مسؤوليات

في حاجه اسمها انعدام شغف فعلا ولا دي حاجه وهميه اخترعناها علشان نعرف نتهرب بيها من مسؤلياتنا ؟ ( عندي انعدام شغف وزيرو طاقه ومسؤليات مينفعش اتهرب منها ) اللي عنده حل يقول او صوتوا يجماعه يمكن حد يلحقنا

انت كنت دايما شاطر وشبلت مسئوليات اكتر من اللي عقلك يقدر يستوعبها ارتاح شويه عشان تعرف تكمل معافره واوعي تبطل تبقي شاطر ومصلحتك اهم من اي شخص مفيش حاجه اسمها صحاب! هتكتشف في اخر المطاف ان محدش هيبقي فاضي لحد

تعبت اوي بجد والله جبت اخري من الهم والاسوأ اني مش عندي رفاهية اني ارتاح دلوقتي ضغط ضغط ضغط مسؤوليات مسؤوليات غم واكتئاب لما طفحته هححححح دعواتكم امتحاني بكرا وفاضلي بالظبط ٢٥ صفحه و٢٠ صفحة اسئله هذاكر الصفحات دي وابصمج الاسئله وزي ما تيجي بقا الماده سهله وكان قبلها ٥ ايام ووالله كنت ناوي اذاكر بس جالي دور برد ابن جزمه وبقالي اربع ايام مش بقدر اقوم لصلاة الفجر ف بالله دعواتكم عشان انا في امس الحاجه للدعاء ومش هنام الا لما اخلص الماده ان شاء الله

تعبانة جدا والبيت لا يسمح ، شكله لا يسمح ، معايا كورس مراكماه لا يسمح ، والمواعين لا تسمح والغسيل وكل حاجة ، شكل البيت مخلينى كارهة نفسى وكارهة حياتى .. والجو حر جدا.. نفسى اقوم اعمله ويخلص . بس انا تعبانة وواخدة أدوية .. ومحبطة جدا عشان مش عارفه اخرج من الدايرة دى

كان يجرى ايه لو عشت عمري صغير كان لازم اكبر يعني واشيل الهموم انا لما كنت زمان بقول انا عاوز اكبر عن كده مقصدش اني اكبر كده كان قصدي فـ مقاس الهدوم مكنتش اعرف أن دا حال الكبار الدنيا بتلاعبك هنا زي العبيط قطه وفار كان اقصى همي فـ الحياة اني مروحش المدرسة دلوقتي اروح المدهسة وافضل هناك طول النهار

صباح الخيـر🌸 انا بنت من صغري واقعة في حفرة التوقعات، وان اي حد بيتوقع مني حاجة لازم اعملها على اكمل وجه، وللاسف بسبب كدا بقى عندي عقدة الـPerfection ان اي حاجة ايدي تتحط فيها لازم تكون زي ما الكتاب بيقول مثالية، عارفة انه مافيش حاجة مثالية بس اللي اقصده اني اكون انا خلاص شايفة الحاجة تمام، اهلي حاطين عليا دايماُ التوقعات دي، بس خلاص تعبت، اول امبارح بنتكلم انا و بابا ربنا يحفظه ليا يارب هو اب عظيم و الله وسندي وانا ماليش اي لازمة من غيره ابدا، بس حسيت انه بابا ماعندهوش سياسة اني بنوتة وحقي اني اختار الراحة والدلع 😂لما اتكلمنا كان محور كلامنا عن الشغل بعد الكلية و هكذا فقالي حاجة معينة في دماغه ليا قولتله حلو ايه النظام في اشغل ده و كدا فقالي و هكذا يعني فجيت قولتله الشغل ده مناسب البنات عادي، انا قولت في نفسي ما اكيد بابا مش هيختار حاجة مجهدة وكدا، بس اتصدمت من اجابته، قالي لا مش مناسبة للبنات بس ايه يعني لما تكوني اول بنت، قولتله حلو وايه تاني، قالي هي شغلانة مجهدة و شاقة وبتنطلبي في اي وقت لازم تكوني موجودة وبتتحركي وبتعملي، وقتها ماما تدخلت وقالت ليه كل ده، وانا قاعدة كل اللي عليا اني ساكتة مابقاش فيه كلام و كنت بقطع سلطة فانشغلت بيها😂👈🏻👉🏻 المهم وقتها قال انها مجزية و منصبها و ترقياتها كويسة اوي وهعرف ادخلك فيها. وقتها حسيت انه ليه رغم انه بينفذلي كل حاجة بس في المعقول يعني، ليع مش حاطط في باله انه يريحني بابا طول عمره واخد عني فكرة اني كسولة و عايز يحركني بأي طريقة و قالي مرة والله اعلم يمكن غصب عنه، قالي يعني انا اصرف عليكي كل ده و ادخلك كلية وفي الاخر تاخدي الشهادة وتقعدي بيها في البيت و تتجوزي، وقتها ماكانش عندي رد، انا لو غلطانة كد يصححلي مفهومي لاني حقيقي تعبانة من التفكير وحاسة اني مهما عملت علشان ارضي ماما وبابا مش بينفع، انا البنت الكبيرة و شايلة حاجات كتير اوي وبعمل حاجات كتير اوي اوي اوي غصب عني علشان بس ارضيهم و الله، وليا اخا صغنونة خالص 3 سنين دي بنتي وشايلة مسئوليتها من يوم ما اتولدت، انا في حاجات كتير عليا علشان ارضيهم وبردو مش بسلم من الانتقادات و المقارنات، انا وصلت لمرحلة اني بخاف اقعد مع ماما ولا بابا اتكلم معاهم في حاجة لانه ايا كان المةضوغ اللي بتكلم فيه فهو بيقلب انتقاد بشع بيخليكي اتمنى ولو اتقطع لساني قبل ما اافكر اتكلم

اكتشفت ان انا غبي ، ااه والله غبي بضيع حياتي في فتره المفروض انها الزهور وان الفتره دي لما افتكرها في المستقبل اقول يااه كنت مرتاح كابتن انت عليك مسؤوليات وعليك ضغوطات وكل حاجه مقولناش لا ويمكن تكون اكبر من سنك بس فوق انت اهم شخصك اهم حياتك اهم مش عايز ابقا الشخص اللي كرس حياته للمذاكره او للشغل لدرجة انه نسي حياته وتخيل بعد كل دا انا ضيعتهم كلهم ، لا مني كسبت دا ولا دا ولا حتى نفسي ف هعمل توقف للحظه كدا لحياتي كلها ، لكل التاسكات لكل الاحلام لكل الانجازات لكل حاجه وهعتكف لحد ما ارتاح واظبط نفسي مش عارف الفتره دي هتستمر لحد امتا بس اتمنى متطولش وتجيب ثمارها بجد وكل فتره كدا هشارك مقتطفات منها ممكن تعبر البوست دا اشاره ليك برضو عشان تعدل حياتك دمتم سالمين ودعواتكم لي بالهدايه

ازاي ممكن 'صدفة النصيب' تحصل للي حياتهم محصورة بين الشغل والبيت؟ لما تكون دايرة الأصدقاء محدودة والوقت كله ضايع في الشغل و المسؤوليات، إيه هي الحلول العملية عشان الواحد يقابل شريك حياة حقيقي ؟

حاسس اني لازم أوقف كل حاجة حواليا دلوقتي حالا، مش قادر أواكب كل حاجة بتحصل حواليا، عايز اوقف كل الأنشطة واقفل موبايلي وامسح كل حاجة واخد وقت اسكت فيه المشكلة اني مش قادر اعمل دة، ارتبطت بحاجات لازم تخلص ومسؤوليات مع ناس وفي نفس الوقت عندي فاينل اصلا بعد 3 اسابيع ومعملناش حاجة مش ملاحق على أي حاجة وكل اللي في بالي اني محتاج أوقف الزمن وألغي كل الأحداث اللي في حياتي واختفي أو أموت بس حرفيا بقيت بسلك للحياة عشان اعدي الكام سنة دي وأموت

هاي .. انتوا عارفين الواحد لو يبطل يحس بالذنب تجاه اى حاجة و كل حاجة حواليه هيبقى اخف و احسن بكتير بجد مش هيبقى دايما حاسس انه تقيل و حاسس انه كان لازم يعمل حاجات هى اصلا مش فرض عليه بالعكس دي مسؤوليات غيره اصلا لو رمي من جواه إحساس ( لا لازم اعمل لهم لاااازم اساعدهم و اصل هما مش هيعرفوا يعملوا ده زي ما هاساعدهم) و يخلي كل الحاجات اللى بيقدمها دي لنفسه الوضع هيكون الطف كتير اوي له اصل ف الآخر بيتقال له ماحدش ضربك ع ايدك عشان تعمل لنا 🙂 ولا الاسوء بقا انك تتلام عشان غلطت فى حاجة صغيرة لا تكاد تذكر اصلا او بمعني اصح ماعملتهاش زي ما هما عاوزينها بالملي ( مع انهم اصلا هما نفسهم لو عملوا اللى ساعدتهم فيه هيكون نتيجته اسوء بمراحل بس هو قصر ديل منهم سوري يعني 😂 ) الناس اللى حوالينا بلا استثناء بجد ماتستاهلش اى تضحيات و حرق بنزين جامد عشانهم ف ياريت ماتقدمش اكتر من طاقتك لاي حد عشان يوم ما هتحتاج طاقتك دي و جيس وات برضو مش هتتشاف حلو عشان ضحيت .. هتتشاف ساذج 🙂 ف اعمل لغيرك بس بالمعقول و ماتجييش ع نفسك عشان اى انسان ايا كان مين باي 😌👋🏻

بتكرر نفس السيناريو مراكماات مراكمات وصولا لاخر وقت خالص والفرق عن قبل كدا ان مسؤولياتك (اللي حطتها على نفسك زادت ) ادركت فعلا وصدقت اني مكنتش استاهل اكتر لان انا اللي عملت كدا وانا اللي بعمل كدا ف شكرا يارب على حكمتك امكانياتي كانت تجيب طب السنه اللي فاتت بس حكمة ربنا انا مستاهلش الا تجاره ف اللهم عونك ووفقني في الخطوات اللي بمشيها

بجد الواحد بقي اربعيني مش حاسس ان العمر عدي بسرعه كده ...حاسس ان عمري ما عملت حاجه انا حبيتها ... كل حاجه مفروضه عليا ... سرعه الحياه ومتتطلباتها وان في رقبتك اولاد وبيت وانك لازم تستحمل كل حاجه مخرجاني عن شعوري

يا الله مش عارف هنفضل نقول لامتى لو مش قد مسؤوليات الجواز ممتنيلوش تتجوزوا وتخلفوا لكن ليه تتجوزوا وتفضلوا قاعدين فى مشاكل كل شوية ووجع قلب حسبي الله ونعم الوكيل الواحد كل ما يطلع خطوة يرجع الف بسببهم حسبي الله

اتعامل ازاي مع فكرة اني بدأت اكبر و المفروض اشتغل و اعتمد على نفسي و احاول اخفف ضغط المصاريف على أهلي مع اني دخلت كلية طبية دراستها صعبة و محتاجة مجهود كبير و مذاكرة مني منغير تقصير عشان اكون شاطرة في مجالي مش عارفة ابدأ منين حاسة بتوهان و المفروض اتحرك بس انا واقفة مكاني

عارفين احساس ان وراكم كوم حاجات مفروض تخلصوها و قاعدين تضخكوا بس اهو ده انا بس انا بضحك علي خيبتي بقا وكستي يانهاري اسود عليا ده انا في البايظ خالص والمشكلة انهم فكرني في التمام يارب فكها عليا بقا

انا عندى ٢٣ لسة مرتبطش لحد دلوقتى ولا مرة و معنديش صحاب بنات بشتغل كتير على حياتى المهنية و الاجتماية و المادية بس انا شايف ان حياتى العاطفية حتأثر على دول فمنعها و الفكرة اوقات بحس انى عايز ارتبط و اوقات بحس انى مش محتاج احيانا بحس انى محتاج دعم عاطفى و احيانا لا يعنى من الاخر احيانا بحس ان مفروض تكون فيه حته طرية فى حياتى بدل مهى ناشفه 😂😂 بس الموضوع دة بيدخلنى فى مسؤوليات انا مش قدها دلوقتى انا عايز ابنى مستقبلى كويس و اصلا مستقبلى انا محتار فيه و مش عاؤف اللى انا بعمله دلوقتى دة هو اللى حيوصلنى للى انا عايزه ولا لا

شباب هل طبيعي اني اشتغل كل يوم 12 ساعة +4 ساعات مواصلات رايح جاي أنا مش يشتكي بس بسال هل في حد بيعمل كدا ووسط دا كله مطلوب منك تقعد مع أهلك وتشوفهم وتفكر في جواز أو خطوبة وغير كل دا مطلوب منك تطور من شغلك عشان متتركنش أنا حرفيا كل يوم 16 ساعة برا البيت واحيانا ببات في الشغل اكتر من يوم طب أنا كدا مقصر حاسس اني مقصر عشان مش بطور من نفسي مش عارف انا في دوامة بقالي فترة انا تقريبا كل مشاعري استنزفت مبقتش بتضايق من حاجة أو بزعل مش بشوف اهلي مش بشوف حد حتي اجازتي بنامها عشان اقدر اكمل الاسبوع الجديد اللي هيبدا لو حد عنده إجابة يفدني

حوار الانطفاء دا مستفز بالذات وانا ف عز احتياجي لنفسي مره واحده انطفيت وطاقتي خلصت ومش عايز اعمل اي حاجه وانا ورايا مذاكره وشغل وحاجات تانيه اكتر واكبر مش فاهم ليه بجد مخنووق اوي كدا انا الفتره دي تقريبا اهم فتره ف حياتي وبجد مش فاهم ليه كدا