أذية

“الناس” مسؤولة عن الأذية، و”أنت” مسؤول عن تعافيك.. الشحتفة، والولولة، وحططان الإيد على الخد كلها حاجات لا بتصلب طول، ولا بتعدل أوضاع، ولا بترجع ماضي.. محدش بيخف في نفس البيئة اللي صابه فيها المرض.. عشان كده العايب مينفعش يتعاتب، والعلاقة اللي طفتك عمرها ما هتنورك، وكسرة النهاردة هتبقى بكره كسرتين لو مافوقتش حالاً.. جزء كبير من احترام الإنسان لنفسه موجود في إكرامه ليها بالبُعد عن كل شيء يسحب من طاقتها بالسلب.. كل واحد فينا عارف فين مصلحته، ومع مين راحته.. شايف إيه اللي بيتعبه، وفاهم إن في القرار الفلاني صلاح حاله.. مستني إيه؟.. الناس شغلانتهم الأذية، وأنت التعافي معركتك.

دلوقتي يا جماعة أنا عندي مشكلة ومحتاجة رأيكم ضروري . لو اقرب اقرب حد ليك اذاك اذي جامد جدا وبسبب اللي هو عمله ده انت دخلت فحالة اكتئاب شديدة بعد ما اصلا كنت لسة خارج من حالة اكتئاب بقالك ٣ شهور بس ، الشخص ده علي حسب ما انت تعرف أن هو طيب جدا فأنت مش عارف حتي تفسر هو الذي اذاك كدة وكان جواك مشاعر كتير جدا غضب وحزن و خذلان . الشخص ده بعد اللي عمله حاول يعتذر كتير جدا بكل الطرق بس انت علشان كنت لسة فحالة صدمة ومش مستوعب حاجة كل مرة كنت بتصده واخر مرة اتعصبت جدا وانفجرت وقولت كل اللي كان جواك ويعني قولت كلام جارح شوية بس ده كان كله غصب عنك من تأثير الصدمة اللي كنت فيها ، وبعد شهرين من اللي حصل بدأت خلاص تستوعب وتفكر ولأن فراق الشخص ده كان واجعك اوي وفكرت فحاجات كتير فقررت انك خلاص هتسامحه وتحاول تتقبل اللي حصل يمكن نفسيتك تتحسن وعلشان انت لسة بتحب الشخص ده اوي ومش حابب نهايتكو تبقي كدة ، يعني حتي لو مش هترجعو زي ما كنتو بس علي الاقل تتعاملو طبيعي. وفعلا قابلت الشخص ده وقولتله انك سامحته وهو مكنش مصدق اصلا و انت اعتذرت عن الكلام الجارح اللي قولتهوله وهو قال إنه اصلا مزعلش وخلاص اتصالحتو وكله كان تمام بس بعدها بكةم يوم الشخص ده ييجي يكلمك ويقولك إن انت بكلامك الجارح ده دمرته وان انت السبب أنه دخل حالة اكتئاب وتعب فأنت قولتله إن انت كمان بردو تعبت جامد من الحوار ده ففالاخر قالك أن انت اصلا السبب فكل ده وانك لو كنت سامحته فالاول وخلاص مكنش كل ده حصل . هل انت كدة ساعتها هتبقي غلطان فعلا ولا لا ، الفكرة أن هو اللي عمل المشكلة وهو اللي اذي فالاول ودي كانت ردت فعلك ، هي اه ردت فعلك كانت قاسية شوية بس هي بنفس حجم الموقف يعني. انا الشخص ده هشوفه النهاردة المفروض علشان نكمل كلام بس انا متوترة ومش عارفة انا فعلا غلطت ولا ايه و المفروض افضل اعتذر ولا لا و حاسة أن الترابيزة بتتدغدغ علي دماغي مش بتتقلب بس. ف لو قريتو لحد هنا احب أشكركم جدا بجد لاهتمامكو وياريت تشاركوني ارائكم

فاكره من سنه بالظبط كنت بحاول اتعافي من شخصيه عرفتها. وكنت بكتب بوستات هنا ناس نصحتني و دعمتني و دول قليل اقل حتي من ١%. لكن الباقي اذوني اكتر و بقول يارتني ما كلمتهم ولا اديتهم دقيقه من وقتي او طاقتي