علاقة عائلية

بابا كان كويس معايا طول حياته، عمره ما ضربني ولا مد ايده عليا، كان بيحضني وانا صغير وبحبه جدا، ولسة موجود لحد دلوقتي ومش منفصل عن امي ولا مكرهنا في عيشتنا ولا أي حاجة بس انا مش بعرف اتعامل معاه، حرفيا بعامله كإنه حد غريب في البيت ضيف عندنا، ولما بيغيب مثلا او كدة بكون مرتاح وحاسس ان البيت دافي وان مفيش حاجة ناقصة، ولما بيكون موجود بكون متوتر جدا طول اليوم، انا بحبه جدا بجد بس في بيني وبينه مسافات كبيرة اوي وهو حرفيا بيعملنا كل حاجة بس انا معرفش مالي زيي زي اللي ابوه مش موجود تقريبا اللي حصل دة كان بدأ من تلات سنين وقتها كان مستوايا الدراسي منحدر ومستوايا في كام حاجة كمان ووقتها انا بعدت اوي عنه وفعلا وقتها مكنتش بطيقه من المعاملة السيئة اللي كان بيعاملهالي دلوقتي محدش فاكر الايام دي، حتى انا نفسي ناسيها بس أدركت قريب ان دة كان بدايته من كدة الحمد لله على كل شيء

عايزه اعرف بتتعاملوا ازاي مع ماماتكم او اهلكم لو كل شويه بيضغطوا عليا بالكلام ! يعني ماما علطول مبتريحش نفسها بس بتشتغل وهي مش بتسكت لا بتفضل تتعصب عليا لو شربت كوبايه شاي مثلا وسيبتها شويه هي متستحملش تشوفها وتغسلها وتفضل تزعقلي ، خرجت مثلا حاجه من مكانها ونسيت ادخلها هي تدخلها وتتعصب عليا ، المشكله ان عارفه اني انا غلط وبنسي كتير وكمان هي معودتنيش علي كده من زمان بس انا ف نفس الوقت سعات بكون مضغوطه والكلام والعصبيه والنكد بيعصبني ، يعني حتي مش بتديني فرصه ادخل انا الحاجه او اعملها برواقه لا لازم تصحي الفجر تصلي مثلا وتفرك بقي غسيل ترويق تنضيف وانا مش كده خالص ولا بحب كده دا ممكن تعمل الغدا وتصحيني من احلي نومه اتغدي مثلا بس مش دايما بس انا مش بحب كده وتتعصب برضه وهي بتصحيني انها محدش ساعدها وهي لوحدها شغاله مع اني قولتلا ترتاح ميت مره وانا هعمل علي مهلي بس مفيش فايده

طول الوقت بحس ان ف حاجة كبيرة جدا نقصاني والسبب ف دا للأسف هي ماما، شخصية لسانها صعب ومش بتراعيني ولا مهتمه ل مشاعري ولا تعبي، اهم حاجه الحاجة اللي هي عايزاني اعملها، سواء شغلي او شغل البيت، يعني النهارده مثلا شيفاني تعبانه جدا ومع ذلك قمت ساعدتها بس ع مقدرتش اعمل حاجه معينه حرفيا سمعتني كلام صعب وبتدعي عليا، وبتفتكر اني بتدلع! دايما شايفه ان بابا مدلعني، وبسبب كلامها علاقتي بيه بقت وحشه، طول الوقت بفتقد حتته الحنية، نفسي متقارنش بطوب الأرض ع كل كبيرة وصغيرة، نفسي احس يعني اي حضن ام ويعني اي حنيه الأمهات اللي بيقولو عليها بدل ما واحده بتدعي عليا اكتر ما بتتتفس 💔، نفسي تبطل تخلي كلام الناس يأثر عليها كدا وف الرايحة والجاية تعايرني اني مشتغلتش بشهادتي او متجوزتش او او، ونا لسه يادوب ٢٢ سنه مستنيه مني اي بجد انا تعبت 💔 استغفرالله العظيم والله بس بحس اني مبحبهاش ومش طيقاها بجد غصب عني

أولا أنا متخطيتش ومش عارفة ازاي اتخطى الموضوع ثانيا أنا مختلفة عن قصتكم شوية لأني شايفة أنه أنا الشخص المؤذي في العلاقة أنا عندي ابن عمي سننا متقارب فرق بينا بس سنتين وأنا معنديش أخوات أولاد ف هو كان بالنسبة ليا أخويا الكبير اتربينا مع بعض وكنا في المدرسة مع بعض يعتبر بتحامى فيه أنه أخويا الأكبر مني معاي ف المدرسة بيحميني من أي حاجة وكل حاجة كان بيجيبلي أي حاجة عايزاها من غير ما أطلبها حتى.. لغاية ما كبرنا ووصلنا الجامعة كنا في نفس الجامعة وعلاقتنا ما زالت زي ما هي حلوة وبما أنه هو أكبر مني كان دائما بيساعدني في أي حاجة مش عارفة أذاكرها أو مشروع مش عارفة أخلصه يعني كان بيسهل عليا الدنيا حتى فترة ثانوية عامة هو أكتر حد كان مهونها عليا لكن للأسف آخر فترة لاحظت طريقته اتغيرت معايا بقى بيتعامل مش بطريقة الأخوات اللي متعودة منه عليا حسيت أنه بيتقرب مني بشكل تاني وبيلمح لأنه بيحبني وعايزنا نرتبط ف أنا بوظت العلاقة عشان مديهوش أمل بأنه في مجال لكدا لأنه هو بالنسبة ليا أخويا وبحبه كأخويا مش زي ما هو بيفكر فيا أنا جرحته اوي وحاسة إني مؤذية اوي بالذات أنه هو عمره ما أذاني بس حسيت لو علاقتنا استمرت زي ما هي ده هيديه أمل أنه ممكن يكون بينا حاجة بعدين أو أنه يحبني أكتر مش عارفة أتخطى اللي عملته وكد ايه أنا كنت مؤذية معاه

ابويا مكنش كويس اوي معايا في طفولتي و لحد دلوقتي عندي ليه مواقف لحد دلوقتي منسيتهاش و مش هنساها با صراحه المهم انه الفتره دي او عموما السنه بيحاول يتقرب مني و يتكلم معايا اكتر و معرفش ايه و انا فعلا بتفاعل معاه نوعاً ما ( و غالبا ببقا مش مرتاحه ) بس بردو بفتكر سلبياته و احس اني خلاص هكرهه مدي الحياه و حرفيا لما يعمل اللي كان بيعمله فيا مع اخواتي بتجيلي حاله ببقا مش طايقه الصوت و بحس با نوبه غضب و توتر غريبه و ممكن ادمع غصب عني المهم عموما هوا لما يحاول يتفاعل معايا ساعات مش بديله فرصه او اديله نظرات حقد غصب عني و عموما مش بفضل اقعد معاه لوحدي في نفس الاوضه المشكله فيا؟

بجد لي الأمهات كده بجد لي اكون بعمل كل حاجه عشان ارضيها وفي الاخر تنيمني كل يوم مقهوره لي مش بتحس بيا لي قاسيه عليا كده عارفين اخر حاجه قولتلها تعبتني ياامي قعدت تدعي عليا وتشتمني وتقولي اني باجي عليها الي هو اي ياامي اعمل اي تاني عشان ارضيكي ابوس رجلك ولا اعمل اي اكتر من الي بيعملوا ورغم دي بعشقها بحسها توكسيك اوي بس هي امي وهفضل احبها لو اي حصل الفكره أن الحوار مآثر علي قلبي جامد بس يعني خير

حسيتوا مره ان الأهل ممكن يفرقوا ما بين أولادهم خصوصا لو ولد وبنت طبعا الاب والام بيطلع منهم تعامل خاص كدا ، حب اكتر ، تقدير اكتر ، احساس بشع لما تكون مستني من باباك يعاملك بنفس الطريقه اللي بيعامل بيها اخوك بنفس حتي نبرة الصوت بنفش بشاشة الوجه ، ياااااه لو شافوا نفسهم كيف بيفرقوا ما بينا انا اتقالي كلمه مش ممكن انساها من بابايا (انا هاخد منك ايه) برغم أن عدي علي الجمله دي ٣ سنين إلا أنها واجعه قلبي كل ما ببص في وجهه بحسه بيقولها ، طب كنت جبتني ليه للدنيا لما انت عارف مش هتاخد مني حاجه ، كنت كبرتني ليه وسمعتني الكلام دااا. جايز انا رافضه فكره الارتباط والزواج بسبب الجمله دي ، وكل دا ليه ! علشان كنت حابه اكمل تعليمي وأمسك شهاده عاليا، كنت بدعي ربنا من كل قلبي علشان ادخل كليه قمه علشان ارفع راسك يا بابا لكن للاسف بسبب كلامك الؤذي نفسيتي انكسرت واطحطمت قد ايه قلبي مكسور وواجعني من الجمله دي حقيقي ي بابا انت طلعت بنت مشوهه نفسيا ، معندهاش ثقه ف نفسها ، داخله ف حالة اكتئاب ، ولسه بتسألهم في البيت هي مالها ، ليه منعزله ووقتها كله نوم ، للدرجادي انت مش عارف؟؟ بجد من كل قلبي ي رب اخدني انا من حياته لانه مش هياخد مني حاجه يا ريت ما تفرقوش ما بين أولادكم لانكم مش بتكونوا شايفين دا ، لكن بيكون واضح لينا جداا حبوا وافهموا وشجعوا أولادكم ما تعملهوش علي أساس أن دا ولد يبقي دا افضل أو احسن من البنت لأن النفسيه لما بتتكسر من الأهل مش ممكن تداوي ابداااااا . دعواتكم ليا

انا ابويا كان علي طول بعيد عني كان عايز يخلف ولد لان كان فوقينا بنات خلف ولدين وانا التالت كان لا يفقه عني شئ كان ممكن يتلغبط انا ف سنه كام لحد اما كبرت بقا وهو علي طول بعيد انا كبرت علي البعد دا وخلاص اتسستمت كده بس كنت احس بالبعد دا جدا جدا لما اشوف ابهات زمايلي عاملين معاهم ازاي بقول اي دا هو في اب بيعمل كده اصلا ف اكتشفت انه حارمني من حنية الاب طول عمري ودا اكتشفت تأثيره ف جوانب كتير غلط ف حياتي كنت فاكر انا السبب فيها كبرت من غير حضن اب وسط صحابي بحس اني يتيم الاب وابويا عايش لما بزعل او اتخنق واضايق من اي حاجه بحس اني محتاج أشكي لحد ياخدني ف حضنه ويطبطب عليا لا ابويا عمره ما اخذني ف حضنه عمره ما بص ف وشي عرف اني زعلان من حاجه عمره ما قالي مالك حتي وقت الثانويه العامه جبت مجموع كبير سلم عليا كده وقالي جدع وانا كنت اشوف فيديوز الناس ف ثانويه عامه فرحة الاباء الرهيبه مشوفتش ١٪ منها فيه دخلت كليه بعيد عن محافظتي وسافرت برا بلدي لأول مره ف حياتي عمره ما رفع علبا سماعه يتطمن عليا سمعت صوته بعد شهر ونص غربه كانت فلوسي خلصت وكلمت حد من اخواتي قاله فرن عليا قالي اي الأخبار انا بعتلك فلوس بس وانا معرفتش أقرب منه ب نفسي وانا بعيد عنه هل انا علي بعدي ده اتلام او اتحاسب اني عاق ب نسبه مثلا طب هو عودني ورباني علي بعده انا ازاي هقرب منه انا مكرهتهوش بس بردوا محبيتهوش وانا جاهدت علشان مكرههوش علي فكره انا شوفت كم خناقات ليه مع والدتي علي معرفته بالستات لدرجة انه مشي مع البيست فريند بتاعة امي وهي مستحمله كل دا وكانت تقعد من غير اكل ولا شرب لحد ما تقع من طولها قدامنا كل دا كان بيحصل وانا بطلعله أعذار عشان اقتنع ومكرههوش وعمره ما بطل يعرف ستات لحد دلوقتي ولا عمل لينا ف ولا مره حساب انا واصل معاه ل نقطه انا فخور اني وصلتلها انا مش بكرهه بس مبحبهوش والسؤال اللي مدمرني هل انا علي إثم اني مبحسش بحب ابن لاب ناحيته هل انا عند ربنا هتكتب عاق لاني مبحسلوش حاجه هل انا جاني ولا مجني عليه ف القصه دي

قصتي بأختصار ان في العيله قريبي من واحنا صغيرين أصحاب جدا واخوه معانا طفولتنا احنا التلاته مع بعض مع ان هما في محافظه و انا في محافظه بس احنا في الاجازات و الأعياد دايما مع بعض ف لما كبرنا شويه و بقينا داخلين على أولى اعدادي بدأنا نقعد مع بعض اكتر عشان كرونا جات و كدا و كلنا قعدنا في البيت و اتحبسنا في محافظتهم بسبب حظر التجوال مده طويله ف فيه واحد من الاتنين دمت بقينا حرفيا قريبين جدا و التالت بقى مكتئب مش عارفه بس مكنش في نفس المود احنا قعدنا من أولى اعدادي و تانيه اعدادي كنت بنتكلم كتير و انا كنت بحسب ان دا بيحصل مع كل القرايب مفرقتش ولد ولا بنت المهم تلميحاته بقت واضحه جدا في تالته اعدادي قمت قاطعه علاقتي بيه سنه تالته اعدادي عشان حسيت اني بحبو و انا دماغي مش مستوعب ان ازاي احب قريبي و عمري ما فكرت بالطريقه دي قلت و بعد ما قطعت علاقتي بيه سنه معرفتش ابطل افكر فيه طول السنه دي و استسلمت اني بحب قريبي و بقيت بعامله زي ما هو. يعاملني لو فيه تلميحات بقولها و كدا بس أولى ثانوي كان لسه زعلان اني قطعت سنه كامله تانيه و تالته ثانوي كانو بيرفكت أولى جامعه بيعلقني كتير قمت مبعتلوش الأول دلوقتي لو احنا في تجمع عائلي ممكن مسنلمش على بعض بس انا لسه بحبو بس في ي نفس الوقت انا لسه بعامله زي ما هو يعاملني ل مسلمش انا مش هسلم و كدا و لو مبعتش انا مش هبعت بس في نفس الوقت اللي جوايا مش عكس كدا تماما و نفسي اكلمو و اعرف هو بيفكر فيا ازاي و خاصه ان احنا كل دا تلميحات و عمرنا ما قلنا اعترفنا لبعض اعمل ايه بجد انا كل اللي بعمله معاه بيكون جوايا عكسه بس في نفس الوقت انا نفسي اقلو على كل اللي جوايا او حتى اتصرف معاه طبيعيه زي أولى و تانيه اعدادي لما كان بيلمح و انا مكنتش فاهمه

السلام عليكم و رحمة الله و بركاته حياكم الله عندي امي مريضة وسواس لا اعرف كيف اتعامل معها...حتى انها اصبحت تبدي كرها لنا و ترى اننا لا نحبها و كذا .... لم اعد اعرف التعامل معها (ترفض المتابعة عند اخصائية نفسية)

أنا بكلم بنت عمتي(ملحوظة قاعدة في محافظة تانية بس بنتقابل في المناسبات و الزيارات) من زمان من ساعت ما كنا صغيرين و إحنا علاقتنا ببعض كويسة لحد ما وصلنا جامعة (يعني حوالي 7 أو 8 سنين ) و خلال الفترة دي كلامنا كله علي الواتس بشكل يومي و المكالمات من فترة للتانية لما بتكون برا البيت المهم إحنا أقرب إتنين لبعض و علطول بكلمها في كل مشاكلي و هيا نفس النظام و بنعرف لبعض كل حاجة بتحصل في حياة التاني ، فا خطر علي بالي إيه رأيك تتقدم ليها و يكون كلامنا في الحلال بدل ما أنتوا بتكلموا بعض كدا و ممكن يكون في كلامكم شبهة و أخيرا جمعت شجاعتي و أعترفتلها و قولت ليها إن بالكتير خلال نهاية 2026 أو بداية 2027 أكون وقفت علي رجلي و أتقدم لبنت كدا قالتلي مين قولتلها أنتي راحت قالتلي أنتا شخص كويس و فيك كل الصفات اللي تتمناها أي بنت و أنتا محترم و راجل و جدع ، بس أنا شايفة أنك أولا لسا صغير و غير كدا أبويا حالف بالطلاق أنه ما يجوز حد فينا أنا و أخواتي البنات لأي حد من العيلة و مينفعش ، قولتلها أبوكي علاقتي بيه زي السمنة و العسل و بيحبني و أكيد هيوافق ، قالتلي بعدها و غير كدا أنتا يا @#@ مش شيفاك غير أخ و صديق و النقطة مش هعرف أغيرها ( و قعدت تقولي حاجة مش فاهمها) أزاي أنتا هان عليك صداقتنا و قولت كلام زي دا ، و مش عارف إيه و في الأخر من ساعت أخر رمضان لحد دلوقتي مكلمناش بعض خالص و غير كدا أنا قولتلها المبرر بتاعي إن كلامنا فيه شبهة و حرام بس هيا بتقولي أنتا مجرد أخ + لسا مكلمها و قولت ليها هان عليكي العيد دا يعدي كدا ، راح قالتلي أنتا اللي هان عليك كل اللي بينا عايز أعرف دلوقتي اللي أنا عملته غلط و لا لأ و هيا ليه عملت كدا (هل فعلا علشان والدها زي ما بتقول ؟)و لا علشان حاجة تانية ؟ و غير كدا إزاي أنا من جوايا كنت عايز أحارب الدنيا عشانها مع إني كنت عارف أهلي أول حد هيقولي لأ علشان هي أكبر مني ب 6 شهور مع إن دا مش مبرر و هيرفضوا علاقة زي دي تكمل لأسباب تانية زي إني في كلية أعلي منها و كدا و هما عايزني أتجوز واحدة تكون كليتها مستوي عالي مش في كلية أي كلام زيها كدا (دي مش طريقة تفكيري دي طريقة تفكير أهلي ، هيا في نظري أحسن واحدة في العالم كله و محدش يقدر يغير و جهة نظري ) و أي حد عنده نصيحة أو حاجة زي كدا يقولها و شكرا

انا من صغري حلو ما شاء الله وجميل ولما كنت صغير كان بنات العيلة كلهم عايزين يكلموني هل عشان مكانش في ولد غيري في العيله ولا عشان كنت حلو مش عارف .. المهم لما كبرت دلوقتي بنت عمتي لمحتلي مليون مره انها معجبه بيا وانا كنت حمار تلميحات لحد ما بدأت الاحظ وكنت بحاول اعمل نفسي عبيط برضو .. المهم جيت في مره قولتلها اني عارف انك نفسك تقربي ليا بس مش هينفع لأنك اختي وعمري ما اقبل ان ابقى كده بالنسبالك راحت قلبت الطرابيزه وفضلت تقولي اقرب ايه وفضلت تنكر وشككتني في نفسي وحسيت اني موهوم وخايف ابقى موهوم في حاجات تانيه كتير .. هل كنت موهوم فعلا ولا هي عندها نقص ؟

ابن عمتى فاتح كلام معايا وبيرغي وانا مش عيزه احرجه لان انا مش بتكلم مع ولاد او كده وانا كل مااقفل كلام يرجع يفتح كلام ويبعت تاني يومم جماعه بجددد قولولي على حل من غير مااحرجه لان هو غالبا مفكرني شايفه الموضوع عادي وانه قريبي وبنهزر وكده وانا م شيفاه عاديي

حاسه اني عايزة اقول حاجة ممكن تكون غريبه بس أنا كنت محوشه فلوس انا مش من النوع اللي بضيع الفلوس علي اي حاجه تافهه المهم يعني الفلوس مخليها عشان اجيب بيها لبس عشان فرح اخويا و كده عندي اخواتي اكبر مني بيبعتوا ليا كل شهر مثلا مرتب صغير انا باخده و احوش اجيب الحاجات المهمة عندي ابويا بيتجنن عايز ياخد مني الفلوس و يقولي مرتب البيت لازم يكون بنص! المشكله ان هوا بيقلب اليوم اللي يعرف معايا فلوس غير ان هوا بيقبض و معرفش عن مرتبه حاجة ولا بيديني منه يا دوب بيجيب طلبات البيت لما اكون تعبانه او عايزة حاجة مهمة ليا مش بيديني من يومين قالي الضغط عالي عليا انا عايز اكشف بس معيش فلوس كان مستني اني اطلع و اقوله خد و قبلها بقوله اسناني وجعاني عايزة اعملها يقولي والله معاكي فلوسك روحي اعملي انا معنديش استعداد ادفع بحس بضيق جداً من كلامه بحس إني عايزة اعاتبه و اقوله بتعمل كدا ليه بس مش بيشوف نفسه غلط امي مسافره بره مش عايزين أسافر معاها ولا عايز يصرف عليا عايز يعذبني في النص

كل لما انسى و اتعافى ارجع تاني لنقطة الصفر يعني انا فاهمة انه مشغول مع مراته بس مش من حقه يهملنا يمشي و يعيد على الناس كلها إلا ولاده و يقول انه بيحبنا فين الحب ده نفسي افهم انا قرفت بجد مش عارفة اكلمه ولا لأ و أعاتب تاني ولا لأ و هيكون نفس رد الفعل كل مرة و وعود زي انها اخر مرة و الكلام ده احتفظ بالعتاب لنفسي طالما انه كدة كدة مش بيجيب نتيجة ولا لأ انا تعبت