انفصال الوالدين

انا محتاجه مساعده ضروري انا اهلي منفصلين وعايشه مع مامتي واخواتي وابويا سايبني بقاله كذا سنه وقايلي اني مش بنته وكلام كتير بس انا نفس شخصيته ومش بعرف اتعامل مع مامتي واخواتي وطول الوقت في مشاكل معاهم لدرجه ان هما ولا مستحملني ولا انا مستحمله اقعد معاهم خالص فعلت وجبت اخري عايزه امشي من البيت بس مش عارفه اروح فين انا بتعامل بطريقه ابويا ونفس شخصيته ودي اكتر حاجه بكرهها انا مس نفسي ابقى شبهو خالص والله بس غصب عني زيه في كل حاجه حد يساعدني اروحله ولا اعمل ايه وملحوظه انا مامتي لو قلتلها اني هروحله ممكن مترجعنيش تاني وانا ثانويه عامه ونفسيتي وحشه اوي ومش بذاكر خالص بسببهم ف حاسه اني محتاجه افصل من البيت

انا ولد ابويا وامي انفصلو قبل ما اتولد بشهرين وفي مشاكل بنهم بس انا حاليا كل ما بشوف اب وابنو في الشارع بستغرب وبزعل اني مش عارف اتخيال ازاي واحد عايش في بيت واحد مع امو وابو حاسس انها حاجه غريبه

طيب انا حكايتي غريبه شويه بس في منها كتير. ماما و بابا اتجوزو يعتبر صالونات و بعد 5 سنين اطلقو و ماما خدتني و مشيت علشان محدش كان موافق علي ده اخواتها كانو بيرجعوها غصب عنها و يتنازلوا عن حقها هيه اختارت تاخدني و تمشي من وراهم و رفعت قضيه خلع و استقرت لوحدها بعد سنين علاقتها مع اهلها رجعت بس مش كلهم انا بقي كبرت و اتربيت معرفش حاجة عن الاهل و مشفتش منهم امان و كل ذكرياتي معاهم اللي فكراه من وانا صغيره بشعه ابشع حاجة ممكن طفله تشوف ان مامتها بيحصل فيها كده حقيقي كل ما بفتكر من الخنقه بحس اني مش قادره اتنفس لاكن اخوات ماما دلوقتي رجعو كلموها و معترفين ان اللي هيه عملته انها تمشي ده الصح و انها نجدت نفسها من الهلاك وانا عايشه يعتبر لوحدي انا و ماما مش متفاهمين شويه كل شوية بنتخانق و عدينا بحاجات صعبه جداً بس وضعنا دلوقتي احسن بكتير ماما حاولت كتير تطلعني احسن من اي حد بس بطريقه غلط من غير حنيه انا مش بفكر اوي في الموضوع ده بس لا المفروض ان ده كان علي الاقل من حقي وانا صغيره انا بقعد بفكر مثلا ايه اللي كويس ماما عملته معايه من حيث الفيلنج مش لاقيه لاكن من ناحيه التعليم و كده هيه بصراحه كانت بتعمل كل حاجة علشان ابقي فعلا كويسه وانا حاليا دكتوره بس لمه بدأت اكبر بقيت انا بختار طريقي من نفسي علشان ماما تفكيرها غلط و بالنسبه لبابا انا مش عارفه اقول هو كويس ولا وحش هو كل علاقته بيا اننا بنتكلم في التليفون و بقابله كل كام سنه مره كل حكياته بجد محدش يستحملها لاكن في نفس الوقت هو حنين عليا انا ف بتعامل ان مهما هو كان او مزال وحش ان هو ابويا مش هينفع اعامله معامله وحشه مع انه مضافليش اي حاجه في حياتي زيه زي اي راجل غريب و كمان في فرق طبقات فظيع بيني انا و بابا انا عايشه في مكان كويس الحمدلله قي بيت ماما كبير و واسع و تعليكي بفلوس و مش قليله و بنصرف كتير اللهم بارك و بابا عكسنا تماما بابا معندهوش بيت ولا شغل ولا حتي تليفون سمارت و لهجته مختلفه تماما عننا انا جوايا بسبب اهلي خوف كبير بس من بره ببان ولا كأن فارق معايه و اني برغم اللي حصل معايه بس قويه و عرفت اتصرف صح و الصراحه انا هدفي الاول و الاخير دايما ابقي كويسه من بره حتي لو انا مدمره من جوايا لدرجه ان من كتير التفكير بنام و احلم بكل الهم اللي عندي و بصحي من عياطي و اتعودت اني محكمش علي حد من شكله و بعامل كل الناس حلو و باخد علي قافيا في الاخر بحس جوايا عبث مش عارفه اترجمه اه اي حد في حياتي ميعرفش اللي حكيته ده بس اللي بيشفوه غير اللي جوايا

حاسس اني وحيد من وانا صغير كنت امي بتعاملني وحش اوي و كانت حياتي قرف و بعدين امي و ابويا انفصلوا عن بعض بسبب ان امي طلعت خاينه و كده يعني و روحت معاها عند اهلها كان كانو بيحسبنوا كل شويه علي ابويا شويه ناس مريضه و وعشت فتره من اسوء فترات حياتي هناك و كان نفسي امشي من عندهم و معرفهمش تاني كل ده وانا صغير عندي حوالي 10 سنين و حصل تفاصيل كتير المهم الحمدلله روحت قعدت مع ابويا بس علي طول بقي رسايل من اللي اسمها امي المفروض يعني مش عارف ازاي دي ام و حاسس اني متراقب من كل حته كل م انزل حاجه علي السوشيال ميديا او اغير صورت علي الواتس الاقيها بتبعت ب ترن وانا مش برد وانا عيبي اني كتوم و مش بتكلم ف جبت اخري خلاص لازم اتكلم و فكره البرنامج حلوه اوي حاليا انا حوالي 13 سنه كل ده و انا لسه ف سن الطفوله اللي المفروض اعيش فيه طفولتي الطبيعيه🙂

مامتي وبابايا انفصلوا من وانا صغيره وساعتها انا مكنتش فاهمه ولا حاسه بحاجه غير بخوف وقلق من زعيقهم مع بعض و عياط ماما وقت طلاقهم بس مع الوقت كبرت وفهمت أن ده كان الصح عشانا كاولادهم بس المشكله كانت أن في فتره ماما اتجوزت واحد علي سنة الله ورسوله طبعا واهلها كانو عارفين بس احنا (انا واخواتي) مكناش نعرف وبعدها بفتره جت تاخد رأينا ف أن هي عايزه تتجوز بس مقالتش أنها كانت متجوزه اصلا المهم احنا وافقنا عليه وكل ده من غير ما بابا يعرف لأن لو كان عرف مش بعيد كان يقطع علينا الفلوس الي بيديهالنا كل شهر المهم عدى سنين وبابا عرف وحصلت مشكله كبيره وكلم ماما وشتمها وبقا بيكلمني انا واخواتي وبيقولنا انتو كنتو عارفين وكدبتو عليا ازاي متقولوش علي حاجه زي دي انتو كنتو بتتفقو مع بعض عليا وكلام من ده وكمان جه فتره وقطع الفلوس لحد ما قولناله أننا هنوقف دروس عشان يرجع يبعت الفلوس وبعدين قالنا أن ماما كانت متجوزه من غير ما تقولنا واهلها كمان كدبو عليه مع أن علاقتهم بيه كانت كويسه حتي بعد الانفصال المهم كان شرطه أننا منروحش لاهل ماما خالص ومنشوفهمش الا لو هما الي جم عندنا البيت بس طبعا بالنسبالي كان مستحيل اقدر اعمل ده لان خالاتي وجدتي دول اقرب ناس ليا وخصوصا خالتي الصغيره وكمان انا مش مقتنعه أن هو فجأه يحطنا في مقارنه بينه وبين اهلنا ويضغط علينا بالشكل ده بس بعد كلام كتير بالشهور كانت علاقتنا بيه اسوء حاجه الأمور اتحسنت واتكلم معايا وقالي أنه فعلا مكانش عايز يحطنا في الموقف ده ومش عايزنا نحس أنه بيبخل علينا أو أنه اناني بس هو كان عايز يحس أن احنا بنحبه ومستعدين نضحي علشانه وانا اتفهمت ده جدا والموضوع اثر فيا جدا وحاليا عندي مشاكل مع اخويا الكبير مع أنه اقرب واحد ليا ومحتاجة نصايحكو جدا ملحوظه:عندي 13 سنه

السلام عليكم، عندي ١٣ سنه. ولدي و والدتي انفصلوا من اكتر ٧ شهور، و من ساعتها عمال اروح القاهره للجيزه أو العكس. و انا فعلا تعبت. انا حاليا مدرستي في الجيزه و بعيش مع والدتي و جدتي. و بروح لوالدي يوم الخميس الصبح بعد المدرسه علطول. و مدرستي وحشه جدا، الانجليزي تعبان، المدرسين بيغيبوا كتير و في مدرس بيضرب ب عصايه جمده. يا ريت لو تشوفيلي مدرسه في الشيخ زايد مس غاليه و حلوه. و شكرا

مش عارفه هتفهموني والا لأ بس انا بابا وماما بينفصلوا اليومين دول وفيه مشاكل وناس رايحة جاية عاوزين يصلحوا بس اول ما واحد من الناس دي خد رأيي اني ابويا يرجع يعيش معانا لانه بقاله 6 سنين عايش بعيد عننا حقيقي لحظة من الرعب وشلل في اللسان وبكل ما فيا من تعب طلعت كلمة ( لأ) انا اتعودت انه بعيد الحمدلله اتعودت اننا مش في حساباته والا اولوياته وانه عنده نفسه ثم نفسه وبرضو كانوا بيحاولوا يصلحوا لحد ماسمعوا مني جملة رجوعه يعيش معانا = انت*حاري والناس فعلاً بدأوا يتكلموا في طلاق وان مفيش فرصة يرجع يعيش معانا وبجد فعلاً كتر القسى بيعلم الجفاء انا مش حاسة اني بكرهه والا حتى بحبه انا بس عاوزة راحتي ودي هتبقى موجوده طول ما هو بعيد قعدت معاه اكتر من 10 مرات قبل كده وقولتلوا اكتر كلمة بتتعب قلبي وطلعتها بالعافية وفهمته ان الكلمة دي طالعة بروحي واللي تعبني مش اني طلعتها.. اللي تعبني انه مقدرهاش ( يا بابا انت مخليني عندي احتياج خايفة في يوم اضعف قدام اهتمام واحد ويستغلني اكبر استغلال.) عديم المسؤلية والمشاعر يبقى مش أب ومكنش يستاهل ان ربنا يرزقه بأطفال اللي يعيشني في الوجع والكسرة والخوف والرعب ده واني انام معيطة واني احب واحد في السر بقالي سنين وشيفاه وهو بيكلم دي و دي وبقول مش مهم مهو في كل الحالات مش هيشوفني ولو شافني هيستغلني وهيتسلى وبس مقتنعة جداً اني هفضل طول العمر لوحدي حتى لو اوقات بيجيلي سيكا صغننة تفاؤل برضو برجع لنقطة الصفر وان ابويا محبنيش ومحترمنيش هييجي الغريب يعمل فيا ايه بجد؟؟ انا كل دمعة بتنزل من عيني بحتسبها في ميزانك بما اني مش عارفه ارتاح في الدنيا ف يارب ريح قلبي في الآخرة