اهتمامات

اوقات بنبالغ في تقدير حاجات عادية وممكن أقل من العادي وعقلنا بيخلينا نفكر أنها حاجات مهمة وقيمتها كبيرة وهي عاديه. يعني اتنين لقيوا انهم كانو مع بعض في المدرسة وانهم كده مقدرين لبعض لا it's nothing انت معاك خمستلاف واحد في المدرسة. حد تاني يقول دا احنا متفاهمين وكأننا فولة وانقسمت نصين برضو it's nothing في ناس بتفهمك كتير بس انت بتحب دا وعايزه ومش شرط تكملوا. دا احنا مولودين في نفس الشهر أو نفس اليوم، دا احنا جيران أو من نفس المحافظة، احنا عندنا نفس الاهتمامات والهوايات. ✨ it's nothing ✨ في خمسين واحد بيعمل الحاجات دي عادي انت اللي مكبرها عشان عايز تهيأ لنفسك انك مقدر للمكان دا والشخص دا بطل افورة

ماشي باختصار مشكلتي بسيطه و مش بسيطه هي اني %100 مبقتش بثق في حد و مع ذلك يبقى عايز الناس تثق فيا، بالتالي دي انانيه طب ارجع اثق في الناس ازاي، حتى القريب منه أو البحبه مبقتش عارف، و اكيد مش محتاجه فزلكه او تفكير اكيد اتخدعت كتير، و اه مش كله شبه بعضه و بيبان عالناس و بلا بلا بلا بس لو اعتبرنا انا مش هثق في حد %100 و في نفس الوقت مش عارف ابقى لوحدي *فبالتالي مفيش حد اشارك معاه اهتماماتي من العاب او تفكير او افلام و مسلسلات او رياضه او او او* فأعمل اييييييييع و مع العلم حتى لو كلامي فيه شوية انانيه بس انا مش اناني خالص انا بس مش عارف

اكتشفت اني معرفش حاجه عن نفسي معرفش انا بحب ايه و مش بحب ايه و حرفيا معنديش اي هواية او اهتمام بحاجة معينة الموضوع ده مضايقني اوي خصوصا اني في ثانوي علمي و المفروض هختار كلية تتبني عليها مستقبلي و لحد دلوقتي مقررتش انا عايزه ايه. مفروض اعمل ايه بالظبط 😣

عارفين ي جدعان احساس الغربه اللي الواحد بيحسه ونظرات الاستغراب اللي بيشوفها في عيون ناس كتيره كأني جاي المريخ 😏 ي جدعان منا شخص عادي جدا اهتمامتي انتوا فاهمينها عشان انتوا بعيد عن اللي زون بتاعتي يقولك شيخ لمجرد ان محافظ ع صلاتي مش بشيير حاجه فيها موسيقي بحاول اكون ملتزم حتي لو مقصر ما بيني وبين نفسي بس ع الاقل مش لازم اوضح للناس اني عندي السوء وعندي الذنب ده يقولك انت بوشين بتابع مؤثرين خليجيين يقولك مالهم المصريين منا بتابع مصريين بردو بس كترفيه وانا شايف ان المعلومه دي مهمه عشان كدا مشييرها بتعلم مهارة خط عربي يقولك ايه الشخبطه دي سحر الواحد بقي حااااسس انه الناس كلها غريبه اللي هو تحس انهم مش فاهمين او بيحاولوا يستنقصوا انا معدتش فاهم

الصراحه يا جماعه انا مش عارف اجد حد نفس اهتمامي بالانجلش او مثلا ننصح بعض نتكلم مع بعض انجلش و كل انا اي حد بحاول اتعرف عليه في الكورس بيحبني بس بعد ما مثلا اجيب اعلي منه يزعلي مني فزعلان جد

كنت بحاول ابحث عن صديق محترم من نفس سني انا عندي 16 يشاركني نفس اهتمامي في اي نشاط انا بعمله و اهم حاجه يكون محترم مش عارف اجد الصديق ده الس ممكن اعتمد عليه و احكيله حاجه عني و ميستغلش ضعفيي

انا مشكلتي دايما حاسس ان مفيش حد فاهمني و مفيش حد عندو نفس اهتماماتي و المشكلة فعلا اني بحس كل الي حوليا اغبياء يعني الي بيجري ورا الفلوس وكده و للأسف عندي اكتأب من فتره طويلة اكتر من ٣ سنين و مش عارف اتعالج منه و مبقاش عندي هدف في الحياه ازاي احل المشكلة دي وهل في حد مر بنفس التجربة دي ؟

بقيت حاسه بالبلاهة اوي و حاسه ان اهتماماتي اتغيرت و بقيت انجرف للتفاهات اكتر و انشغل بتفاصيل ملهاش لازمه ازاي اطلع نفسي من الوضع ده و ابدأ ارجع اعتمد على نفسي و أستخدم دماغي. وهل ممكن ده يكون ليه علاقة باستخدام السوشيال ميديا حوالي ٤ او ٥ ساعات فاليوم؟