تقبل النفس

​مش عارفة امتى وازاي دا حصل بالظبط بس بجد حياتي بقت أحسن بكتير أنا حسيت فعلا بالتغيير كنت بكره نفسي ودايما مركزة مع عيوبي ومبشوفش الحاجات الحلوة اللي فيا وشايفة إني وحشة ومستحقش أي حاجة حلوة بتحصلي ​حاليًا شايفة إني أحسن حد في الكون - الموضوع شكله قلب بنرجسية شوية - بس بجد بقيت شايفة إني أستاهل كل حاجة حلوة وبقيت عارفة قيمتي كويس جدا وبطلت أتاثر بكلام أي حد عني، دا رأيك فيا؟ عادي حقك تشوفني كدا بس دي مش أنا ​احنا دايما بنركز على العيوب وننسى المميزات مع إننا لو فكرنا شوية هنلاقي فينا حاجات حلوة كتير فعلا ومش واخدين بالنا منها محتاجين نبطل نقارن نفسنا بحد أو نشوف إننا أقل من حد ونتقبل النقص اللي فينا ونفهم إن مفيش حد كامل وإن وجود عيب فينا لا يعني إننا وحشين ما كلها عندها عيوب، نحاول نصلحه من غير ما نكره نفسنا بسببه ونحاول نتصالح مع نفسنا ونبطل نجلدها على غلطات الماضي ونبطل نلومها ونجلدها طول الوقت المفروض نتعامل مع نفسنا زي ما بنتعامل مع حد بنحبه لما بيغلط مش بنفضل نلوم فيه بنهون عليه، نفسنا أولى بالحب من أي حد ونحاول دايما نطور من نفسنا ونفرح بالإنجازات البسيطة اللي بنعملها ونشجع نفسنا دايما

كل مره بحاول اتقبل نفسي او احبها مقدرش بفتكر اللي كنت بعمله و القرف اللي كان بيحصل و بكرهني اكتر و بكره شكلي اسلوبي كل حاجة بكرها مش عارفه اعيش عادي بسبب ماضي مش عارفه اطلع منه محبوسه فيه مش عارفه اخرج مهما حاولت برجع لنقطه الصفر

أحياناً بنكون إحنا أصعب قضاة على نفسنا، بنحاسبها على الكلمة والنظرة والغلطة وكأننا مش بشر. بس الحقيقة إن كره الذات مش علامة على إنك شخص سيئ، هو مجرد "تعب" في الرؤية، زي الغبار اللي بيجي على المراية فبيخليك تشوف صورتك مشوهة. حاول تهدي السرعة شوية مع نفسك. مش لازم تكون مثالي عشان تتحب، ولا لازم تنجح في كل حاجة عشان تحترم وجودك. الغلطة اللي عملتها هي "فعل" مش "هوية"، أنت أكبر بكتير من مجرد موقف أو إخفاق. عامل نفسك كأنك بتعامل طفل صغير بيتعلم المشي؛ لو وقع مش هتشتمه، هتمسك إيده وتطمنه وتخليه يحاول تاني. الرحمة بالذات هي أول خطوة عشان تقدر تعيش بسلام، لأنك في النهاية الشخص الوحيد اللي هيكمل معاك لآخر الطريق، فخليك رفيق يهوّن السكة، مش عدو بيصعبها.

جدعان هموت واعرف الناس لما تيجي تقول حل مش بتقول كيفيه حل المشكله او الموقف يعني لو انا مش بحب نفسي كفايه وبحاول بقدر الامكان احب نفسي يجي شخص يقولي حبي نفسك مش فاهمه يعني المفروض اعمل ايه 😂😂😂 بحس اني يارتني ما حكيت او شرحت مشكلتي بتكلم بجد يا جماعة ازاي اقدر اتقبل نفسي واحب نفسي بكل عيوبها وازاي اعالج احتياج ان لازم يبقا في حد جنبي