نصيب

انا قربت على ال ١٧ خلاص كلها كام شهر و اكون وصلت للسن ده الحقيقة مكنتش اتخيل اني اوصل السن ده رغم انه يبان صغير جدا دلوقتي مش زي زمان خالص بس انا دايما بتعامل من بنات اكبر مني بسنين و كنت شايفة ان سنهم ده عشان اوصله محتاج مني كتير اوي الصراحة مبسوطة اني بكبر بقيت اقدر اتعامل بحرية اكتر من ما كنت طفلك اهلي كانوا متحكمين فيا و معرفش انا كمان سبع سنين هكون اتغيرت للي انا عايزاه ولا لا دايما لما كنت بسمع حد يحكي عن حلمه و يقول نفسي اكون كذا او اعمل كذا و و اهدافي كذا كنت استغربه هو بجد فيه حد ممكن يبقى عنده عزيمة لكده و كنت من و انت طفلة بفكر في حاجه واحده بس و نفسي تبقى عندي و اكاد اكون ادركت ان دي غايتي و مقصدي معرفش ليه دي الحاجه الوحيدة الي بفكر فيها من ساعت ما كنت سبع سنين و عشان اكون واضحة نفسي اجرب اتحب من ولد لانه بيحبني و شايفني مختلفة دايما ده مقصدي و هدفي مش اني احبه الاول لا هو الي يحبني و يختارني معرفش يمكن عشان فضلت من سبع سنين لحد ١٣ سنه بحب نفس الشخص او يمكن بعدها فضلت سنتين احب برضوا شخص ثاني او يمكن عشان فضلت سنه بعدها احب شخص ثالث و بعدها قعدت ست شهور احب شخص رابع و حاليا عندي خامس هو الحقيقة المشاعر بدات معايا من و انا طفلة و كل دول محدش يعرف بيهم او هم نفسهم كانوا عارفين دايما مشاعري دي الي هى الاعجاب كانت بيني و بين نفسي حاليا معرفش ازاي فضلت السنين دي كلها و انا ساكته حاسه انه مكنش حقيقي اصلا انا كنت بحب كل واحد لانه كان الي قدامي وقتها كان مميز بالنسبة ليا يعني مش عيني زايغة المهم اتعودت دايما ان الحب ده حاجه عمرها ما كانت ليا و عمري ما هكون جذابة بالنسبة لولد مش عشان انا وحشة بس شايفة ان في احسن مني بمراحل و في الي تلفت الانتباه غصب اتعودت اني انا الي بحب و بختار و بتعذب مع نفسي في صمت تام لذالك بحس كتير ان الحب ده حاجه خيال اصلا مش قادرة استوعب ان كلها اربع سنين من حياتي و اهلي هيغيروا كلامهم من عيب انتِ ازاي تكلميه و اظبطي حالك و اقعدي عدل لي هنشوفك عروسة امتى و يفكروا في فلان ليا و يهتموا و يسمعوا ليا لو حد لفت انتباهي هو اه مبقوش بيقولوا ده دلوقتي لاني اثبت ليهم انا و اختي اني معترضة على فكرة الحب اصلا في سني اختي اكبر مني بسنتين* بس انا عندي مشاعر حاليا تجاه شخص بس ممكن اقول انها مشاعر ذبلانة مثلا مستنزفة شايفة انها هتكون زي الي قبلها مفيش منها امل او خطوة من الطرف الي انا مختاراه عارفة الي هيحصل هفضل احب مع نفسي و ارسم سيناريوهات و احبه عليها و هو شايف حياته و انا بتعذب لمجرد اني ساكته و رغم قوة الثقة الي بيني و بين اهلي الا اني لسه عندي الخوف و الرهبة اني احكي لاهلي عن حبي لشخص معين شايفة انه هيروح لحالة و اني عارفة ردهم الي انا فهماه و ان المشاعر مش بايدي بس مش عايزة اشغل بالهم الحقيقة بحاجه انا عارفة آخرها لذالك انا نفسي اوصل للمرحلة الي اقدر اعبر عن مشاعري فيها بكل حب و منغير قيود الي اقدر استوعب اني لقيت الشخص الي اقدر اقوله بحبك الي عمري ما قولتها لحد و اقدر استوعب انه الحب حقيقي و اخيرا بقى ليا من الحُب نصيب معرفش الي مكتوبلي حاله ايه دلوقتي بس اتمنى ان قصة حبنا الي هتبتدي بالحلال يكون ليها لقاء و يكون هو مختارني و نحكي لاهلنا احنا قابلنا بعض ازاي و ان النصيب اقوى من اختيارنا الف مره الحقيقة حاسة ان الشخص الي في قلبي حاليا ممكن يكون القدر خلانا نكون في اللحظات دي عشان احنا لينا نصيب من بعض و ارجوا من الله ده و يصلح احوالنا قبل ما نتقابل تاني بعد عدد من السنين الله اعلم بيه❤️ انا شايفة فيه حتة شبهي حتى لو هو مش نفس تربيتي و عجباني الحقيقة اوي و هى انه مش اي هلس بيحصل من دفعته او المدرسة عموما بيروح يقلده و بيعجبني فيه اوي انه شايف دفعته و هى بتعمل الseniors تقريبا بتتكتب كده .. قدام عينه و مع ذالك مرحش رشق فيهم عجبتني دماغه و اختياراته و انه انا كمان كده معملتش مع دفعتي كده ( احنا ثانوي) و هو اكبر مني

من اكتر الحاجات إللي خلتني مرتاح نفسيا انى بقيت مدرك إن لو ليا نصيب ف حاجه هتيجي يعني هتيجي حتي لو انا بعدتها عني بإرادتي أو هي إللي بعدت بإرادتها أو الظروف بعدتها من غير يد مني ومنها.. فبقيت عارف ان لو ربنا كتبهالي هتتهيأ الأحداث وهيحصل المستحيل وهلاقيها قدامى وقصاد عيني وليا .. فهقلق ليه طالما نصيبي هيجيلي💙.

أنا عمري ما اسيب.. أحلامي تغيب لو لينا نصيب.. فالحب حياة من امتى وكان الحب معاد أو سور وحصون حراس وبلاد ده علشانها اعدي بحور وبحور واموت لو مرة تشوفني جبان حراسها كتير والوضع خطير وأنا لا أمير ولا حيلتي جاه وقالولي افوق وارجع بالذوق ومبصش فوق وبلاش معاناة أنا عمري ما اسيب.. أحلامي تغيب لو لينا نصيب.. فالحب حياة

عمري ف حياتي ما بصدق حاجه اسمها حظ ، حد نجح في حاجه عمري ما اقول حظ ، حد اشتغل شغلانه حلوه حد ربنا رزقه باصحاب جدعين حد عنده علاقات كتيره ومهمه ، عمري برده ما اقول دا حظ ، الا حاجه واحده بس هي اللي بتيجي بالحظ ، لما سمعت حد بيقول الحب دا حظ ممكن حظك يجي وممكن ميجيش ، ممكن يكون حظك حلو وممكن حظك يكون وحش وممكن ميكونش ليك حظ طول حياتك عادي ، ده المره الوحيده اللي صدقت موضوع الحظ ، حاجه غريبه تتمني الشخص دا يكون معاك وتلاقي الشخص دا راحاتخطب وكام شهر ويتجوز وعادي ، تحب غيره تلاقيه بيحب حد تاني اساسا ومش حاسس بيك ولا بوجودك ، سبحان الله ، حظ فعلا ، حظ تلاقي الحب الحقيقي ، ممكن تكون شخص مفکش غلطه وحد يكون فيه كل العبر ، بخيل بقا جبان عصبي شكاك ، وفالاخر يكون معاه الشخص اللي انت بتحلم بيه وبتحلم بس يوم واحد جمبه ،جايز اكون مالناس اللي ملهاش حظ ، وجايز يكون حظي مجاش ، بس ده مش اول حاجه میکونش ليا حظ فيها ، عادي جايز يكون حظي ف حاجه اهم واحسن مالحب ، ممکن بس مش عارف.

انا نفسي ادخل علاقة وتكون ناجحة انا دخلت علاقة واحدة بس في حياتي بس القدر كان ليه رأيي تاني ان العلاقة دي تكمل كنت بحبها اوي بس النصيب هو اللي بيمشي هل ممكن الاقي واحدة تكملني يارب الاقيها

اكتر حاجه مضيقاني اني حاسس اني ديما متأخر واني مليش نصيب في اي حاجه بحبها أو اي حاجه عموما عندي19سنه ولسه مش عارف انا ايه ولا نفعت في تعليم ولا حبيت الشغل ولاعملت أصحاب وعزوه كل اصحابي الي كانو معايا من ايام الدراسه بقو احسن مني وانا عمري والله مكرهتلهم الخير بالعكس بس صعبان عليا نفسي واهلي شايفني فاشل ومليش لازمه ومش طيقني وانا مشتت ومش عارف انا رايح فين ولا اعمل ايه في حياتي ومهما عملت مفيش اي حاجه بتظبط معايا لو ظبطت معا كل الناس بتيجي عندي انا وبتقف

كنت بحب وحده ومحصلش نصيب بس بصراحه انا حسيت بكل حاجه حلوه معها وتعلمت الحب على اديها ويعنى ايه بنت موجوده في حياتى مش مجرد بنت لا دى بتكون احلى تجربه الشخص بيعشها عشت فيه تفصيل كان نفسي اعشها

‏رزقك كامل 24 قيراط تاخذهم اثنين ثلاثة فلوس...علي أربعه خمس عيال وصحة ... أب وأم وعيلة.. علي شوية صحاب جدعه وقعده حلوة علي البحر ونفس بتاخذة من غير وجع... ضحكة من القلب .. سلام نفسي ورضا غير كدةملكش دعوه بال 24 التانين بتوع اللي جمبك ربك عادل بيديك اللي أنت محتاجه وبس أرضي بنصيبك.. وقول الحمد لله انت متعرفش ورا كل نعمه حصل ايه.

لو سمحتوا انا عايزه اخد رأيكم في حاجه دلوقتي انا عندي ٢٧ سنه اتخطبت مره و محصلش نصيب والكلام ده كان فتره و للاسف مفيش حد بيتقدم خالص بحكم أني تقريبا زيرو علاقات و من البيت للشغل و من الشغل للبيت انا عارفة أنه نصيب و رزق من عند ربنا بس فعلا الموضوع صعب جدا

طيب ايه ؟ خلاص قفلت كدة يعني ؟! مش هنلاقي ناس نقدر نتقبلهم و يتقبلونا زي ما احنا يا اما نسخ تافهة مش فاهمين عاوزين ايه يا اما نسخ عاوزيننا احنا اللى نبذل مجهود يا اما نسخ كويسين جداا بس فيه مليون حاجة تمنع انهم يكونوا مناسبين لينا و بعدين يعني المفروض الانسان يعمل ايه و هو حاسس ان كل الحلول ،و كل اللى بيقابلهم ،و كل اللى المفروض عليه يعمله.. مش شبهه مش مريح مش مناسب !! هنفضل نمشي فى سكك شوية كويسين و نكتشف انها مش لينا و نلف و نرجع لحد امتى؟ الموضوع سخيف اوووي و مرهق نفسياً لاقصى درجة انك كل ما تبدأ كدة و تسمي الله ف اى حاجة شغل بقا ولا علاقات ولا صداقة حتى لو هواااية بعد كااام خطوة محترمين كدة بتتقفل ف وشك !! 😑 ماشي مش نصيبي تمام و بعدين برضو؟ اللي نصيبي ده بقا هيبان امتى ؟ و هل فيه علامه اصلا انه اه ده نصيبي ولا اصلا مافيش علامات لحاجة ولا مافيش خلاص كدة و ده عشم خايب و فرهدة ع الفاضي فى البحث عن حاجات تشبهنا ؟ و بلاش كومنتات الهزار عشان الواحد ع آخره اصلا 😑

الحمدالله بس انا حاسه نفسي تايهه وعمري ما كان ليا نصيب في حاجه بحبها انا ليييييه اتعلق بحاجات وفي الاخر تطلع موش من نصيبي ! ادام هي موش من نصيبي ليه تقف وتيجي في طريقي من الاول وليه احس ان خلاص الحاجه دي بتاعتي وفاجأه احس ان كنت بتعلم درس

كل الناس بتقول لو ليك نصيب ف حاجه حتيجي و لو ملكش نصيب ف حاجه مش حتيجي خايف اكون متعلق بحاجه مش نصيبي و خايف يتملكني اليأس و يكون نصيبي انا عايز حد يقولي بس المشكله الاكبر ان مفيش حد يقدر يعرف

سؤالي للشباب عشان محتاجة اعرف رآيهم في موضوع بما انهم شباب زي بعض انا اخويا عنده 26 سنة وييشتغل شغلانة كويسة بمرتب كويس الحمدلله وجاهز انه ياخد خطوو الخطوبة بس عمره ما فكر يتجوز زي باقي الشباب مابتفكر بقالنا فترة ماما بتكلمو في الموضوع شوف بنت ومش عارف ايه ورشحناله كذا وحدة شوف دي وشوف دي مفيش بردو يقولنا لا انا مش بفكر دلوقتي وكمان لسه النصيب مجاش هو اكيد الجواز دا نصيب انا عارفة لدرجة بابا قاله انا هساعدك في تكاليف الزواج متقلقش وانا معاك بردو مفيش انا اخويا وسيم شويتين تلاتة وبنات كتيرر بتكرش عليه من ايام ماكنا في المدرسة لحد الشغل وبنات كتير كانت تيجي تكلمني وتصاحبني لمجرد انا اخته وهو عارف دا كويس وساعات في بنات كتيرر يلمحوله بس بيطنش ومش بيدي اي اهتمام هو تقيل اوووي وهو عمره في حياته ماكلمنا عن اي بنت معجب بيها حتي ولا اي حاجة بجد ولما نسأله يااما يقولنا انا حاسس مش جاهز دلوقتي او لسه النصيب او خايف من المسؤولية وليه اعلق واحدة بيا دلوقتي وهو من النوع الملتزم دينيا شوية ومش بيحب جو الارتباط وكدا فهل دا طبيعي؟؟ هو كتوم اوي مبنعرفش ناخد منه كلمتين ع بعض فعشان كدا قلت اسأل يمكن حد عنده اجابة

مفيش حب من غير ما تكون جاهز تاخد خطوة ترضى ربنا فى اطار رسمى لكن للاسف كل الى بيحصل دا غلط وكارثة ومؤذى ليك وللشخص الى معاك وفى الاخر مش هيحصل نصيب وهتزعلوا فى الاخر وهتيجوا تصيحوا هنا حافظوا على مشاعركم 🙏

كنت واخد قرار ان هتقدملها وبالفعل كلمتها وهي كرد مبدأي كانت موافقه والدنيا كانت ماشيه كويس لحد ما فجأه الموضوع اتقلب وغيرت رأيها مع ان مفيش حاجه حصلت مني عشان اقدر اقول انا غلطت فكذا.. المهم انا من وقتها مش عارف اتخطي ده وهي فبالي دايماً مع ان الموضوع كان ماشي كويس عارف ان الموضوع قسمه ونصيب بس حد عنده حل اعدي بيه حاجه زي كده؟