مشكلة اجتماعية

السلام عليكم يا جماعة أنا عندي مشكلة بجد إني والله بقيت بكره المجتمع بشكل لا يطاق ، أنا حقيقي بقيت بكره أتعامل مع الناس ، ممكن أقعد شهر كامل في البيت بدون نزول و لو نزلت بندم جدًا على القرار ده

بمناسبه الصيف والمصايف ف انا كان عندي مشكله ، لي ميخلوش المصايف شباب بس وبنات بس ، يعني انا ك شاب بتحرج اننا امشي بشورت البحر بس ومن فوق مش لابس حاجه وسط الناس اللي بيبقوا ف نفس الشط و كل البنات والستات ده برده ، مع اني جسمي حلو وبهتم بأكلي ومع ذلك بتحرج لما الاقي ده بتبصلي وده بتبص ، دا غير اصلا ان ازاي بنت تشوف شاب كدا وشاب يشوف بنت لابسه مايو مجسم عليها وتحت مسمي مايو شرعي هو فين الشرعي فالموضوع ، وحرفيا الموضوع بيبقا مهزله وذنوب جاريه ، و انا عاذر الناس برده ، ازاي البنت هتعرف تغض بصرها عن شاب عامل فورمه بقا وعضلات بطن باينه وماشي ولا همه حد ، وانت كشاب هتغض بصرك ازاي عن كل البنات اللي هتلاقيهم معاك مالمصيف دول ، وسبحان الله كل واحد بيبقا ف احسن صوره ولا اكننا بنتزين لبعض وبنساعد في نشر الفتن ما بينا ، ف انا بيكون عندي اختيارين ، يا إما البس تيشيرت علي شورت البحر وانزل بيه المياه ، بس هيتقال عليا ان اكيد جسمه وحش ومخبيه ، يا إما هيتقال اني عبيط ، وانا ولا دا هقبله ولا دا هقبله

عندي مشكلة، عاوز أتعرف على ناس أو أصدقاء، بحس الموضوع صعب شوية أو مستحيل. مش عارف كل ما بحاول أكمل بحس الشخص التاني زهق مني أو مل، مش عارف إزاي الناس بيبقى عندها مجموعة أصدقاء كتير؟ هل بجد أنا طبيعي ولا العيب فيا؟"

انا عندي ٢٤ سنة شخص كنت انطوائي جدا وانا صغير بمعنى اني لو في قعدة مثلا والناس كلها بتتكلم مكنتش بفتح بؤقي وبفضل ساكت طول العقدة حتى لو اللي قاعدين دول قرايبي مثلا ولاد عمي او ولاد خالي وكدة هما أكبر مني بكتير بس انا لما كبرت ودخلت جامعة بدأت اعالج الموضوع ده والحمد لله بنسبة كبيرة جدا اتعالج الموضوع بالعكس انا بقيت اجتماعي بزيادة يعني بس الفكرة بقى ان مثلا لو اهلي راحوا حتة وانا مكنتش معاهم بعد ما بييجوا يقعدوا يقولوا ده كذا اللي هو ابن عمي قال انك اتدردحت (معناها اتنصحت وبقيت بتكلم يعني عشان اللي مش فاهم) واني مكنتش زمان كدة والموضوع ده بيتكرر كتير وانا بتضايق جدا من الموضوع ده ومبحبش حد يتكلم عليا من ورايا مش شرط يتكلم وحش ولكن الفكرة اني لما بقابلهم مبيقولوش الكلام ده فبيبقى نظرتي ليهم ان انتوا دلوقتي بتتكلموا معايا عادي بس من جواكم بتقولوا ده مكانش كدة وبقى بيتكلم وبحس بقى ان هما بيتكلموا معايا زي ما يكون شفقة انهم بيساعدوني ابقى بعرف اتكلم وكدة والمشكلة انهم بيكرروا الموضوع ده كتير يعني مفيش مرة اهلي راحوا عندهم إلا ورجعوا قالولي ده قال كذا ايه الحل يا اخواتي

اوقات ببقا محتاج جدا حد عنده طاقة اتكلمه معاه شوية ف انا هاقدر دة اوقات اني عاوز اتكلم مع بني ادمين و مبعرفش اتعرف على ناس جديدة عشان عندى مشكلة اني ما بعرفش افتح مواضيع وبستنا اللي قدامي يفتح الحوار علشان أدوس فيه

السلام عليكم ورحمة الله مشكلتي اني بحس اني متاخرة في العالم دة من نحية الزواج والاعجاب صحابي اغلبهم ارتبط والي اتجوز وخلف وانا مرتبطتش ولا بحب كلام دة مفيش مىة حد اعجب بيا ودة مسببلي تعب اعصاب واني مضايقة ومخنوقة طول الوقت عشان بحس ان عندي مشكله واني رفضي ل اني اعمل كدة مخليني ف زون دة