قرايب

"هو إحنا امتى بقينا بالقسوة دي؟ وامتى الدم بقى مية؟! أنا بقالي فترة بـعافر وبتعالج من جلطة في رجلي.. المرض لوحده كفيل يهد جبل، وقلة الحركة بتكسر النفس. بس كل وجع الجسد ده كوم، والضغط النفسي والكلام اللي زي السم اللي بشوفه من قرايبي كوم تاني خالص! بدل ما ألاقيهم سندي، بقيت بسمع منهم كلام يوجع ويذبح ويحسسني بالعجز وأنا في عز ضعفي، وكأن المرض ده ذنب أنا اخترته لنفسي! مفيش إيد واحدة اتمدت، ولا حد رفع سماعة تليفون يطمن بكلمة، وفعلاً قسوة القريب بتوجع وتكسر أكتر من المرض بمراحل. أنا مش مستني من حد منة ولا جميل، كان كفاية عليا كلمة حنينة تهون عليا قعدة السرير.. بس الشكوى لغير الله مذلة. بفضفض معاكم هنا عشان حقيقي طاقتي خلصت والنفسية تحت الصفر.. مش محتاج غير دعوة صادقة من قلبكم بالشفاء العاجل، وإن ربنا يقويني ويصرف عني أذى اللي حواليا."

السلام عليكم ورحمة الله وبركاته مجرد مناقشة لموضوع محيرني وانا اعتقد اني شِبه واخدة قراري لكن هعتبر كلامي نقاش مفتوح عامةً . رأيكوا في جواز القرايب "وفلاحين ، مش بعيب فيهم دول على عيني والله لكن اقصد المكان والمعيشة اكتر"؟ فلان قريبي متقدملي يعني تقريبًا ليه كذا مره وبرفض لكن عطيته فرصه واتكلمت معاه وهكذا بس كلامه وأفعاله بصفه عامه شخص كويس لكن بصفة خاصه ليا مش لاقيه اللي أنا عايزاه أو بمعنى أصح هو فيه حاجات من اللي بتمناها أكيد لكن الحاجات اللي نفسي اعيشها فعلا واعملها مش حساها معاه ولا حاسه اني هلاقي نفسي معاه بس اهلي وعيلتي شايفين لا مناسب وابن حلال وكل الكلام دا بس محدش فاهمني ، مش حاسه ان دا الشخص اللي هو اقدر اتكلم واعتبر بأريحيه عن كل اللي نفسي فيه رغم أنه من كلامه معايا في المره اللي حصلت كان باين أنه متفهم بس مش حساه ، مش حاسه ان دا اللي اقدر آجي اشاركه اهتماماتي ويفهمني ، مش حاسه ان دا اللي هيفهم شعوري المتلغبط ووصفي اللي غير واضح للأشياء اللي جوايا أو اللي عايزه اعبر عنها ، وكمان مش حاسه عيونه حنينه أو مش العيون اللي هرتاح وقت ما ابصلها "اتمنى محدش يتتريق عشان حقيقي بركز في العيون جدا يعني فوق الوصف" ، جماعه عارفين الحياه أو الشعور اللي تحس لونه بني ودافئ كدا؟ اهو دا اللي نفسي فيه اتمنى حد يفهمني بجد مش عارفه أعبر😭 ف من كتر كلام أهلي حقيقي بقيت حاسه مثلا اني عبيطه أو تفكير عبيط وطفولي وإني مش هلاقي شخص كدا وإني اختار اللي بيحبني وشاريني احسن وكل الكلام دا فحقيقي حاسه بِحيره مش طبيعيه بجد

صباح الخير عليكم كونت عايزكم تنصحوني انا شاب لسا في بدايه حياتي ربنا الحمدلله مبتليني بمرض في رجلي بقالو معايا تقريبا ٤ سنين قبل المرض كونت حاجه كويسه جدا بشتغل وحالتي المدايه كويسه ومستويه التعليمي كويس بس لما تعبت بقيت قاعد في البيت لا شغل ولا اي حاجه قرايبي بقا مش سايبني في حالي يابني انزل الشغل بنزل ولله ياجماعه بتعب واخرها من قبل العيد نزلت وضغطت علي نفسي وقاعت تاني والمرض رد عليا ٣ اضعافو مبقتش بقدر امشي علي رجلي خالص انا فكره الانتحار بتيجي في بالي كتير انا صدقوني مش حاسس اني ليه قيمه خلاص حاسس نفسي انتهيت

احكي واقول اي اقول إن مش عارف ان مالى أو اي المضايقني اقول إني مش عارف سبب إني مش قادر ارجع اشتغل زي الاول او اتعامل زي الاول طيب قولولي مين لسه زي الاول متغيريش الحبايب بقو أعداء والقرايب بقو أغراب حتي انا مش عارف نفسي حاسس إني ديما في حاجة غلط بس قادر افهم اي هيا

المرادي فعلا الموضوع مشكلة بالنسبالي، انا مش بتضايق من الناس انا فعلا ببغضهم انهاردة سافرنا ورحنا لقرايبنا اللي انا متربي معاهم وطفولتي كلها معاهم، المفروض ان دول فعلا هما اقرب ناس ليا في العيلة أو على الأقل كانوا، انا قاعد كارههم، مش كاره القعدة ومتضايق لا انا كارههم هما شخصيا فعلا وانا قاعد كل حد فيهم بيتكلم انا قاعد احلل طريقتهم وكلامهم وقاعد اطلع لنفسي قد ايه الشخص اللي قدامك دة سيء من أبسط الحاجات يمكن انا فعلا مقتنع بكدة يمكن بيرفيكشنزم يمكن خرا مش عارف اخر ما زهقت قمت عامل نفسي نايم دلوقتي ويارب ما يجوا ناحيتي، وهياخدوا مني موقف بس طز الموضوع قلب معايا بكره حقيقي ايه الحل

ممكن اخد رأيكو في حاجة انا ممكن اساعد حد يلاقي زواج يعني عندي قرايبي بنات مش مخطوبين وبلاقي ناس بتعمل جروبات كدا او بتنزل مواصفات عريس مثلا وفي جروب واتساب انا فيه بس مش عارفة اساعدهم ازاي يعني اقولهم ازاي في جروب كذا واحنا مش مترابطين اوي ان نعمل كدا او حساها حركة عيب يعني مش عارفة ولو سألت مثلا صحابي او كدا بردو حاسة انه غلط ولازم استنى لما حد يكون عنده ويقولي🥲

عندي مشكلة ومش عارف ايه الحل انا شخص بحس بضيق لما حد يكون ليه جميل عليا أو على الأسرة عمتا حتى لو الحد ده من قرايبي يعني لو حد عملي خدمة بحس بضيق وإني لازم اردله الجميل ده والاحساس ده مش تكبر بالعكس انا شخص مش متكبر نهائي يعني وهو الشخص ده بيعملي الخدمة بكون عادي ومبسوط ان في حد جدع معايا بس لما الخدمة تخلص برجع احس نفس الشعور لدرجة اني بكون مش عايز اشوف الشخص ده غير لما اردله الجميل حتى لو انا كنت عامل ليه خدمة قبل كدة لازم احس اني عايز اردله الخدمة نصايحكم يا اخواتي

كنت بتكلم دايما إن عندي جفاف عاطفي شديد وتفكك أسري، وكل ده من فترة كده حوالي 3 شهور روحت زيارة عند ولاد عمتي كان أغلبهم أول مرة أشوفهم في حياتي بنت بنت عمتي عملت جروب ودخلتني فيه أنا وابن عمي وبنتين كمان هما برضو بنت بنت عمتي بس من عمة تانية والناس دي كنت أول مرة أشوفهم المهم دخلت معاهم الجروب واللي عملت الجروب كان لها تصرفات غريبة بحكم سنها وهي في 2 إعدادي لقيتها بتشتغلني شتائم عيب قالتلي أنا هد قرك وهعمل فيك وهعمل وهعمل وكنت بسكت ومش برد ولما قولت لابويا وكده قولتلو بنت بنت اختك بتعمل معايا واحد اتنين تلاتة قالي معرفهااش أنت عارف أن محدش يعرف التاني يبني. وأنا كبرت دماغي وفي نفس الوقت كانت تقولي بحبك وأنا أقولها شكرا وكانت تشوفني تعوز تحضن..ني وأنا برفض آخر مرة شوفتها كان في فرح اختها زعقت فيها جامد بسبب تصرفاتها وقولتلها عيب اللي أنتي بتعمليه ده احنا أخوات قالتلي حاضر وقولتلها متزعليش قالتلي أنا زعلانة أنك بعيد عننا أنت شايف احنا قرايب منعرفش بعض انت هتكرر نفس غلطات العيلة دي؟ قولتلها هتكلم حاضر بس الحركات بتاعتك دي تنتهي قالتلي حاضر بس ممكن طلب قولتلها اتفضلي لاقيتها قلعت دبلة وقالتلي انزل على ركبتك ولبسهاني روحت مشيت ودخلت قاعة الفرح تالت ولا رابع يوم دخلت صاحباتها على الجروب وبقيت أنا بس وواحد تاني ولاد والباقي بنات خلت صاحابها يقولو أنها عملت حادثة وفي المستشفى وكله اتخض عليها العيلة بلغت بعضها هي بعتت ريك بعدها بتضحك وقالت ضحكت عليكو كلكو هههههه راح كله خرج من الجروب وأمها اللي هي بنت عمتي كانت في الجروب خرجت وكله خرج وهي قالت بنتي قالت إنها بتحبك أنت وابن عمك وأنا خليتها تخرج من الجروب وخلاص كده. المهم من ساعتها وأنا مكلمتهااش تاني بس متضايق من فكرة صلة الرحم أن عيال عماتي أول مرة أشوفهم وليا عم وعمة توفوا وعمي مشوفتهم. بفكر أخش أسلم عليها هل تنصحوني أعمل كده ولا خلاص الموضوع انتهى أنا الباقي بكلمهم عادي بس على القد أوي ومناسبات فقط ومعرفهمش أوي هي لا خالص من ساعة الموضوع ده هل أخش أسلم عليها ولا بلاش؟

جماعة سؤال لو سمحتوا لو اتظلمتوا ف شغل مع قرايبك و شوهوا سمعتك ف الشغل و أما معتذرتش ليهم ف شوهوا سمعتك ف العيلة و انتي مظلومة حرفيا ومش عارفة تدافعي عن نفسك لأن محدش هيصدقك و الكل ضدك تعملوا ايه ؟؟؟؟