اثبات ذات

انا عايز افهم بس حاجه واحده ، هي لي فكرتنا عن الجامعه كدا ، يعني لي احنا في 2026 ولسا في ناس تفكيرها تجاه الجامعه لسا بالشكل دا ، مطعم بيفتح عندنا فالجامعه عادي ومفيش مشكله ، شاب من اللي شغالين فيه بيتصرف تصرفات انا بتحرجله ، تصرفات ملهاش لازمه ومش هتضيفلك حاجه وهتقلل منك ، يشغل مهرجنات بصوت عالي ، طب انت لي بتشغلها بصوت عالي مالتلفون جمبك لا مشغلها عالصب كمان عشان كله يلتفت نحيته ، يفضل يخرج ويدخل ويقعد برا فالفود كورت يشرب سجاير ، يعم السجاير ممنوعه لا هو برده عايز يعرفنا انه الشاب الجامد الفقدان السرسجي اللي مفيش منه ، انا معنديش مشكله يعمل اللي يعمله ، بس انك تعمل كل حاجه بدافع البنات بالتحديد اللي حواليك يشوفوك ف هنا بقا التصرفات الكرنج بدأت ، مش فاهم لي لسا فكرتنا عن الجامعه كدا ، اللي هو عايز اخطف الاضواء ودِه تبصلي وده تبصلي وابقا الجامد اللي ده وده يتمنوا يصاحبوني ، يعني انت فكرك يعني واحده هتيجي تقولك الله انت ازاي كدا مختلف عني وسرسجي وانا ف جامعه خاصه وشخصيتنا مختلفه عرفني عليك ، وبمناسبه الجامعه الخاصه ، تخيل واحده فالجامعه هتبص لواحد بيعمل التصرفات ده ومرتبه اخره خمس سته تلاف جنيه دا لو وصل لكدا اساسا وبيقضوه بالعافيه ، المشكله ان محدش عبيط وكله عارف اللي قدامه بيتصرف بالطريقه المعينه ده ليه واي هدفه ، ف ياريت نغير تفكيرنا عن الجامعه ابوس ايديكوا ، هي مش مكان للتعارف وبدايه قصص الحب ، ولا مكان لاثبات الذات ، ولا مكان لايجاد شريك الحياه مثلا ، ولا حتي مكان انك تجيب عربيتك ولا الريس بتاعتك تقف بيها قدام الجامعه وتشغل اغاني بصوت عالي وتفتح شبابيك العربيه ، هي مكان لتتعلم فالاول وفالاخر ومن كتر اهميتها سموها الحرم الجامعي ، هي مكان تشوف فيه ناس تعبوا وشقيوا لحد ما وصلوا لمكانه المعيد او الدكتور، فِكر مختلف واسلوب حياه غير ، هي ده الجامعه باختصار ، ف ياريت الجامعه تفيدك مش تدخلك في دوامه من اثبات الذات وكسب اهتمام الناس وياريتك هتكسبه عشان الناس مش عبيطه وبتفهم تصرفاتك وانت كدا مصدر طاقه سلبيه ليهم