خوف من الفقد

جماعه انا عندي تعلق مرضي بشخص هو موجود وكويس معايا بس حصلت مشكله بينا وكان هيسيبني وانا من كتر تعلقي بيه حرفيا قعدت اقوله روح خوني بس متسيبنيش انا مش قادره اتخطى ومش قادره افهم ايه اللي وصلني لكده انا فعلا مش قادره استحمل فكره انه متغير معايا بسبب انه زعلان مني وتعلقي بيه طلع اسوء بكتير من توقعاتي

خليك ديما مستعد انك تبقي لوحدك ومكتفي بنفسك علشان اكتر حاجه ممكن تكسر البني ادم ان هو يربط حياته كلها بشخص مش علشان الوحدة حلوة بس علشان ما تخافش منها خلي عندك حياة كاملة قبل ما حد يدخلها علشان اللي يدخلها يبقي اضافة ليها ما يكونش حياتك كلها الناس بتتغير وبتتشغل وبتمشي فما تتعودش وما تعتمدش علي اهتمام حد غير نفسك بجد احلي واقوي شعور في الدنيا انك تبقي لوحدك ومبسوط

حد مر بتجربة التعلق القلق ، وان لو حد بيمشى من حياته من صحابه مثلا بتجيله نوبات نفسية عنيفة جدا مش بيعرف يتصرف معاها فبيضر نفسه وبيعمل تصرفات يندم عليها .. ازاى حد كدة يقدر يبقى مستقر ويتصرف صح .. وازاى يسمح بالخسارة عادى حتى لو شايف احتمالات الاستكمال وانه يقدر يحل حاجة موجودة .. ازاى نبطل هلع وحزن

علاقتي ب بابا الفتره دي مبقتش حلوه خالص وبقي في مشاكل كتير جدا بيني بينو لأني فجاءه اتقفلت منو جدا كا شخص هو وماما من ساعت ما اتجوزو من زمان مش متفاهمين خالص ومن واحنا اطفال بنشوف مشاكل كتير اوي قدام عنينا اخر فتره تقريبا أدركت الوضع الي بابا معيشنا فيه وابتديت أدرك مدى اذيتو لماما جسدياً ونفسياً وماديا كل حاجة تقريبا فا اتقفلت منو قفله صعبه مبقتش طايقه التعامل معاه وبقيت دايما في صف ماما لما تحصل مشكله لاني كنت دايما في صف بابا وباجي على ماما جدا😂كان مكرهني في ماما بطريقه وظلمتها كتير اوي زمان فا كان بيحبني جدا وكنت دلوعته بقي اول ما بقيت بوقف مع ماما الأحوال كلها اتشقلبت وبقي شايفني مفتريه زيها وظالمه وكل حاجة طبعا هو شخص نرجسي جدا ومبيطلعش نفسو غلطان ولازم كل حاجة تمشي على مزاجو وطبعا بقي يأذيني انا كمان سواء بالكلام أو بالافعال ده لمجرد اني بقيت منحازه لماما بس كل شويه دماغي بتفضل تفتكر مواقف كنت نسياها طول عمري بجد عملها في ماما كاني دوست على زرار وكل شويه بيضايق واتقفل منو اكتر ومعاملتي بتكون وحشه معاه غصب عني اوي اوي والله انا بجد من جوايا مبقتش صفيالو يعتبر وكل كا بحاول اكون احسن واعمل اسكيب لاي حاجة فاتت بيعمل موقف جديد يوجعني اكتر وآخرهم قالي انتي عويله وانا بصرف عليكي يبقي تقعدي بادبك واحترامك هنا😂 حقيقي انا معملتش اي حاجة غير اني وقفت في صف الحق ودافعت عن ماما بقي يسمعني اسوأ الكلام ويحاول يشكنني في نفسي وفي مبادئ وقد ايه انا كده هفشل في حياتي لو اعتبرت أن كده صح من كتر المشاكل دي انا بقيت في ضغط نفسي رهيب وبقيت خايفه وجاسه أن مممكن يجي يوم ويكرهني او يتقفل مني وميبقاش بيحبني ونوصل لحاله من الجفاء كده فا باجي على نفسي عشان اكون احسن بس بجد كل شويه الوضع يبوظ انا بجد مبقتش طايقه حتي اللمسه بتاعتو انا عموما مش بحب اللمس بس هو بالذات مبقتش احبو يقرب مني ولا اي حاجة ومبقتش عارفه اتعامل بجد خالص

انا وشخص صحاب بقالنا سنه مع الوقت حبينا بعض وهو اعترفلي من يومين وطلب مني رد وانا قولتله أن ده شعور متبادل بس اول ما عرفنا بعض حصل موقف خلاني اقوله أن انا اكبر من سني بسنه مكنش قصدي اخدعه ولا كان في نيتي اي حاجه بس انا مكنتش متخيله الموضوع بينا يتطور لكدا خالص قالي أن هو هيكلم اهلي ويجي يتقدملي بعد شهر وأهله عارفيني وبيحبوني واهلي عارفينه والدنيا كويسه جدا وانا حاسه بالذنب ومش عايزه ابان بالطريقه دي قدامه أن انا ضحكت عليه طول الفتره دي او كذبت خصوصاً عشان هو بيكرهه الكذب بس حقيقي انا ندمت أن انا عملت كدا ودي الحاجه الوحيده اللي كذبت عليه فيها بس هو من الأشخاص اللي لو صارحته هيفتكر أن طول الفتره دي كنت بحور وبكذب عليه وفعلا انا حبيته ومعنديش استعداد يشوفني بطريقه تانيه أو اخسره ازاي ممكن اصارحه هو مش هيبقا عنده مشكله في السن احنا بينا4سنين وهو قالي بالصدفه انه مش حاسس بمشكله في فرق السن بينا بس فكره الكذب نفسها هتعمل مشاكل كبيره بينا أنا عارفه