السلام عليكم. يمكن انهاردة عندي مشكلة بجد ومحتاجة حل، مش مقدمة بس للأسف. زمان من سنتين مثلا، عرفت ناس اونلاين ولاد وبنات، من اوائل الناس اللي عرفتهم اتنين، خلينا نديهم اسم بوجي وطمطم. فاا انا بعدت لفترة طويلة اوي عنهم بعد كده عشان حرام، وفي نفس الوقت عشان مكانش فيه طاقة ادخل للعلاقات. من فترة رجعت اكلمهم بس على خفيف كده وكلام كل فين وفين، وكل ده كان تلي. المهم، طمطم جت فجأة واختفت وانا بعتتلها واتس، قالتلي انها كويسة ومحدش يبعتلها وانها هتمسح كل حاجة حاليا، ف انا انصعت لرغبتها ومرديتش، قلت يمكن حصل ظرف ولا اي حاجة. بعدها انا قطعت تواصلي انا كمان والموضوع خلص، بس واحدة من البنات بعتتلي بتلومني على بُعدي تاني، ف كنت بكلمها على خفيف عشان عارفة قد ايه هي متعلقة بيا. فاا امبارح، بعتتلي انها عرفت طمطم اختفت ليه، ف سألتها وقالت الآتي؛ قالت انها بعتتلها واتس لعل وعسى ترد، واللي رد عليها اخوها، وقالها ان طمطم تعبانة دلوقتي ومش هتعرف ترد، بس هو هيبلغها سلامها، ف هي قعدت تستفسر انو مالها وكل ده، ف راح قالها كويسة بس عايز اسألك سؤال، قالتله اتفضل، قالها هي كانت بتكلم ولد اسمه بوجي؟ وانه دخل على التلي بتاعها بالصدفة ولقى جروب فيه بوجي، وانه قال لاهله، والتلفون مسحوب منها حاليا. المهم دلوقتي، انا كنت اقرب واحدة لطمطم، وكنت شاهدة على ادبها واخلاقها وهدوءها، ومش عشان هي صحبتي والله، هي اصلا لو مش كويسة مكنتش صاحبتها من الاساس. حتى بعيدا عن انها كانت مع بوجي ف جروبات انستا وتلي، الا انها اصلا كانت يعتبر مش بتفتح خالص، ومختفية اغلب الوقت، ده غير ان انا وهي زمان كنا متفقين على كودز وكلمات بيننا عشان ننبه بعض في حضور الولاد اننا نبطل كلام؛ ف لو انا مثلا في نقاش مع ولد وطولنا شوية، تروح كاتبالي كلمة معينة، ف اقفل النقاش، وهكذا. ف دلوقتي انا محتارة، هل ادعيلها من بعيد لبعيد، ولا ابعت لاهلها شهادتي على اخلاقها والكلام ده كله حتى وهو مش هيفرق وانا عارفة؟ بس يعني على الاقل ابقى وقفت جنبها وحسنت صورتها ولو بشكل طفيف، او على الاقل لما تاخد تلفونها تعرف اني وقفت جنبها، خصوصا ان تصرف البنت اللي بعتتلي مكانش كويس اوي لانها كانت تحت الصدمة واكدت لاخوها انها بتكلم بوجي ده، رغم انها حتى انا مكانتش بتفتح تكلمني اوي واحنا بيستيز. فاا بس، آسفة على الاطالة.
