل كلام خالص وكأنه بيقوله خلص عايز امشي . تفتكروا دا طبيعي ولا فيه حاجه بس هو متردد؟

محتاجه تفسير ورأي ف نفس الوقت ي اصداقائي هو زميل دراسه بس اكبر مني ب 4 سنين مفيش بنا اي كلام ولا اي تواصل من اي نوع بس مؤخرا كنا بنتقابل ف المواصلات بحكم دروسي وهو بحكم كليته كان فيه نظرات من ناحيته هو حتي لما كنت باخد بالي وابصله برضو كان بيفضل باصص ومش بيشل عنيه .. بصراحه انا قلت دا هبل خصوصا أن انا شايله فكره الارتباط من دماغي اصلا مكنتش بركز اصلا الموقف دا اتكرر كذا مره لكن اليوم حصل موقف تاني صدفه غريبه جمعتنا انا وهو وأستاذ دا كان بيدرسلنا فجأة أول لما شاف وجهي ما بصليش زي كل مره ممكن علشان الاستاذ كان واقف وخاف ياخد باله ؟؟. مش عارفه . بس كله اللي عمله بصلي كدا واول لما عرف أن دي انا اتوتر كداااااا وبقي يبص الناحيه التانيه وحساه كان عايز يهرب وكان بيقصر في الكلام ما بيني وبين الاستاذ علشان يخلص وكل واحد يمشي ف انا مش عارفه دااا ايه حد عنده تفسير ل دااااا هو عمره م حاول حتي يكلمني أو يلمح ب حاجه انا ما بقتش فهماه.

بحاول والله قدر الامكان اني ابعد عن العلاقات المحرمة والله تعبت مش عايزة ادهل فيها و اغلط غلطة انا مش قدها و قلبي هيتكسر بس معرفش يمكن ده اختبار ربنا ليا اني هفضل قد وعدي و كلمتي معاه معرفش بس والله حاولت هحكيلكوا حاجه في ولد كان معايا السنه الي فاتت في درس انجلش و الولد حلو الامانة المهم الولد ده مقضيها نظرات و انا لو ولد بصلي اكتر من مرتين بي قصد بتوتر و كل ما يتحرك لازم عيني تيجي في عينه بكون اتوترت خلاص و هو عمل معايا كده السنه الي فاتت مره فضل باصص مدة و خلاص قولت سرحان و انا مبحبش اوهم نفسي بحاجه انا اخترعتها من دماغي عشان متعبش السنه دي بقى انا غيرت مدرس مادة تانية عشان مكنتش مرتاحه و المادة دي مدرسينها قليلين المهم اتعرفت في الدرس ده على صديقة ليا قديمة و كنا صحاب في مدرسة ما و خلاص بعدنا فترة و رجعنا تاني المهم الولد ده لقيته برضوا فالدرس قعد طول الترم الي فات مقديها نظرات و انا اضايقت و قولت يمكن معجب بالي جنبي و انا اسيبهم الاثنين بقى و بجد مش عايزة اعيش في وهم و من هذا القبيل و مش عايزة اعلق قلبي وخصوصا ان الولد حلو لكن ميعنينيش في حاجه قولت الترم ده اسيب المستر اوف لاين و احضر اون لاين و كنت مرتاحه الحقيقة و مبقتش اشوفه تاني المهم النهارده كان عندي درس نفس المادة الي هو كان فيها السنه الي فاتت انجلش مع نفس المستر و جيت متاخر دخلت لقيته قاعد جمب الباب و بيتكلم مع المستر فالي احنا اخدناه لانه كان سابه و رجع طول الحصه حرفيا نفس الي عملوا و انا اقعد اقول يمكن بيبص على حاجة تانية او على الشباك الي جنبي يمكن مش انا المهم مفيش غيري فالنحية الي هو بيبص فيها اصلا و المشكله مفيش حاجه تلفت نظرة انه كل دقيقه يبصلي لما يتعدل يبصلي لما يكون عادي يبصلي بجد بقى ايه ده و انا صدقوني مش عايزة لا اعجب بحد و ولا حد يعجب بيا و لا انا الفت نظر حد و ولا حد يلفت نظري عايزة اعيش لوحدي لحد ما ييجي وقتها و اتجوز بقى و اطلع مشاعري دي في وقتها مش عايزة لعب العيال ده لانه بجد ضحك على النفس بس بجد انا مش عارفه هو بيعمل كده ليه او هو عايز ايه ولا هو بيحب يبقى توكسك و يقعد يعلق قلوب البنات بيه ولا ايه دنيته في نهاره الزرق ده و مش حابه اقول لماما و اعمل حوار على الفاضي و بحاول مركزش بس بجد انا مضايقة جدا خايفة ارجع اعلق قلبي تاني و اقعد اوهم نفسي بي حاجات الطرف التاني اصلا مش داري عنها و بقعد اطلع مبررات غير انه ممكن يبقى معجب بس انا مش عايزه حد يعحب بيا والله عايزة ابقى في حالي مش عايزة اتقطع و اتعذب تاني اني اسلمت قلبي لحد مش داري عنه اصلا والله تعبت ياريته ما جه الدرس

انا عندي 20 سنه ومن صغري وانا متعود عالشارع واني اروح واجي واتعامل مع ناس حتى لو عدد قليل ، زي بتاع السوبر ماركت او حد معرفوش بس احنا الاتنين بنشتري حاجه من نفس المحل ف نبدأ كلام مع بعض ، بس مشكلتي ان دايما بحس ان حد بيراقبي ، بس مش حد مركز معايا وخلاص ، حد بيتربصلي ومستني مني اي لحظه عشان يتخانق او يتشاكل معايا ، دايما عندي احساس ان اي حد فالشارع وانا ماشي يعرفني ميعرفنيش مش طايقني ، بقيت عامل زي المجنون ابص لوش كل واحد وانا معدي فالشارع ، بس بعمل حسابي وابصلهم بعدوانيه، ف اخسر سلامي ف اي مكان بروحه والناس متحبنيش وتشوفني مصدر تهديد ويتحدوا عليا لو ف مشكله ويطلعوني غلطان