انطواء

ازاي أحل مشكلة السكوت اللي سبب فيها الرهاب الإجتماعي انا مش بتكلم خالص اغلب الوقت ساكت في الشغل ومع اغلب الناس مفيش غير صحابي القريبين مني اللي بكون علي طبيعتي معاهم وبتكلم هل فيه تمارين اقدر اطبقها علي ارض الواقع عاوز اكون علي طبيعتي وانا بتكلم واتخلص من الإنطواء اللي انا فيه ده

كنت دايما لما بخرج مع اى جروب بحس نفسي بتقل عليهم ال هو لو خرجوا من غيرى اعتقد كانت هتبقى خروجه احلى انا حد مش منطلق اوى على الدنيا وهادى حتى فى الخروج ببقى حاسب كل حاجه ومخطط هعمل ايه وكده بحسنى ببوخ اى حاجه بكون فيها وبقول ياريتنى مبقاش موجود وحتى لده بقيت مش بروح تجمعات كتير وببعد عن الناس اكتر مع ان الناس بتقولى انى كويس وكده وبيحبونى بس انا بحس ال هو لا انا مجرد حمل عليهم يعنى بقول دايما ليه يصاحبونى اصلا انا لو اقدر افارقنى كنت فارقتنى من زمن

عارف إن مشكلتي تبان تافهة بس بجد بجد انا بعاني منها، انا بقالي فترة منعزل بشكل غبي، بقالي تلت شهور مخرجتش مع صحابي ومش بنزل من البيت غير لجدتي مثلا كل اسبوع والضرورة وكدا، دا خلاني بجد دلوقتي بقيت خايف اتعامل وخايف اروح مكان فيه ناس، بقيت بميل للعزلة بشكل غريب، خايف اروح المدرسة، بروح الدروس بالعافية، واخر موقف اني محتاج اوصل حاجة لاخو جدتي وكنت عمال اتهرب من الموضوع بس النهاردة كان لازم، وهو ميعرفش ان اهلي جايبينله حاجة، كلمته بالعافية وانا اصلا خايف سألته اخبار حضرتك ايه والكلام دا، افتكرني بتطمن وبسأل عليه، مقدرتش اسأله هو في البيت ولا لا علشان اهلي جايبينلك حاجة، في دماغي انه هيتضايق جامد لو عرف اني بكلمه علشان بس اوصله حاجة مش اكتر، ومواقف مني دي كتير بجد، واهلي بيضغطوني ومش فاهمين اي حاجة من اللي انا حاسس بيه، شايفني بس مهمل كسول مش عاوز ينزل من البيت، وبصراحة انا بردو دايما حاسس اني بتدلع واني مكبر الموضوع، مع اني الحوار دا بجد معطل كل حاجة في حياتي، وانا بجد عمري ما كنت كدا مش عارف اعمل ايه، انتم مش متخيلي بجد التعامل مع حد بالذات لو اعرفه بقى مرعب بالنسبة ليا ازاي اسف لو طولت

الشعور بالوحدة.. من ونا طفل طول عمري منعزل اه عندي صحاب وزمايل بس انا عمري ما بدات حاجة من نفسي وخليت ناس تشارك معايا مثلا دايما انا اللي بروح اشارك، كان عندي بيست فريند عادي في كل مرحلة دراسيه قبل الجامعة اللي هو الانسان العادي الانطواءي بس على الاقل كان عندي صحاب اه كان عندي رهاب اجتماعي بس مبرر لان كان عمري صغير وكل حاجة كنت بجربها لاول مرة. افكاري عن نفسي دايما اني مش زي الباقي هما اكيد حلوين انا مش وحش بس هما احلى فاهمين الفكرة. كمان موضوع اني بدا وزني يزيد في اول الاعدادي تدريجيا وكل ما كنت أزيد كيلو حرفيا يزيد اكتئابي وبعدي عن الناس وحدة بوحده بس كل ده عمري في يوم ما حسيت بالوحدة اه ممكن حسيت اني مستبعد بس اني اتوجع عشان وحيد لا. الى ان دخلت الجامعة وكل حاجة بدات تبوظ من بعدها حرفيا في ترم واحد بعدت عن كل صحابي بحكم ان كل واحد في كليه ومعرفش اعمل ناس جداد بسبب ان الكلية في محافظة بعيدة عني ونا كنت شغال فبقيت وحيد جدا حاليا ودراستي باظت واكتئبت فتره كبيرة. بس رجعت اقوي نزلت جيم وبدات اخرج وحده وحده بس مشكلة الوجدة لسه موجودة ومش عارف اعمل ايه