رمضان

الاكتئاب اللي بعد رمضان طلع اقوي من الاكتئاب اللي بعد الحمل فعلا 🙂 اول رمضان احس فيه اني مش متقبل فكرة انو عدي كدا بالسهوله والسرعه دي بعد ما البيت كان هادي وكل شخص فينا مسحول في عبادته ودنيته رجعنا للايام الطبيعيه المقرفه كل واحد ينزل شغله ويرجع مضغوط ويزعق ويطلع عصبيته علي غيره البيت بقا كلو خناقات وزعيق ديما وكمان شخصيتنا التانيه المختلفه اللي مش عارفه تتحكم في ذنبها مع وجود الشيطان كمان عامله شغل عالي وعشان عايزه استمر ولو حاجه بسيطه بقرأ قرآن مثلا وكإن حد بيشدني كدا لورا وخنقه وكإني مش عايزه اعمل كدا بس مضطره اعمل كدا حد فاهم حاجه !!؟ حاسه ان الحياه من غير رمضان موحشه جدا وحاسه اني بقيت عايشه ف غابه اول مره احس الاحساس دا ف حياتي بجد

بتظبطوا نومكم ازاي بعد رمضااان بقالي اسبوع بحاول ولسههه زييي ما انااا ، كده مش هعرف اروح المحاضرات الصبح ربنا ياخد ال مائه و خمسون حرف و ال ،upديت الجديد عشان ده استفزاززززز اوييييي اوييي

في العشر الأواخر كنت زعلانة ان رمضان هيخلص فطلعلي مقطع لمصطفى حسني كانت واحده كاتبه ان هي خايفه لما رمضان يخلص همتها تقل في العباده تاني زي الاول قال لها انه الاذكار و ذكر الله هو اللي هيساعدك انك تفضلي زي ما انت بعد رمضان كمان سبحان الله وبحمده سبحان الله العظيم

حاسه اني من اول الترم التاني ده وانا مذاكرتش حاجه و بعيده عن ربنا و حاسه ان ربنا عمال يديني فرص عشان اذاكر و اعمل الي عليا و اقرب منه زي رمضان و بردو انا معملتش ده ف رمضان كنت بحاول اجاهد و اقرب من ربنا بعدين جيت ف الاخر معدتش بنزل دروس و بغيب و جه بعدها العيد و الدروس اتلغت و كان قدامي فرصة الم كل الي متراكم عليا و معملتش ده بردو و انا حتى مش قادرة احاول و مش عارفة فعلا ايه الي بيمنعني و جه تاني حوار الجو ده و الدروس اتلغت و انا بردو معملتش حاجة من الي عليا وانا حاسه بالذنب اوي و كل يوم اقول اني هلم الي عليا بكره و معملش كده والفكره انا ف سنه المفروض اجيب مجموع لو حد عنده حل يفيدني انا فعلا مش عارفة ابدا ازاي

رمضان السنه دي كان مختلف بالنسبالي ومش الاختلاف الحلو يعني بس الحمدلله برضو فيه حاجات كويسه وللأسف رمضان بيخلص اهو خلاص وصلاه التراويح النهارده كانت كفيله تقلب في الذكريات وتفكرني بناس كتير ، افتكرتها واحنا بنصلي سوا ووانا بحفظها دعاء معين وافتكرته وهو بيسمعلي سوره الرحمن وافتكرت الدعوات اللي اتحققت 🥹 بس في حاجه بجد مفرحاني مش عارفه ربنا استجاب لدعوتي ولا مجرد صدفه بس يارب تكمل للآخر وفي حاجه تانيه معصباني ومخلياني زي العيال الصغيره اللي بتدبدب في الأرض علشان الحاجه اللي عايزاها ، كنت وعدت نفسي اني اكون اول واحده تقوله كل سنه وانت طيب بس للاسف مبقاش ينفع 😡 بس عامه كل سنه وانتوا طيبين وادعولي معاكم ربنا يسامحني ويهديني

السلام عليكم ورحمة الله وبركاته انا تعبت انا غرقت في الذنوب حرفيا، كل مرة بتوب برجع أسوء من الاول، حتى رمضان اللي قلت عنه اني هتوب فيه جيت في الآخر وفطرت 3 أيام بسبب العادة السرية !!!! اول مرة في حياتي أفطر في رمضان انا بجد مصدوم من نفسي حرفيا انا يئست من نفسي وبقت بتجيلي أفكار اللي هو انا مش هعرف أتوب أبدا وبيأس مني مش من رحمة الله، انا عارف الآية في سورة الزمر " قل يا عبادي الذين أسرفوا على أنفسهم لا تقنطوا من رحمة الله" بس انا ميأستش من رحمة ربنا انا يأست من نفسي اني اعرف أتوب اول تهجد يجي واكون واقف مش خاشع فيه، اول مرة اصلي تهجد وابقى واقف قلبي زي الحجر انا بجد مصدوم من نفسي ومش عارف اعمل ايه على الجانب الآخر بحاول قدر الإمكان اني أحافظ على الصلوات في المسجد والحمد لله بحفظ قرآن بس كل دة بقلب زي الحجر الذنوب أهلكتني

جماعة انا تايهه اوي بجد حاسه اني ضايعه معرفش ف ايه بس رمضان بيضيع مني او يمكن ضاع انا تعبانه اوي بجد كنت عايزه اخرج من رمضان كويسه حاسه مفيش حاجة ماشيه و مضغوطه من كل حته مش عايزه ارجع للعلاج النفسي تاني و السيشنز لان بجد بتكون صعبه عليا خصوصا اني بعدي دا لوحدي مش عارفه اركز ف حاجة خالص حاسه كل حاجة ضاعت مني مش عارفه انا بعمل ايه بجد

من كام يوم كده وفي مواقف بتحصل بتفكرني بشخص كنت أعرفه وبتخليني أسأل نفسي حاجات كتير بس ثانيه كده ، هو انا هستفيد اي لو عرفت الاجابه ولا اي حاجه لانه سواء كان وحش أو حلو فخلاص مبقتش تفرق ولان اللي متأكده منه ان وجودي مكسب لاي حد وان عدم وجوده بالنسبالي راحه وبعد كده لو افتكرته حتي لو بالوحش مش هحاول اعدل الصوره دي لأن هو اللي اختار يظهر بيها ومفيش في أيدي حاجه اعملها غير اقول يارب يبقي كويس وبخير والعيد قرب وعيد ميلاده كمان فكل سنه وهو بخير أن شاء الله ولو كان غرضه أذي فعلا كده كده ربنا هيردهوله واهي الدنيا ماشيه ، رمضان بيخلص وفي ناس كانت موجوده في أوله بس خلاص مبقتش موجوده وانا كمان قريب هبدأ سنه جديده من عمري وكنت متخيله أن في ناس معينه هتكون معايا بس برضو مش موجودين بس الاهم ان اللي بنحبهم وبيحبونا بجد لسه موجودين وكده كده ربنا مش بيجيب غير الخير اتبسطوا يا جماعه وكل سنه وانتوا طيبين وبخير انتوا وكل حبايبكم

حد عنده حل لعدم تشتت الانتباه في وقت الذاكرة و ازاي اعرف اجدول مواعيدي في رمضان عشان لحد دلوتقي مش عارف ومراكم حاجات كتير يعتبر مفتحتش المنهج لوحد عارف مراجعات اعرف الم منها اللي فاتني بسرعة اكون شاكر جدا