انا شخص بيفقد الشغف مهما كان بيحب او مهتم ب الحاجة الى بيعملها .. يمكن دا بسبب التشتت الى حصلى ف كذا إتجاة بين إنى اعمل الحاجات الى بحبها حتى لو مش مهمة ف نظر الى حوليا وبين إنى اعمل الحاجات الى تخلى شكلى بعمل حاجة مهمة قدامهم ..ايوا انا بتأثر بكلامهم كنت بتأثر بشكل أكبر زمان دلوقتي لا.. يعنى انا مثلا طول فترة التعليم مكانش ليا إختيار فأى حاحة حتى الكلية الى دخلتها مكنتش بحبها ولا شايفة نفسي فيها بس المهم إتخرجت حاولت أشتغل ف كذا حاجة عشان بس أتشاف انى بعمل حاجة ايوا انا كنت بحتاج أحس انى متشافة من أهلى .. جربت اشتغل ف شركة ليها علاقة بالاتصالات وشركات تسويق حتى انى نزلت اشتغل ف صيدلية .. كنت ببقى تايهة بجد ومش عارفة اتعامل ولاأكون علاقات مع اى حد ف الشغل كنت ببقى ف حالى غير انى مكنتش بطول نفسي مكانش طويل .. انا كمان ف العلاقات الانسانية بعيدا عن الشغل نفسي مش طويل سواء صداقة أو لو مشروع إرتباط مجرد م بحس انى مش بتعامل المعاملة الى استحقها مش بعافر كتير وببعد.. دلوقتي انا عندى ٣١ سنة مفيش حاجة بكمل فيها حتى لو بحبها او ع الاقل مش بركز فيها لوحدها أنا رسامة نزلت كذا كورس من ديكور ل رسم زيت وباستيل وفحم بس مثلا لما نزلت فنون جميلة رسم زيت الدكتور الى كان بيدربنا قالنا اننا لو إشتغلنا ع نفسنا جامد هيخلينا نشارك في معارض .. انا كان عندى مشكلة مع الالوان بحب الابيض والاسود اكتر ف هو خلانى اتدرب كتير ع انى استخدم الالوان وقالى انى هيطلع منى حاجة كويسة بس فجأة فقدت الشغف وقررت مروحش حتى أغلب ادواتى كنت سيباها ف مكان مرجعتش اخدتها.. ف نفس الوقت كان عندى براند حلويات وكنت اتعرفت وسط الناس وكان عندى بيدج وبعت كتير بس تعبت ف لحظة ومكملتش بدون مقدمات.. بعدها لقيت شغفى ف الكتابة ف نزلت قصر الثقافة والكاتب مدح طريقة كتابتي بس برضو مكملتش.. بعد كدا بقيت بحب أصور أكتر أصور كل حاجة ومع التصوير إهتميت بالكاترينج بحاول اعمل أكل او حلويات ف البيت وأصورهم بشكل لطيف وانزل الصور مش فكرة شغل ع اد م انى بعمل حاجة بحبها لكن برضو مش بعمل دا طول الوقت.. حاجات كتير برضو زى مثلا انى كل فترة بحاول احفظ قران وفجاة مش بكمل .. نزلت الازهر انا وماما ناخد دبلومة ف العلم الشرعي فضلت لقبل الامتحانات ومكملتش .. بيكون نفسي كتير مثلا انزل اخد كورس إنجلش لانى مش بمارس اللغة بقالى كتير فحاسة ان حاجات كتير وقعت منى وأكلم مكان وابقى عايزة احجز بفقد الشغف فجأة .. وانا مش من النوع الى بيخرج كتير ولا بتكلم مع حد كتيى تواصلى مع الناس قليل اوى مع انى لما بكون وسط ناس بتفاعل عادى وبهزر وبضحك بس انا بحب اكون لوحدى. أكتر.. بحب البيت وجو البيت وبحب يكون ليا أوقات اقعد فيها لوحدى أهتم بالزرع أعمل حاجة حلوة أعمل نسكافيه زاقعد أقرأ او اتفرج ع حاجة ومعنديش مشكلة اكمل حياتى كدا بس دايما الى حوليا محسسني انى كدا فيا حاجة غلط.. ولما بحاول أعمل حاجة مش ببقى عارفة اعمل ايه بالظبط لان رتم حياتى من الاول كان كله تشتت وطريق مرسوملى بمشي عليه فلما إتحطيت ف موضع إختيار بقيت مش عارفة المفروض أعمل ايه او أنهى الصح ف مبقتش بكمل فأى حاجة..