انا ولد عندي ٢٥ سنة لسه بدرس وبشتغل ف كلية حاسبات ، انا من كنت صغير كنت بشوف صحابي بيرتبطبوا وبيكلموا بنات وبيحاولوا يجذبوا انتباهم بس انا كنت شايف كل ده هبل كنت مفكر ساعتها انهم عيال صغيرة وانا اعقل منهم علشان كده مبفكرش في كده قبل حتي ما افهم الموضوع من منظور ديني..
دخلت الجامعة واشتغلت وبدأت احتك ببنات كتير بس فضلت بتعامل عند اللزوم وبحدود الزمالة فقط ؛ مش معزول او انطوائي او اني مبعرفش اتكلم معاهم لا بعرف اتعامل عادي وساعات بضحك وبهزر في وجودهم بس في الحدود والاهمية فقط مش عمال ع بطال يعني ولسه معنديش طبع او خصلة الارتباط او الاقتراب زيادة معاهم في العلاقات او الكلام...
لحد من فترة شوفت بنت شغالة جنب مكان شغلي وكانت بتيجي تطلب مني حاجات بطبيعة شغلي بس انا شفتها مختلفة اوي حسيت بحاجة اتجاها وده من حاجة نادرة اصلا اني ابص لبنت عجباني ف مبالك اني احس بانجذاب اتجاها دي حاجة تقريبا اول مرة احساها وانا كبير وواعي لدرجة اني قعدت فترة كبيرة حياتي واقفة عند احساسي ده بفكر اعترفلها وبفكر ازاي هعمل كده وبطلب النصيحة وبحكي كمان لاقرب صاحب ليا وقاعد طول اليوم بفكر ف كل حاجة تخصها وممكن تحصل ، الموضوع خرج عن التفكير وبقولكم اني بدأت اجهز حاجات وبستشير صاحبي فيها ؛ وبعدين زي ما تقول عقلت اني مستحيل اقدر اخد خطوة الخطوبة دي دلوقتي واني مش جاهز ع الاقل ماديا وحاولت اتعايش وفات فترة بتيجي في خيالي وبقعد افكر زي الاول فيها كل فترة والتانية وبكتأب وبزعل اني مش عارف اكمل حياتي معاها وغالبا هي كمان عايش حياتها متعطلة منتظرة حد معين حتي لو مش انا يجهز نفسه ماديا علشان تتجوزه بدل ما تعيش معاه الفترة دي الي مفروض هي فترة شبابنا قعدين مستنين سنين لحد ما نجهز ماديا وبعدين نبقي نتجوز ف الآخر خالص طالما كده كده نهاية الطريقة موجودة ليه منمشهوش سوا بس احنا واقعنا لا يعترف بده حتي لو ده مش من ديننا...
حالياً انا كل ما اشوفها عندي تفكير واحد هل هي هتفضل مستنياني لحد ما اجهز واجيلها وهي اصلا متعرفش عني حاجة.. طب افرض حتي انا ضربت الارض طلعت فلوس وهي اتقدملها واحد واتخطبت خلال شهر انا هلحق اعمل ايه خلال شهر مثلا.. وعايش مع فكرة ان اني ممكن اخسر الشخص الوحيد الي انجذبت ليه واعيش بقيت حياتي فاكرها وندمان علشان بس الظروف كانت مش مناسبة ساعتها وبحس بعدها بحزن واكتئاب ووحدة شديدة بعدها ومش عارف اعمل ايه
